Read abua Bụo aHibru 13 Bible Online

Bụo aHibru 13 - abua bible

Bụo aHibru 13

¹Oniin ạphomoghian ghan ni nyoniin, ịdipho ạbuo asiya esi aKraist!

²Ịitughian ni ọlogh ghan aruuruen otu. Abuniin awe dị oḍighi ghan ịduon phọ úlegheri mem dị bịdi ọloghom otu rụukpaany phọ Ẹnaan.

³Ịitughian ghan ni bụo ikoli, mụdi nyina rꞌạbidi kụ edi ikoli phọ. Ịitughian ghan kẹn ni bụphe rọmiinom bọ, mụdi nyina rꞌạbidi kụ rẹmiinom.

⁴Apinien ạkpe ni dị oomo awe kọlogh ghan eghuan. Olhom mọ rꞌạnir phọ oniin ameelom nyoniin! Ẹmina aḍughul phọ bịdi kụ́pue, ịdi eḍighi bọ Ẹnaan keegbo ni ịiruen ẹngo bụwaam ạnmariir rꞌabulhiom ẹmha.

⁵Kẹ́sighe ghuḍum mọ anyina ẹḅam ạnyu ikpoki. Ịlo nyina ẹmoogh ịgbaanyan ghan ni inyina, ịdi eḍighi bọ Ẹnaan mẹḅem ni mọ, “Mị inyina kị́wile. Mị inyina kíghel.”

⁶Kụ esi ịduon phọ yira kọḅem ni rꞌoḍuom ologhi mọ, “Ọmoogh-we phọ kụ rụlhoghonaan ghan ịmi ḍịghaagh. Mị kákiilaan. Oye kuḍighi ịmi eeghe?”

⁷Ịitughian bụo ạrumhu phọ anyina, bụphe ọphur bọ ọghaaph ọghaaph phọ Ẹnaan ịḅeni inyina. Ịkiom ologhi ịpe bịdi ọrol bọ sịen aḅirini phọ rꞌọdo aḍuugh phọ bịdi omugh bọ, ẹtuughaany omeeraam mọ ạbidi.

⁸ẠJizos Kraist oniin phọ ni iḍue phọ eten bọ rꞌarodon ḅịle kꞌagee-pọ.

⁹Kémeera ọdo kịrokiro ịtughemi irorori inyina ẹgbole egey eten phọ. Ẹkpe ni dị ọnma ighirigiir phọ Ẹnaan kụ kạkparami ruwaloor phọ ayira, kóoko ghan iilogh ịlo amalhe. Bụphe ooko ghan bọ iilogh phọ ịphen ụ́moogh sụo.

¹⁰Yira ọmoogh ni enmeny ẹkia dị ariil ạrikia phọ ạbuphe rọpinyonom ghan bọ rịkia sịphe ogbogo ịiḅereghi phọ okpiom bọ rukpe phọ ụ́ko ịko olhe aani ạraraar ạrikia phọ ịpe phọ.

¹¹Oyil abiil phọ ayira rạpam ghan ịḅaal ịnam mọ kaḍighom Ẹphan phọ mọ ọsighe owophom ịkaraph, kụ komite erugh oguom nịan ịnam mọ ọze bọ.

¹²Ịduon kụ iḍighi kụ ạJizos atenom bọ emitenom ẹmha phọ kụ ogbi bọ oghiigh phọ, pịdi ọdi ạsighe ịḅaal phọ ọdi awophom we phọ esi ịkaraph phọ ạbidi.

¹³Ụgua nụun, omite erugh ọteeny nyọdi ophin aani bin umugholoor phọ ọdi,

¹⁴ịdi eḍighi bọ ẹphen phọ yira ụ́moogh ẹmha dị emiigh. Yira ropogh ghan ghụn ọmiin ẹmha phọ ẹpe retu bọ.

¹⁵Ụgua nụun oboom ghan Ẹnaan oomo amem. Ẹphen phọ kụ ẹkia dị ạJizos rụlhoghonaan iyira ḍịghaagh ọphighiron. Ẹphen phọ bịn kụ ẹkia dị bụphe ọsighe bọ ịidoronhu phọ ạbidi rokolom ḍien phọ ọdi rọpighiron ghan.

¹⁶Kébulamaam ghan oḍighi iiḅi, ḅịle lọ oniin kạloghonaan ghan nyoniin ḍịghaagh, ịdi eḍighi bọ ịphen kụ ạrikia dị rẹḅaal ghan ologhi Ẹnaan.

¹⁷Ịnaghanan ghan bụo ạrumhu phọ anyina, ẹdaph ịtooghi phọ ạbidi. Bịdi kụ abukoriom aruwaloor phọ anyina, sịen dị bịdi kọgba bọ ni ịpe bịdi oḍighi bọ oḍighi phọ ọḅeni Ẹnaan. Nyina ẹnaghanan bịdi, pọ bịdi koḍighi ni oḍighi phọ ạbidi rꞌọphalaḅaal ologhi. Ịdipho ílho, pọ bịdi koḍighinom rꞌịḅiphighu, bịn kéḍighi sụo ịngo inyina.

¹⁸Ighol ghan ni iyoor ẹeḅereghi. Yoor ọmoogh ni oḍuom ologhi dị iloghi ayoor iyoor rị́gurogh, ịdi eḍighi bọ yoor rọwa ghan oḍighi ịpe eru bọ igey phọ oomo amem.

¹⁹Mị ịlom ni inyina rạkpaariom mọ ịiḅereghi Ẹnaan mọ ọdi ạnuun ni uḅulemi ịmi iruom inyina.

²⁰Ẹnaan meḅeton Jịzos Ọmoogh-we phọ ayira sịphe aḍuugh phọ, ọpo ạtuan bọ ịḅaal phọ ọdi oghirom bọ ịyo kꞌagee-pọ phọ kụ aḍighi bọ Ogbogh Opoghom iyool-ịga phọ.

²¹Ẹnaan ẹepho phọ ịngo ni inyina tọrobo egey ịyaar lọ ikuom inyina ọsighe oḍighinom ịpe Ẹnaan rẹwa bọ, kụ ọdi ạtuan ni Jịzos Kraist ạtuugh aḍighi sịphe ạroozo phọ ayira ịpe ẹḅeeraan bọ nyọdi! Igbogh phọ kụ ẹrolonaan Kraist kꞌagee-pọ kꞌagee-pọ! Ẹrol li ịdipho!

²²Bụo asiya, mị rịiḅereghian ni inyina mọ ịnaghanan rꞌọkparam ọghaaph ọkparami iloghi phọ anyina ọphon; ịdi eḍighi bọ ạḍinya phọ ạḍien mị ạge bọ riruom inyina ị́karaghi ịdoony.

²³Mị rạwa mọ nyina ilegheri mọ moseere Timoti, ọnyo asiya phọ ayira, ikoli phọ. Mọ ọdi ạnuun atu, pọ ọdi rꞌạmi kụ kịmiin ni inyina.

²⁴Ipurunaan iyoor oomo ạbuo ạrumhu phọ anyina rꞌoomo awe phọ Ẹnaan. Ạbuo asiya phọ, bụphe Itali, mipuru inyina.

²⁵Ooḅi ọghor phọ kꞌẸnaan ạrolonaan oomo phọ anyina!