Read abua Bụo aHibru 12 Bible Online

Bụo aHibru 12 - abua bible

Bụo aHibru 12

¹Kụ ịduon aḍiboom aḍita awe ọrol bọ okoom rụmiin iyira, ọnyagharanaan oomo ạraraar lọ kịimoromi iyira osereghi! Ọkporion rạghaagh tọrobo ịkaraph lọ ikpophonom iyira kụ obigh ekpom oghiilom eghiil phọ yira ọmoogh bọ!

²Ọsighe riḍien ayira ogbi loor ạJizos, ọpo omeeraam mọ ayira odi bọ esi ọdi kꞌemiighom mọ tụtu ẹteeny eekuna phọ! Ọdi ọ́tuan mọ kọkan ni nyịno loor oreeny phọ okiigh bịn ọ́wile eghiil phọ. Ọdi ạkpokpoy ni ạghiom ghisigh loor iboh phọ ịpe rekori bọ nyọdi. Ịdipho umugholoor omugh aḍuugh egbo phọ ụ́kigh bọ ịyaar esi ọdi, nyịidipho ọdi mạrol ude kꞌạke ḍịghaagh elhiom ạgada ọdaam ẹmha phọ Ẹnaan.

³Ịitughian ọdo ạmulogh-ḍien phọ dị ạkparam bọ ḍịghaagh abuḍighinom ịkaraph phọ, ọbo iloghi anyina kedugh ghan bọ nyina ẹkanyanu.

⁴Eenom mọ nyina rebianan bọ ịkaraph ke̋si esi dị kozu ịḅaal phọ anyina.

⁵Nyina mewula oroma phọ Ẹnaan riroma ghan bọ inyina ịdipho ọde rꞌọony ḍụghum? Mọ, “Mọony ạmi, mem lọ Ọmoogh-we phọ rạliom nyịna, kạ́sighe ghan mụdi ịyaar ị́man. Ḅịle kẹn ologhi ạna kúdugh ghan, mem lọ ọdi ạḅaam nyịna,

⁶ịdi eḍighi bọ Ọmoogh-we phọ rạliom ghan ni oye lọ ọdi ạphomoghian, kạgurogh tọrobo oye lọ ọdi ạsighe ạloghoma mọ ọony ọno.”

⁷Ịminimiin phọ nyina rẹmiinom bọ ịlo ịtuugha phọ anyina. Ẹnaan rịpham ni inyina ịdipho ọde rꞌọony. Ọony ólho ghan dị ọde phọ rạ́liom ghan.

⁸Ọwile bịn dị inyina rị́liom ghan ịdipho ạbueri phọ, pọ nyina kọ́karaghi ạnmuny ọdi, nyina ạnmuny eten.

⁹Epel ịphen phọ, yira ụḅile ni ọmoogh bụrude sịen ade phọ dị ụliom ghan iyira, kụ yira ụlogh ghan kẹn ni bịdi eghuan. Ẹkpe ghụn ni epu dị yira kosooromi loor phọ ayira ọngo ịikpo Ọde phọ odi bọ kꞌạke, pịdi ọmoogh ghuḍum.

¹⁰Ạburude phọ ayira ụliom ghan ni iyira mọony ekulha amem bịn, ịdipho ẹkpianaan bọ bịdi, kụ Ẹnaan ekol ghan sụo dị yira kọmoogh kụ rịlhiom ghan bọ iyira, pịdi yira ophin aani bin ạroozo aghuḍuul phọ ọdi.

¹¹Repin ghan ni, rẹ́ḅaal ghan iloghi awe, mem lọ rọliom bịdi, kụ onyebel roten, bụphe mọlhiom bọ kụ mosereghian bọ romuum ghan iimuma ẹepho kọrol dọl aruukuan.

¹²Ịzaami ịkporokporo ạraghaagh phọ anyina, ẹḅile ẹgburion iphighaphigha aruukum mọ anyina.

¹³Itelhe ghan ịphalaḅaal areten, pịdi owol ẹgha phọ aaleeny, kpạripe rꞌoḅoghoronu ọmadan.

¹⁴Ịkparami ghan ḍịghaagh ẹrolom ẹepho rꞌoomo awe, ẹrol dọl aruukuan, ịdi eḍighi bọ ọlo ụ́tol dọl phọ ạḍien phọ kạ́miin Ọmoogh-we phọ.

