Read abua 1 Pita 4 Bible Online

1 Pita 4 - abua bible

1 Pita 4

¹Ịdipho aKraist ạmiinom bọ sịphe iphulupul phọ, ịsighe iniin phọ ịitughian phọ ịphen kụ ẹkparamiom loor phọ anyina, ịdi eḍighi bọ oye lọ mạmiinom sịphe iphulupul phọ, pọ masoph oḍigh ịkaraph akpere.

²Riiḍio phọ ịpe isughanaan bọ inyina sịen ade phọ, kẹ́tuan mun rụuphua iphulupul phọ, ịtol ghụn dọl phọ ạḍiphe ẹḅeeraan bọ Ẹnaan.

³Amem mọ nyina ephiemi bọ oḍighi yogh ịpe ạbuo aruru phọ mẹkasian ni. Nyina ịrol dọl ipesi, rꞌịkaraph ạruuphua, rꞌọoko amiim, rꞌiipheeny, rꞌịpughol, rꞌọoḅereghi aruru oḍighi yogh ịlo úḍighi ghan.

⁴Kụ nyịidipho eḍighi ni iikia esi ạbuo aruru phọ, bịdi rọ́miin mun bọ dị nyina ẹḅile ẹḅophoghan bịdi relhe uruur phọ, ḅịle reḍighi yogh iipheeny phọ, kụ rironyon ghan bọ inyina.

⁵Kụ bịdi kọkaaph ni ịpe bịdi oḍighi bọ oḍighi phọ ọḅeni nyọpo ạmeera bọ ni oogbo ịiruen ọngo ạbuphe odi bọ rꞌạbuphe momuughu bọ.

⁶Ụtuan eeghe kụ ọghaaph bọ ni ooḅi ọghaaph phọ ọḅeni bụphe momuughu bọ? Ụtuan mọ mọsighe bọ ḍuugh phọ ạḍiphe etuura bọ esi oomo awe kụ ọliomom iphulupul phọ ạbidi, aruwaloor phọ ạbidi ẹmoogh aani ọdo phọ aghuḍum mọ Ẹnaan.

⁷Eekuronom oomo ạraraar mẹkpulan, kụ isereghian emiigha loor kụ ẹeḅereghi ghan.

⁸Ịdi epu oomo ạraraar, oniin ạphomoghian oniin, ịdi eḍighi bọ ẹphomoghian kụ reekpereghi ghan ịbadibadi ịkaraph!

⁹Oniin ạlogh ghan nyoniin otu, kụ kúgum ghan!

¹⁰Tọrobo ọnyo anyina ạmaar ghan ạpham ruunmo aruwaloor lọ Ẹnaan ẹngo nyọdi, kụ aḍighinom ghan ịdi kẹngo sụo bụeri phọ!

¹¹Oye lọ ẹngo ọghaaph, alegheri mọ Ẹnaan kụ ịlogh ni nyịno ọghaaph ghan ikpo ọnhu phọ ọdi! Oye lọ ẹngo ọloghonaan ạḍighaagh bụnon, alegheri mọ ọno ạsighe ni ịnyaam mọ Ẹnaan kụ raḍighinom, pịdi esi oomo ạraraar oghol ghan Jịzos Kraist oboomi Ẹnaan! Igbogh phọ rꞌịikpo phọ ịlo ọdi ni kꞌagee-pọ kꞌagee-pọ! Ẹrol li ịdipho!

¹²Iiḅi asiya, eephina ạnian ịminimiin phọ nyina rẹmiinom bọ kíḍighi iikia esi anyina, mụdi ịdi ologhi úḍuom mọ kemite!

¹³Kụ iboh ghan iboh ịdipho nyina repin aani bọ bin ịminimiin phọ aKraist, pịdi nyina ebo aani, ẹmoogh ọḅaal ologhi, mem mọ kogananami bọ igbogh phọ ọdi.

¹⁴Ọtuan ḍien phọ aKraist kụ ironyon inyina, pọ iboh kꞌẸnaan kịrolonaan ni inyina, ịdi eḍighi bọ Uwaloor Igbogh phọ, ọpo Ẹnaan, misoorom inyina.

¹⁵Rꞌoniin ọnyo anyina kúkol ọko enu rꞌomi imi rꞌosereghi asighiton rꞌoḅiligha ạsidol ạbunon kụ ạmiinom!

¹⁶Kụ ọlo umugholoor kúsiph oye lọ aghol Kristen kụ rạmiinom, ọdi aghola ghan ni ḍien phọ ạḍiphe phọ aboomiom Ẹnaan!

¹⁷Amem omiigh ịiruen phọ mẹteeny kụ komiighom we phọ Ẹnaan. Eḍighi ịyaar dị ọdi umiighom iyira ịiruen phọ, kẹtolonaan ika nụun bụphe úmeeraam bọ ooḅi ọghaaph phọ Ẹnaan?

¹⁸Ịdipho ạḍinya iigbia phọ rẹḅem ghan bọ mọ, “Rꞌoye aruukuan bịn kụ ạkpar bọ ni ọphel otene, kụ ẹghiom ologhi buḍighinom ịkaraph phọ rꞌạbuphe Ẹnaan úlegheri bọ?”

¹⁹Loor ịphen phọ, bụphe ọtuan bọ ịpe Ẹnaan rẹwa bọ kụ rọmiinom bọ, oḍighi ghan igey, ọḅogh ruwaloor phọ ạbidi ọlogh ḍịghaagh Ọlemia phọ raḍighi ghan bọ ni ịlo dị aguanaan!