Read abua Bụo aHibru 5 Bible Online

Bụo aHibru 5 - abua bible

Bụo aHibru 5

¹Oyil abiil ólho ghan dị rópogh ghan sịphe aḍita awe phọ kụ kọma mọ aghol ẹmhu ạbidi aḍighi ghan oḍighi ạngo Ẹnaan, ạngo ghan Ẹnaan inmo, ạphinyonaan ghan bịdi rịkia.

²Ịdipho ọdi rꞌaloor ọdi adugh aani bọ ni ịbadi areten, ọdi kạtuugh ni kọl kọl kụ ạtolom bụphe rọpioman ghan bọ rꞌelegheri ịyaar phọ.

³Ḅịle kẹn ịdipho ọdi rꞌaloor ọdi adugh aani bọ ni, ọdi kạ́kal ghan ịkaraph ịpe ọdi amuton, mem lọ ọdi rạpinyon rịkia phọ.

⁴Oye kụ rạ́waanaan ghan loor ọdi eghuan oḍighi aani uwo ẹmhu oyil ạrikia. Ạḍimagh phọ Ẹnaan bịn kụ reḍighi ghan oye uwo ẹmhu oyil ạrikia, ịdipho emeghenom bọ Eeron.

⁵Igina phọ ịduon phọ kẹn ni kụ ịdi aKraist kụ ụ́waanaan bọ loor phọ ọdi eghuan oḍighi uwo ẹmhu oyil ạrikia phọ. Ẹnaan kụ ịḅeni nyọdi mọ, “Nạ Ọony phọ ạmi; rodon mị mạgba aḍeenaan loor ạmi mọ mị Ọde phọ ạna.”

⁶Ẹḅile kẹn ni ẹḅem ẹnon esi mọ, “Nạ kaḍighi oyil ạrikia kꞌagee-pọ sịphe ạbaay ariil ạrikia phọ kꞌạMelkizedek.”

⁷Sịphe aghuḍum mọ ọdi sịen ade phọ, ạJizos ạaḅereghi ghan ni ạlooghi amoghi ghan, kụ ạḅaram ịlom mọ ọdi esi Ẹnaan phọ ketue bọ ẹpel nyọdi esi aḍuugh. Kụ Ẹnaan ịnaghanan ni nyọdi, ịdi eḍighi bọ ọdi asooromi ni loor ạlogh eegu.

⁸Ghạlamo rꞌịdipho ọdi aḍighi bọ ni Mọony phọ Ẹnaan bịn ạsighe ni ịminimiin phọ ọdi ạtuughaam ạmaar ọnaghanan ạḍughum.

⁹Ọdi rọkar bọ roseleman bịn aḍighi zin ạpeleeny kꞌagee-pọ phọ oomo ạbulo ọnaghanan nyọdi kọmoogh bọ.

¹⁰Kụ Ẹnaan emitiom nyọdi egananami mọ aḍighi uwo ẹmhu oyil ạrikia sịphe ạbaay ariil ạrikia phọ kꞌạMelkizedek.

¹¹Ọbo yoor ọmoogh ni ịbadi ạraraar ọghaaph ịlo oye phọ ọphon phọ, kụ ẹkpar ịikia ọḅeni anyina, ịdi eḍighi bọ ọnaghanan ạḍughum mọ anyina ghan kạphughan.

¹²Ọbo nyịidipho nyina mẹkasian ọtughemi aani ạbunon, kụ nyina edi ni nịiniin dọl dị ọnon oye kụ kịtughemi inyina ịḅel ạraraar adom mọ Ẹnaan. Nyina mẹmanam olhe eḍien kụ rẹmaam nịiniin mạmaam.

¹³Oye lọ ạmamaam kọ̋ḍua ọnhu, pọ ọbumoony ni, dị kőlhegheri ịlo eru igey rꞌịkaraph.

¹⁴Kụ bụphe mọmanam bọ ọonema olegheri ịlo eru igey rꞌịkaraph kụ role ghan eḍien lọ ẹkpar.