¹⁵Igona loor, ọbo ọghor phọ Ẹnaan kakpetenaan ghan bọ ọnyo anyina. Igona kẹn loor mọ eghiḍim kị́moogh sịni esi anyina, ịdi eḍighi bọ resi rẹmanam keḍighi ni oboom ọgbaragbara ogbo phọ anyina.

¹⁶Igona kẹn loor anyina mọ oye ipesi kúpesi, ḅịle kẹn kụ́kigh Ịso dị Ẹnaan ụ́logh eegu kụ ạtuan eniin ẹkpa eḍien bịn aal ịkpana phọ ọdi.

¹⁷Nyina elegheri ni mọ onyebel roten, kụ ọdi ạḅile aḅula apuru ọde phọ ọdi ọghor phọ, kụ oghel nyọdi, ịdi eḍighi bọ ọdi ólhegheri mun ịlo ooḅulemi ịpe ọdi maḍighi bọ, ghạlamo ịdipho ọdi amoghi bọ ni izin igey.

¹⁸Nyina ítu aani ọdo phọ erumom mọ aweye phọ Ịzirel oru bọ. Bịdi uru ọteeny ịyaar dị kọḅogh ni ḍịghaagh, Eegum aSainai rꞌaḍiboom anem ạnian dị reemor, rꞌọkikiki ufiri, rꞌoghim,

¹⁹rꞌạḍiaḅa ọkuodu rꞌẹḍogh. Ẹḍogh phọ awe phọ ọnaghan bọ iḍighi ni ruugu dị bịdi ụ́wa mun ọḅile ọnaghan,

²⁰ịdi eḍighi bọ útue ụ́kparam ịpe ọto bọ ọḅeni bịdi mọ, “Ghạlamo rꞌẹnam bịn kụ etir eegum mọ, oroḅol ghan ni ikpo oghiigh!”

²¹Ịdi esi phọ ẹrol bọ iḍighi ịikia ruugu dị tụtu aMozis ạḅem mọ, “Aloor ạmi repiigha ni loor akuboom aruugu.”

²²Momeeraam ghụn ni nyina etu ẹphen Eegum ạZayon, ẹmha Ẹnaan phọ edi ghan bọ aJeruselem kꞌạke phọ, rꞌạsimuunir ạruukpaany phọ Ẹnaan.

²³Nyina meru eekpomoghan sịphe ịkpana ạnmuny phọ mọgeeghi bọ siḍien phọ ạbidi ẹpe kꞌạke odi bọ roboh iboh phọ. Nyina meru ẹteeny Ẹnaan, oogboom ịiruen oomo awe phọ, ḅịle rꞌaruwaloor awe aruukuan phọ moseleman bọ.

²⁴Nyina meru ẹteeny Jịzos, ọpo ạmeera bọ enye imoom ịyo phọ, ọpo ịḅaal phọ ọdi ozu bọ rẹkaaph bọ ọghaaph dị ạnighe apu nyọpo ịḅaal phọ Ebel.

²⁵Igona ni loor, íkel ghan ọnaghanan ọpo rạkaaph ghan bọ. Bụphe ọḅitonaan bọ nyọpo ạrol bọ sịen ade phọ ạghaaph dom mọ Ẹnaan, ụ́ḍua wororoph. Ika nụun kụ ẹdi yira kokpetenaan bọ ghẹlhe, eḍighi ịyaar lọ yira ọḅitonaan nyọpo odi bọ kꞌạke kụ rạkaaph?

²⁶Mem mọ ọpo phọ, ẹḍogh phọ ọdi iphighemi ni de phọ, kụ nyịidipho ọdi maguanaan mọ, “Esugha mem bịn mị kạḅile bọ apighemi, káde phọ bịn, mị kạḅaram ni kẹ phọ.”

²⁷“Esugha mem bịn” phọ eḍeenaan mọ kọsighiogh ni oomo phọ ịpe kẹ̋gbimighan bọ kụ ọbile ịpe répiigha bọ.

²⁸Ọngo ghan ghụn ḍịseph mọ yira mọmoogh ẹmha dị kópighemi! Ọḅaal ologhi, ọpham eegu rꞌeghuan kụ ooseenyom Ẹnaan, ịdi kẹḅeeraan nyọdi,

²⁹ịdi eḍighi bọ Ẹnaan phọ ayira ạnian ẹpueghi.