Read abua Bụo aHibru 3 Bible Online

Bụo aHibru 3 - abua bible

Bụo aHibru 3

¹Loor ịphen phọ, bụo asiya phọ Ẹnaan mẹmagh aani bọ eegho eseerian, ịitughian ghan Jịzos phọ Ẹnaan erom bọ mọ aḍighi uwo ẹmhu oyil ạrikia omeeraam mọ yira rọdaph bọ.

²Ọdi aseere ni ologhi ọdi esi ọpo ạma bọ nyọdi, ịdipho aMozis aseere bọ ni ologhi phọ ọdi sịphe eghunotu awe phọ kꞌẸnaan.

³Oye dị ạlogh otu rạmoogh ghan eghuan kapu ọkaraghi otu phọ. Ịduon phọ kẹn kụ ẹdi ạJizos kụ ạman ọmoogh igbogh apu Mozis.

⁴Otu ólho ghan dị oye kụ́logh. Kụ ọlo Ẹnaan phọ kụ ịlemogh bọ oomo ạraraar phọ.

⁵AMozis aḍighi ọony-otu dị aseere ni ologhi ọdi oḍighi phọ sịphe eghunotu awe phọ kꞌẸnaan, ạḅile ạghaaph ghan ạḅeni bịdi ịlo ạraraar dị Ẹnaan kẹkaaph mem dị retu ghisigh.

⁶Kụ aKraist ghụn aḍighi Mọony dị aseere ologhi ọdi ophogh ghan eghunotu awe phọ kꞌẸnaan. Yira kụ ạbuo eghunotu phọ ọdi, lọ yira ọpham ạkpo ologhi phọ ayira ọkparami, ọḅile oḅoom ghan oḍuom ologhi phọ ayira, osiemi eekuna.

⁷Loor ịphen phọ, ịdipho Uwaloor Iigbia phọ rạḅem ghan bọ mọ, “Rodon, mem lọ nyina ẹnaghan ẹḍogh phọ Ẹnaan,

⁸kẹ́ḅaar mun ẹmhu, ịdipho aḍio phọ ạburude ạburude phọ anyina oruphiom bọ nyọdi ẹpe ẹdala phọ, kụ ọdegh bọ nyọdi.

⁹Ẹnaan rẹḅem ghan mọ ẹpe phọ kụ ẹdi bịdi ọman úpogh bọ ọdegh ghan ạmi, ghạlamo ịdipho bịdi ọmiin bọ ni ịpe mị aḍighi yogh bọ esi inyadi ạsia phọ.

¹⁰Loor ịdipho phọ, mị ụghagham ni ologhi we phọ ạbuphe phọ kụ ạḅem mọ, ‘Bịdi rọpioman ghan ni oomo amem sịphe ịitughian phọ ạbidi. Bịdi kọ̋tuugha ọmaar reten phọ ạmi.’

¹¹Mị ụghagh ni ologhi kụ aghunya mọ, ‘Bịdi kóḍigh aani dọl ophooghian phọ ạmi.’”

¹²Bụo asiya, igona loor anyina ẹmiin mọ rꞌoniin ọnyo anyina ọ́moogh ologhi dị eeph iboom rꞌemeeraam, dị ọdi kạgbatanaan ạḍua esi Ẹnaan phọ edi ghan bọ.

¹³Kpạripe dị ịkaraph kiikeleghi inyina ẹngoom ọḅaar ẹmhu, oniin ạloghonaan ghan ghụn nyoniin ḍịghaagh ḍio etum ḍio, ịdipho ekpo ọnhu phọ ẹpe oghol bọ mọ “arodon” phọ ịkpulughiom bọ ni iyira.

¹⁴Yira mọmoogh mụḅoph rꞌaKraist, eḍighi ịyaar lọ yira ọpham ni oḍuom ologhi phọ yira ọmoogh bọ kꞌemiighom mọ, ọkparami osiemi eekuna phọ.

¹⁵Ịphen kụ ịdi ạḍinya iigbia phọ rẹḅem ghan bọ mọ, “Rodon, mem lọ nyina ẹnaghan ẹḍogh phọ Ẹnaan, kẹ́ḅaar mun ẹmhu, ịdipho aḍio phọ ạburude ạburude phọ anyina oruphiom bọ nyọdi.”

¹⁶Ạbuanhian kụ ụnaghan bọ ẹḍogh phọ Ẹnaan kụ oruphiom bọ nyọdi? Oomo awe phọ ạbuphe ọrol bọ Ijipt kụ aMozis ạphel bọ amitiom.

¹⁷Ẹnaan ịghagham bụanhian ologhi esi inyadi ạsia phọ? Ọdi ạghagham ologhi bụphe ọpioghom bọ kụ omeleghu bọ ẹpe ẹdala phọ omuughu.

¹⁸Mem mọ Ẹnaan eghunyian bọ mọ, “Bịdi kóḍigh aani dọl ophooghian phọ ạmi” — ọdi ạghaaph ghan ịlo ạbuanhian nụun? Ạghaaph ghan ịlo ạbuphe oruphiom bọ nyọdi.

¹⁹Bịn yira rọmiin ni mọ bịdi útue ụteeny aani dọl ophooghian phọ loor emeeraam mọ ạbidi.