Read abua Bụo aHibru 9 Bible Online

Bụo aHibru 9 - abua bible

Bụo aHibru 9

¹Mem mọ ịḅel ịyo phọ, ụlhoghoḍi ni iilogh ịlo ooseeny ghan, ọḅile ọma esi dị awe kọtol ghan sịen ade phọ ooseeny Ẹnaan.

²Bịdi ụlogh ni ogbogo osoph rꞌogbotu dị okpiom rukpe. Ogbotu phọ ughol ghan mọ Ạdol Iigbia, kụ ọtozi phọ rꞌịdaabili phọ, rꞌạbred iigbia phọ oseere bọ ghisigh phọ Ẹnaan ịrol ghan sịphe phọ.

³Osoph phọ ughol ghan mọ Ẹphan,

⁴kụ ịsien phọ kụ ẹdi ịdaabili agol phọ ọsu ghan bọ ịnsens phọ, ḅịle rꞌizoki agol phọ ọlogh bọ mạna phọ, ḅịle rꞌịkpara phọ Eeron mẹraarogh bọ ịizughum mọ, ḅịle rꞌigbe ịyo phọ ọsighe bọ gol kụ ooteneghiom ẹphen ạnyu phọ ẹrol ghan bọ. Ologhi Igbe Ịyo phọ, ịyal phọ iiḅoghoḍi asighiigh phọ ọge bọ ọnhu ịyo phọ kụ ịrol.

⁵Ạnyu Igbe Ịyo phọ ạruukpaany aghuḍuul oḍeenaan mọ Ẹnaan edi ghan ni sịphe phọ kụ ịmeregha. Araphaaph phọ ạbidi kụ ighoph ekpereghi sịphe rọsaraghi ghan bọ ịḅaal phọ mọ egbuurogh ghẹlhe phọ Ẹnaan. Kụ ọphon kámem ọghaaphogh oomo ạraraar ọmadan.

⁶Ịduon kụ ịdi odiighi bọ oḍighi phọ ọpo phọ. Aḍio etum ḍio, ariil ạrikia phọ ụghi ghan ni sịphe ogbotu phọ ọphinyon ạrikia.

⁷Kụ uwo ẹmhu oyil ạrikia phọ bịn kụ aḍigh ghan ẹpe osoph phọ, eniin amem bịn lhạ phọ. Ọdi ạphamam ghan ịḅaal ọphighironom ẹkia phọ ọngo Ẹnaan, ọghal owophom ịkaraph phọ ịpe ọdi ḅịle rꞌịpe awe phọ úlegheri bọ kụ oḍighi yogh bọ.

⁸Kụ Uwaloor Iigbia phọ ạsighe ni ediighiom mọ ẹphen phọ ạtughemiom agananami mọ, ịdipho ogbotu phọ odi bọ ni, pọ kőghughuron ni eten ọḍua kụ oḍigh ẹpe Ẹphan phọ.

⁹Ịphen phọ ẹkpulughiom ọrugh phọ ọphon. Emeeraam mọ ịngooghineen phọ, ḅịle rꞌịnam ọphinyonom ạrikia phọ ọngo Ẹnaan, kéḍighi ịdi ologhi ọpo raaseeny bọ kaseleman.

¹⁰Ịphen phọ ẹmoogh ịyaar oḍighinom ile rꞌịpughol rꞌọdo kịrokiro ịlo ootola ghan ạmuum oselemian aloor bịn. Ịphen phọ iilogh ịsien aruzu-ạnyu phọ, dị ẹrol ghan ekoriom mem mọ Ẹnaan ẹngo bọ eḍighinom ịyaar dị ẹnighe epu ẹḅel phọ.

¹¹Kụ aKraist maru ni ịdipho uwo ẹmhu oyil ạrikia igey ạraraar phọ ịpe edi bọ nyịidipho. Ogbogo phọ dị odi bọ raḍighi oḍighi phọ ạbugh apu, ạḅile aseleman apu ọḅel phọ ọpo okpiom bọ rukpe phọ. Awe kụ ụ́logh. Ịduon phọ emeeraam mọ ólho aani sịen aḅirini phọ ọphon.

¹²Mem mọ aKraist aḍigh bọ asi Ẹphan phọ, mem bịn ḅeer ạmadan, ọdi ọ́phamam ịḅaal ịga rꞌạnmuny ạsinam ịlo ọphighironom ẹkia. Ọdi ạsighe ghụn ịḅaal phọ ịpe ọdi, kụ ụtagharanam iyira kꞌagee-pọ.

