Read abua 2 Pita 1 Bible Online

2 Pita 1 - abua bible

2 Pita 1

¹Mị aSaimon Pita, ọnyo oḍighi rꞌotelhedom mọ ạJizos Kraist, kụ ụge ḍịnya phọ ạḍien riruomaan inyina ạbuphe mẹtuan bọ ruukuan phọ ạJizos Kraist Ẹnaan rꞌỌpelia phọ ayira, ẹmoogh aani omeeraam dị mạman ịyaar aalenyan nyọon ayoor.

²Ooḅi ọghor rꞌẹepho, ẹtuan olegheri Ẹnaan rꞌạJizos Ọmoogh-we phọ ayira, ẹbalabala ịrolonaan inyina!

³Ịdipho yira molegheri bọ nyọpo ụmagh bọ iyira ophin aani abin igbogh phọ rꞌiiḅi ạroozo phọ ọdi, ịikpo phọ Ẹnaan mịngo iyira oomo ạraraar phọ ịpe kẹgbaanyan bọ ghuḍum mọ rꞌạdol aruukuan phọ ayira.

⁴Ịduon phọ, pọ muguanaan iyira iboom aruguan dị ẹman ịyaar ịikia, pịdi nyina ekpetenaan ịḅoria ạroozo phọ rẹdaph ghan bọ ịkaraph ạruuphua aḅirini phọ, ẹmoogh aani rọozo phọ Ẹnaan.

⁵Loor ẹmhu ekpo phọ ẹphen phọ, ịkparami ḍịghaagh ẹmoogh iiḅi ạroozo ẹḅaram omeeraam mọ anyina, ẹmoogh olegheri ịyaar ẹḅaram iiḅi ạroozo phọ,

⁶ẹmoogh omiighe aloor ẹḅaram olegheri ịyaar phọ, ẹmoogh ọkparam ẹḅaram omiighe aloor phọ, ẹmoogh ruukuan ẹḅaram ọkparam mọ,

⁷ẹmoogh igbiririph ẹḅaram ruukuan phọ, ẹmoogh ẹphomoghian ẹḅaram igbiririph phọ.

⁸Ịphen kụ ạroozo phọ ịkpianaan bọ inyina, kụ nyina ẹmoogh ni ẹbalabalami, pọ, ịdipho nyina elegheri bọ Jịzos Kraist Ọmoogh-we phọ ayira rẹkiom ghisigh, aloor phọ anyina kẹkologhol li, nyina emuum kẹn igey iimuma.

⁹Kụ oye lọ rọozo phọ ịphen phọ ụ́moogh, pọ ariḍien ọdi íḅaranu dị ọdi rạmiin iigho, mawulanam kẹn mọ mọogbirion igbaany ịkaraph phọ ọno.

¹⁰Loor ịphen phọ, bụo asiya, ịkururu ni ẹephaghami ghan oḍuom ologhi phọ mọ Ẹnaan mịmagh inyina ẹsaḅar ẹsighe. Kụ nyina eḍighi ghan ịphen phọ, nyina képe oopho esi.

¹¹Ẹnaan kẹtuan ịphen phọ kụ ịngo inyina eboom eghuan oḍighom rꞌẹwoor ọmar kꞌagee-pọ phọ ạJizos Kraist Ọmoogh-we rꞌỌpelia phọ ayira.

¹²Kụ esi ịduon phọ, mị rạ́akpukian ọghiom ghan anyina ologhi, ghạlamo ịdipho nyina melhegheri bọ ni ịphen phọ etene igbaany, ẹḅile ẹkua phạghaphagha sịphe igey phọ nyina mẹnaghan bọ.

¹³Mị ạatughian mọ ịkpianaan ni ịmi, sịen mị odi bọ ni rapooghu, ọghiom ghan anyina ologhi rạraar phọ ịphen phọ, ịlo ọghologholomiom aloor anyina,

¹⁴ịdi eḍighi bọ mị alegheri ni mọ mọony amem kọmagh ni uwaloor phọ ạmi ọsighe, ịdipho ạJizos Kraist Ọmoogh-we phọ ayira ạghaaph bọ ni amitiom ụḅeni ịmi.

¹⁵Mị kạkparami ghụn ḍịghaagh oḍighi ịlo mem dị mị amugh nyina kẹetughian ghan rạraar phọ ịphen oomo amem.

¹⁶Yoor ụ́sighe emooph ayoor ụkpasiom ọgba iphirigba kụ ọḅeniom anyina ịlo ịikpo phọ rꞌerumom mọ ạJizos Kraist Ọmoogh-we phọ ayira. Yoor ụsighe ni riḍien ayoor ọmiinom igbogh phọ ọdi.

¹⁷Yoor ụrol li sịphe, mem mọ Ẹnaan Ọde phọ ẹngo bọ nyọdi eghuan phọ rꞌigbogh phọ, mem mọ ẹḍogh phọ ẹḍua bọ kꞌEekuna Igbogh phọ kụ ẹghaaph bọ ẹḅeni nyọdi mọ, “Ọphon phọ kụ ogina Ọony ạmi dị mị ạphomoghian, ọpo ạkar bọ ụḅeeraan ịmi iboom.”

¹⁸Yoor rꞌaloor ayoor ụnaghan aani ni ẹḍogh phọ ẹphen ẹḍua bọ kꞌạke kụ ẹghaaph bọ, mem mọ yoor rꞌạJizos ọrol bọ sịphe ạnyu eegum iigbia phọ.

¹⁹Esi ayoor, oomo phọ ịphen phọ ịkparamiom ghan dom mọ ariil phọ Ẹnaan ogbeelom ghan bọ. Ẹkpianaan ni dị nyina keler rụru ẹnaghanan, ịdi eḍighi bọ ẹkigh ịdipho ọtozi dị asoor esi ufiri, tụtu ạḍiroor phọ ẹḅaal kụ ẹenaan ạḍiroor phọ ẹmhu sịphe iloghi phọ anyina.

²⁰Ịdi epu ghụn ni oomo phọ ịdi, ịitughian ịphen: mọ oye rꞌaloor ọdi ólho dị katue ạgba ẹmhu oniin ọkal ịpe Ẹnaan egananami bọ kụ ọge bọ sịphe Ạḍinya Iigbia phọ,

²¹ịdi eḍighi bọ ọkal ịpe ogananami bọ dị ạḍua ịitughian awe kụ amite ólho. Uwaloor Iigbia phọ ghụn ni kụ ạsiiny ghan we mem mọ bịdi ọghaaph ghan bọ dom mọ Ẹnaan erom bọ.