Read abua Bụo aHibru 7 Bible Online

Bụo aHibru 7 - abua bible

Bụo aHibru 7

¹ẠMelkizedek phọ aḍighi ọdaam ẹmha aSelem rꞌọpinyon rịkia Egbogh Ẹnaan ịikpo phọ. Ịdipho Ebraham ạḍua bọ ẹpe ẹgham mọ dị ạze bọ bụdaam mọ ratigheel, ạMelkizedek ạteeny ni nyọdi eten kụ ạngo ḍịseph.

²Ebraham adi ni oomo ạraraar phọ dị awum bọ ḍioph abin kụ ạngo nyọdi muniin abin. (Ẹḅel ẹmhu aḍien phọ ạMelkizedek rẹḅem ghan mọ “Ọdaam Aruukuan.” Ḅịle kẹn ịdipho ọdi ạda bọ Selem, ẹnon ẹmhu aḍien phọ ọdi rẹḅem ghan mọ “Ọdaam Ẹepho.”)

³Oye ólhegheri ịlo ọde rꞌonhiin ạMelkizedek, ḅịle rꞌạburude ạbidi, ḅịle rꞌịpe ọmar bọ nyọdi rꞌịlo aḍuugh phọ ọdi. Ọdi amite ịdipho Ọony phọ Ẹnaan odi raḍighi oḍighi oyil ạrikia kꞌagee-pọ.

⁴Ịduon phọ bịn nyina rẹmiin ni igbogh phọ ọdi. Ebraham ogbogh ọde phọ adi ni rạraar ibum mọ ḍioph abin ạngo nyọdi muniin abin.

⁵Iilogh phọ kụ ịḅeni bọ bụphe oḍighi bọ bụpinyon rịkia sịphe ẹemara phọ aLivai mọ awe phọ odi ghan ịlo bịdi ọmoogh ḍioph abin kụ osogh ghan muniin abin ọngo bịdi. Mọ bịdi ạanyi ghan ni iisogh phọ ịphen phọ rạghaagh iigbo phọ ạbidi, oru aani bọ ni bụo ẹemara phọ Ebraham.

⁶ẠMelkizedek kọ́nyo ẹemara aLivai, kụ ọdi ạar ri osogh phọ ọphon phọ Ebraham, kụ ạngo ḍịseph nyọpo ạar bọ ịpe Ẹnaan eguanaan bọ.

⁷Iikia ílho rolho, mọ ọlo ạngo ḍịseph kụ ạbugh ni apu nyọpo ọngo bọ ḍịseph phọ.

⁸Sịphe ịpe ariil ạrikia phọ, awe dị romugh ghan ni kụ ạanyi ghan bọ ni bin osogh phọ. Kụ ịpe ạMelkizedek, oye dị odi ghan ni, ịdipho ạḍinya iigbia phọ ẹḅem bọ, kụ ạanyi ghan bọ.

⁹Kụ esi ọghaaphom, mem mọ Ebraham asogh bọ bin osogh phọ, aLivai phọ ọpo ẹemara phọ ọdi rọbonyi ghan bọ ni bin osogh phọ osogh aani kẹn ni.

¹⁰Ọbo Livai phọ bịn kọ̋mar ri mem mọ ạmuen phọ ạMelkizedek azuan bọ Ebraham, kụ ẹnighe ghụn ọḅem mọ aLivai ạrol li ọophi Ebraham ogbogh ọde phọ ọdi.

¹¹Uḍuom ologhi ariil ạrikia ẹemara phọ aLivai kụ ọloghoḍi bọ iilogh phọ ọngo we phọ Ịzirel. Mụghumo ẹphinyonom ạrikia ariil ạrikia phọ aLivai iseleman ni, ọbo ịyaar mị́tol mun dị mukol kụ ọḅile omitiom ọnon oyil ạrikia sịphe ạbaay phọ kꞌạMelkizedek dị ụ́ḅem kẹn ni mọ ọnyo ạbaay kꞌEeron.

¹²Kụ mem lọ ẹphinyonom ạrikia phọ enmia, iilogh phọ kẹn renmia ghan ni.

¹³Kụ Ọmoogh-we phọ ayira rọkaaph ghan bọ ịphen phọ kọkpulughiom, aḍighi ni ọlo ẹnon eghunotu, ḅịle kẹn rꞌoniin ọnyo eghun ọdi kőḍighi ghan oḍighi ọphinyon ạrikia sịphe enmeny ịyaar aghuḍum mọ.

