Read abua Jems 3 Bible Online

Jems 3 - abua bible

Jems 3

¹Bụo asiya ạmi, ị́kpe dị ịbadi anyina kụ keḍighi bụtughemia, ịdi eḍighi bọ yira ạbutughemia phọ kụ ọpioman ịikpia phọ kẹbugh epu ịlo ạbunon.

²Oomo phọ ayira rọ́gba ghan mem ọpioman, kụ oye lọ raako ghan nem ọdi aseleman ni kụ katue kẹn ni ạpamaghan oomo aloor phọ ọdi.

³Yira ọsighe ghan igbaḅiri rọkasiom ọnhu ạsu, ọbo ameera ghan anyeene ekpisi lọ yira rọwa ọghi.

⁴Ọsighe aani ọdeghedeghe oghuugh dị oghim rạpiphoghom kụ ọmaam. Ọtolom eti phọ ạsighe ọpeḅere ọlhom bịn kapiph ni oghuugh phọ ạkiom ekpisi lọ ẹḅeeraan nyọdi.

⁵Ịduon phọ kẹn kụ ịdi anem oye ẹrol. Ekom ni igey, kụ ọghaaph ogbogh ogbogh. Ịitughian elegheri mọ aḍighiil anem ạnian ketue ni ele ọnuza eboom ẹekpua.

⁶Anem oye ẹkigh nịan. Ịkaraph bịn kụ imuza loor ọdi. Anem mọ kụ ọkaraghi esi aloor phọ rẹsighe ghan bọ ịkaraph keleenye oomo phọ oye phọ. Ạnian phọ ẹḍua ẹpe ooni ạnian phọ rẹdaph ghan nem kụ kẹsuughi oomo areten aghuḍum mọ ayira.

⁷Awe kotue ni ọtughemi ọpoomi kụ mọphoomi ni tọrobo ẹnam, rꞌẹnun, rꞌena, rꞌẹlo rekuura.

⁸Kụ oye ólho dị marue aako nem ọdi. Anem ẹmoogh ịka rꞌọphueghi ạraraar. Reḅeleghu ghan oḍighi yogh ịkaraph.

⁹Eeni amem yira rọsighe ghan nem koboomiom Ọmoogh-we Ọde phọ ayira; eeni amem kootuunyiom bụnon awe dị Ẹnaan ẹlhem ni ẹghighima aani.

¹⁰Ikpo ọnhu ạḍiseph rꞌikpo ọnhu iitunyian ẹḍua ghan ni pạ oniin phọ ọnhu phọ kụ remite. Bụo asiya ạmi, ịphen kímite ghan!

¹¹Nyina mẹmiin ghan ni dị oniin phọ aghuḍia phọ kụ amitiom mụudugha rꞌamughiḍim ghiḍim ạmuum ḍụghum?

¹²Bụo asiya ạmi, oreeny-ạfig kőmuum ghan ọliv, oozin avain kőmuum ghan fịg. Ạmuum ạla ráḍighi ghan mụbo.

¹³Mọ uwo ologhi odi ni ogbo phọ anyina, pọ aḍeenaan esi egey ẹrolom rꞌosooromi aloor sịphe iiḍighi olegheri ịyaar phọ ọdi!

¹⁴Kụ eḍighi mạar dị nạ ạmoogh ologhi ẹḍim rꞌịkaagh, pọ káḅom ẹmhu ạkaaph ịlo ọphuenom igey phọ.

¹⁵Ọdo olegheri ịyaar phọ ọphon, ọlo ịsien aḅirini phọ, ọ́ḍua ẹpe kꞌạke kụ aru; ọlo Eru, kọ́lo Uwaloor Iigbia phọ.

¹⁶Esi lọ ologhi ẹḍim rꞌịkaagh edi, ọgbaragbara rꞌịkaraph kịrokiro kụ rẹtol ghan.

¹⁷Esi omiighom, ịyaar rẹ́biph ghan olegheri ịyaar phọ ọpo ạḍua bọ kꞌạke kụ aru, ḅịle kẹn sighiton rạ́wa ghan. Rạnma ghan ghụn ighirigiir kạmoogh eeḅi ẹzo rꞌigbiririph, kụ kamuum iimuma igey iiḍighi. Ọ́moogh ịiseeny rꞌọkulakula ologhi.

¹⁸Kụ bụphe ọphomoghian bọ ẹepho roḅeph ghan ẹepho kụ kobugha ruukuan.