Read abua Jems 2 Bible Online

Jems 2 - abua bible

Jems 2

¹Bụo asiya ạmi, ịduon nyina memeeraam bọ Jịzos Kraist Ọmoogh-we phọ ayira, ọpo ạmoogh bọ eghuan phọ, képogh ghan ọolha epophe, ephogh uwekulom esooromi.

²Ịdipho oḍighom ịyaar kụ ọolha dị ạdia sugulu agol sụnugh phọ ọdi ạḅile aanmenan iinmenan dị reeloghoḍian aru aḍigh otu ạsiosi phọ anyina, kụ egina phọ amem mọ ạmuphe kụ uwekulom dị aanmenan ịfarafara arukpe aru aḍigh aani,

³kụ nyina ẹlogh eghuan ọolha phọ ẹngo nyọdi egey esi ọrol kụ ẹḅeni uwekulom mọ mọ, “Mẹera sịphe. Ẹḅeeraan nyịna, tọl oopho ude utuman ịmi,”

⁴pọ nyina medi weye ạsiosi phọ ịbam rꞌigbogh ạruuku. Nyina megbi ịkaraph arigbiom.

⁵Iiḅi asiya ạmi, ịnaghan. Ẹnaan ị́saḅar ḍịen rukulom aḅirini phọ ọphon mọ ọtuan omeeraam mọ ạbidi oḍighi rạalha, ọḅile oliom aani erua ọmar phọ dị aguanaan bọ oomo ạbuphe ọphomoghian bọ nyọdi?

⁶Kụ nyina mẹḅitonaan rukulom mọ. Nyina ítue mun ilegheri mọ ạraalha phọ kụ rịmiine bọ inyina kigbooghi ghan inyina iigbo phọ?

⁷Bịdi kụ káwe phọ rọ́gba ghan bọ mem ọghaaph ọopuom aḍiiḅi aḍien phọ ạḍiphe righol ghan bọ inyina kọgbagham?

⁸Nyina ẹkuami ghan ni eeko ọkpana ologh phọ ọpo odi bọ pạ ạḍinya iigbia phọ mọ, “Pọmoghian ọnon oye ịdipho aloor phọ ạna,” pọ nyina reḍighi ni igey.

⁹Nyina ephogh ọolha ephophe kụ ephogh uwekulom esooromi, pọ nyina mẹpioghom, ḅịle erugh miphum inyina.

¹⁰Oye lọ ạka ghạlamo rꞌoniin ologh phọ pọ masoroghu ni oomo phọ ịdi.

¹¹Ẹnaan phọ ẹḅem bọ mọ ẹmha kúle phọ kụ ịḅemom bọ ni mọ enu kụ́ko phọ. Mọ nạ ẹmha ólhe kụ nạ ạko enu, pọ nạ rasoroghu ni iilogh phọ.

¹²Imiigha loor, ọbo ẹghaaphom mọ rꞌeḍighinom ịyaar phọ anyina ẹghigh ịlo awe dị kọsighe ologh ọtanyanam mọ kụ osophom ọoruen ọngo.

¹³Ilegheri mọ oye lọ rạ́nma ghan bụnon ighirigiir, mem ịiruen phọ Ẹnaan nyọdi ighirigiir kẹ́nma. Ọnma ghan ighirigiir kụ rezuoghom ghan ịiruen.

¹⁴Bụo asiya ạmi, eeghe ạsuo kụ odianaan oye dị ạḅem mọ ọno ạmoogh ni omeeraam, kụ eḍighinom ịyaar phọ ọdi ị́ḅophan? Ọdo phọ omeeraam mọ ọpo kạpel li nyọdi ḍụghum?

¹⁵Kụ abumor odi dị eḍien rꞌoonmenemineen ụ́moogh,

¹⁶ị́kpianaan bọ ika ọḅeni ạbidi mọ, “Ẹepho rꞌedughom ịrolonaan inyina! Imuuna rukpe aloor anyina ẹghologhol! Ile ịpherogh!” dị nyina bịdi eḍien rꞌoonmenemineen ị́ngo?

¹⁷Ịduon nẹneen kụ ịdi omeeraam mọ ạrol: omeeraam dị ogey oḍighi ụ́ḅaram, pọ oomugha omeeraam dị ụ́moogh mạar oḍighinom.

¹⁸Ịdipho oḍighom ịyaar kụ ooni oye ạḅem mọ, “Nạ ạmoogh omeeraam, kụ mị ạmoogh iiḍighi,” mị kạpagharanaan mọ, “Uḍeenaan ịmi omeeraam mọ ạna dị iiḍighi ụ́ḅaram. Iiḍighi phọ ạmi kụ keḍeenaan nyịna omeeraam mọ ạmi.”

¹⁹Nạ ameeraam mọ edi bọ eniin Ẹnaan. Ii, ịduon phọ ni. Kụ aruru bịn elegheri aani ni ịphen phọ reekpeka ghan.

²⁰Opokorodom, dị nạ rạwa ni olegheri, mị kaḍeenaan ni nyịna mọ omeeraam dị iiḍighi ụ́ḅaram ọ́moogh ịyaar oḍighinom.

²¹Ẹnaan ịtuan ika kụ ẹsighe bọ Ebraham ọde phọ ayira mọ oye aruukuan phọ? Ịtuan dị ọdi ạsighe bọ Ạizik ọony phọ ọdi ạphighironom ẹkia phọ.

²²Nạ kőlhoghoma mọ omeeraam mọ rꞌeḍighinom ịyaar phọ ọdi kụ ịḅophan? Iiḍighi phọ ọdi kụ imuneniom omeeraam mọ ọdi.

²³Ịphen phọ imuneniom ịpe ạḍinya iigbia phọ ẹḅem bọ mọ, “Ebraham ameeraam ni Ẹnaan, kụ Ẹnaan ẹtuan omeeraam mọ ọdi kụ ẹsighe nyọdi mọ oye aruukuan ni,” kụ eghol mọ ọyaghiri ọno.

²⁴Tọ nyina mẹmiin mọ Ẹnaan rẹtuan ghan iiḍighi dị ẹḅaram omeeraam kụ kẹsighe mọ ọphon oye aruukuan ni, rẹ́tuan ghan omeeraam mọ bịn.

²⁵Ịduon kẹn kụ ẹdi Ẹnaan ẹsighe bọ Rehab oliom-ẹmha phọ. Ọdi ạlogh ni otu we iḅiligha ạbuo aJu phọ kụ ạma ẹnon eten aḍeenaan bịdi, ọbo bịdi okpetenaan bụo ẹpomoghian phọ ạbidi. Ẹnaan ịtuan iiḅi phọ ịphen ọdi aḍighi bọ kụ ẹsighe bọ mọ ọdi ạnir aruukuan ni.

²⁶Ịdipho aḍizu lọ uwaloor ị́moogh emugh bọ kụ ịdi omeeraam lọ igey iiḍighi ụ́ḅaram amugh aani ni.