¹³Ịdipho rọsighe ghan bọ ịḅaal ịga rꞌilephiri ạsinam rꞌọoru onyugheel ạnam mọ kọsaraghiom we phọ ạbuphe mọopuan bọ loor phọ ạbidi, ịlo bịdi kowopha yogh ọḅaal,

¹⁴kụ ẹghiom ologhi mọ ịḅaal phọ aKraist keḍighi iboom ịdi epu ịphen phọ. Ạtuan Uwaloor kꞌagee-pọ phọ kụ ạsighe bọ loor phọ ọdi ạphighironom ẹkia dị eseleman ạngo Ẹnaan. Ịḅaal phọ ọdi keetolomi ni ịitughian phọ ayira esi eepua iiḍighi phọ, pịdi yira oḍighi oḍighi ọngo Ẹnaan phọ edi ghan bọ.

¹⁵Ẹmhu ịphen phọ kụ aKraist ạmeera bọ enye imoom ịyo phọ, ọbo bụphe Ẹnaan mẹmagh bọ olhe erua ạḍiseph kꞌagee-pọ phọ Ẹnaan eguanaan bọ. Kotue ni oḍighi ịphen phọ ịdi eḍighi bọ aḍiniin aḍuugh memite ọphelom awe esi ịpe bịdi ọpioman bọ sịphe ịḅel ịyo phọ.

¹⁶Eḍighi ịyaar dị oye adi erua ọdi imoom, rạraar phọ ródiighi ghan tụtu oye phọ mamugh.

¹⁷Erua lọ odi imoom ị́moogh ịyaar oḍighinom, eḍighi ịyaar dị uwo ạraraar phọ odi ni rapooghu. Rọtuan ghan ọnhu erua phọ, mem lọ oye phọ mamugh.

¹⁸Ịduon kụ iḍighi bọ ịyaar dị tụtu ịḅel ịyo phọ keḍighi ekol, ụ́bile ghan bọ ọḅaram ịḅaal.

¹⁹Ẹḅel ịyaar dị aMozis aḍighi, ọghaaph oomo phọ ịpe edi bọ pạ iilogh phọ ọḅeni awe phọ, kụ ọdi agbi ọsighe iisighom ạhisop rꞌọtogh-tọgh awul ọotoghoḍiom ịḅaal ạnmuny ạsinam mọ rꞌịga phọ ḅịle rꞌạmuum ọsaraghiom ạḍinya iilogh phọ rꞌoomo phọ awe phọ.

²⁰Ọdi ạḅem ni mọ, “Ịphen kụ ịḅaal ọkanam ezen ịyo phọ Ẹnaan mẹto bọ mọ iiko ghan phọ.”

²¹Igina phọ ịduon kẹn kụ ẹdi aMozis ạtuugh ni ạsighe ịḅaal phọ ạsaraghiom Ogbogo phọ okpiom bọ rukpe phọ, rꞌoomo ạraraar phọ ooseenyom ghan bọ Ẹnaan.

²²Ọkaraghi ọtuan iilogh phọ, ẹkigh mụdi esugha ẹnum bịn ọbo ịḅaal kụ ẹdi rọsighe ghan kowophom oomo ạraraar, ḅịle kẹn kótue ọsar ịkaraph ọbilenaan dị ịḅaal úzu.

²³Ịkpe ni owoph ịduon phọ rạraar phọ ịphen phọ eḍighi bọ oogho ọkaraghi ịpe edi bọ kꞌạke. Kụ ọkaraghi ịpe kꞌạke phọ rꞌaloor ạbidi ele ni ọphighiron ạrikia dị ẹnighe epu ịphen phọ.

²⁴AKraist ọ́ghi oḍigh Ẹphan dị awe kụ oḍighi ọghighemi ẹkaraghi egey phọ. Ọdi agheel ghụn kꞌạke, ẹpe ọdi ạtuan bọ ọgbaanaan ayira kụ ạmeera bọ egbodo phọ Ẹnaan.

²⁵Oyil abiil phọ ayira ạbuo aJu phọ rạpam ghan ịḅaal ịnam kụ kaḍighom sịphe Ẹphan phọ ạlha etum lhạ. Kụ ọlo aKraist óḍigh ịbadi amem ọsighe loor phọ ọdi ọphighironom ẹkia.

²⁶Mọ ịduon, ọbo ọdi mạmiinom ịbadi amem, emiigh kꞌamem mọ ọlhem bọ aḅirini phọ. Ọdi mamite ghụn mem bịn ḅeer ạmadan sịen aḅirini phọ rasi bọ eekuna phọ, ọsighe aloor phọ ọdi ọphighironom ẹkia ophiemiom ịkaraph.

²⁷Tọrobo oye kamugh ni mem kụ Ẹnaan egbi osophonaan ọdi ọoruen.

²⁸Igina phọ ịduon phọ kụ ẹdi ọsighe bọ Kraist ọphighironom ẹkia phọ mem bịn owophom ịkaraph aḍita. Ọdi kamite ni egaan amuneni ịyal amem ịlo ọphelom ạbuphe rokori bọ nyọdi, kị́lo owophom ịkaraph.