¹⁴Olegheri ni okuphom owol mọ ụmar nyọdi eghunotu aJuda, kụ aMozis ógholom aani eghunotu phọ ẹphen mem mọ ọdi ạghaaph bọ ịlo ariil ạrikia phọ.

¹⁵Ịdipho ọnon oyil ạrikia dị ạghigh Mẹlkizedek mamite bọ, ekpo ọghaaph phọ ẹphen phọ melhegheri bịn eganana.

¹⁶Eḍighinom mọ dị aḍighi bọ oyil ạrikia phọ ị́tuan ologh dị ạḅem mọ ẹemara ọpeer rꞌọpeer kụ oḍighi ghan, ịtuan ghụn ịikpo aghuḍum dị eekuna ílho.

¹⁷Ịyaar phọ eḍighi bọ ạḍinya iigbia phọ rẹḅem ghan mọ, “Nạ kaḍighi oyil ạrikia kꞌagee-pọ sịphe ạbaay ariil ạrikia phọ kꞌạMelkizedek.”

¹⁸Mokpor ogbaany ologh phọ otene ọgbal, ịdi eḍighi bọ adugh ni edughom, dị ụ́moogh mun ịyaar oḍighinom.

¹⁹Iilogh phọ aMozis ítue iḍighi ịdi rꞌeniin ịyaar eseleman. Kụ nyịidipho yira mọmoogh oḍuom ologhi dị ạnighe apu, dị yira kọtuan kụ otuman aani Ẹnaan.

²⁰Ịdi epu ịphen phọ, iikunya phọ oghunyian bọ eḍighi aani ni oboom ọgbaranaan. Mem mọ oḍighi bọ bụeri phọ bụpinyon rịkia phọ, iikunyian ị́tol,

²¹kụ oḍighi bọ Jịzos oyil ạrikia phọ ughunyian ni, ịdipho ạḍinya iigbia phọ rẹḅem ghan bọ ịlo ọdi mọ, “Ọmoogh-we phọ maghunyian kụ kánme ịitughian phọ ọdi. ‘Nạ kaḍighi ni oyil ạrikia kꞌagee-pọ.’”

²²Ịyo phọ ịphen phọ ạJizos kụ ạmeera bọ enye phọ, eḍighi kẹn ni ephigh iboom epu ịḅel phọ.

²³Ạbueri phọ ariil ạrikia phọ ạbuphe phọ uḍiza ni, ịdi eḍighi bọ oniin mamugh ghan kụ ọnon ạsighe ghan esi phọ.

²⁴ẠJizos odi ghan ni kꞌagee-pọ kụ oye kále erua oḍighi ọphinyon ạrikia phọ ọdi.

²⁵Ịduon phọ kụ iḍighi kụ ọdi atue ghan bọ ni rạpel kasiemi eekuna bụlo ọḍua esi ọdi kụ rọki ọteeny Ẹnaan. Ọdi odi ghan ni ọgba ghan ọphelom ạbidi.

²⁶ẠJizos kụ ọdo phọ uwo ẹmhu oyil ạrikia phọ ọphon phọ, dị ụgbaanyan iyira. Ọdi phọ oye aruukuan, ọpioman ọ́moogh, iipheeny óḍighi. Mọgbatan nyọdi ọsighe ogbo abuḍighinom ịkaraph opophe nyọdi opeleghom ạnyu ạke phọ.

²⁷Ọdi ráḍighi aani ghan ịdipho ạbunon aruwo ẹmhu ariil ạrikia. Ọdi ọ́moogh ịyaar ọtuan kụ ọphur ghan ọghal ịkaraph ịlo ọdi kụ ogbi ọghal ịpe ạbunon phọ kụ ọphinyon ghan ạrikia aḍio etum ḍio. Ọdi ạphighiron eniin ẹkia, mem bịn ḅeer ạmadan, mem mọ dị ạsighe bọ loor phọ ọdi aḍighinom ịyaar aghuḍum mọ.

²⁸Aruwo ẹmhu ariil ạrikia phọ ạbuphe ọtuan bọ iilogh phọ aMozis kụ ọmaaghi, uḍighi we dị úseleman; kụ uwo ẹmhu oyil ạrikia phọ ọpo ọmaam bọ ikpo ọnhu iikunyian phọ ịpe ẹsighe bọ esi iilogh phọ, pọ Ọony phọ ọpo maseleman bọ kꞌagee-pọ.