Read abua 1 Jọn 2 Bible Online

1 Jọn 2 - abua bible

1 Jọn 2

¹Ịbam ạnmuny ạmi, mị ạge ịphen phọ riruomaan inyina, ọbo nyina ẹwile oḍighi ghan ịkaraph; kụ ọlo aḍighi ịkaraph, yira ọmoogh ni oye dị ạmeera enye ọgba ọphelom ayira ghisigh Ọde phọ. Ọphon phọ ạJizos Kraist, oye aghuḍuul phọ.

²Ịdi eḍighi bọ aKraist rꞌaloor ọdi kụ ọmur rꞌiphorobo dị owophom ịkaraph phọ ayira ọsighe. Úwoph ịkaraph phọ ayira bịn, owoph kẹn ni ịkaraph oomo aḅirini phọ.

³Oye lọ raako ghan iilogh phọ Ẹnaan aḍuom ni ologhi mọ ọno alegheri ni nyọdi.

⁴Oye lọ ráako ghan iilogh phọ Ẹnaan kụ ạḅem mọ ọno alegheri ni Ẹnaan pọ rakue ni. Igey nyọdi ílhoonaan.

⁵Oye phọ ọpo rạnaghanan ghan bọ ọghaaph phọ Ẹnaan raḍeenaan ghan mọ ọno ạpomoghian ni nyọdi ạmadan. Ịduon kụ ịdi yira koḍuom ologhi mọ yira ọmoogh ni mụḅoph rꞌọdi:

⁶oye phọ ọpo rạḅem ghan bọ mọ ọno ạḅophoghan ni Ẹnaan ạtuugh dọl phọ ạḍiphe ạJizos Kraist ạrol ghan bọ kụ ạrol aani!

⁷Iiḅi asiya, ọphon mị ạge bọ riruomaan inyina kómoom ologh: ogina phọ ogbaany ologh phọ ọpo ọlogh bọ ni ịngo inyina kꞌẹḅel emiighom mọ. Aḍiniin phọ adom mọ ạḍiphe nyina mẹnaghan bọ ni.

⁸Kụ ọlo ọphon mị rạge bọ, omoom ologh ni dị aganana sịphe ạroozo phọ aKraist rꞌịpe anyina, mọ ufiri phọ rạḍua kụ aḍigey ạḍiḅaal phọ memiigh osoor.

⁹Oye lọ ạlogh ḍien ọnyo asiya ọdi kụ rạḅem ghan mọ ọno odi ni ẹku ạḍiḅaal, pọ odi ni ẹku ufiri kꞌạnyiidipho.

¹⁰Oye phọ ọpo ạphomoghian bọ ọnyo asiya phọ ọdi odi ẹku ạḍiḅaal, ḅịle káḍighi ịdi ọnon oye kameel aḍighanaan ịkaraph.

¹¹Kụ ọpo ạlogh bọ ḍien ọnyo asiya phọ ọdi, pọ odi ni ratelhe yogh ẹku ufiri. Ọdi ólhegheri ekpisi lọ ọdi rạki, ịdi eḍighi bọ ufiri phọ mạaḅaghami riḍien ọdi.

¹²Ịbam ạnmuny, mị ạge riruomaan inyina, ịdi eḍighi bọ mọtuan ḍien phọ aKraist ọsar ịkaraph phọ anyina ịwilenaan inyina.

¹³Bụrude, mị ạge riruomaan inyina, ịdi eḍighi bọ nyina elegheri ni nyọpo odi ghan bọ ni kꞌẹḅel emiighom mọ. Ugheel ạnmuny, mị ạge riruomaan inyina, ịdi eḍighi bọ nyina mẹkpar epu Eru.

¹⁴Mị ạge riruomaan inyina ạnmuny phọ, ịdi eḍighi bọ nyina elegheri ni Ọde phọ. Mị ạge riruomaan inyina ạburude phọ, ịdi eḍighi bọ nyina elegheri ni nyọpo odi ghan bọ ni kꞌẹḅel emiighom mọ. Mị ạge riruomaan inyina ugheel ạnmuny phọ, ịdi eḍighi bọ nyina ẹmoogh ni ịnyaam. Ọghaaph phọ Ẹnaan odi ghan ni iloghi phọ anyina kụ nyina mẹkpar epu Eru.

¹⁵Kẹ́pomoghian dọl aḅirini phọ rꞌạraraar phọ ọdi. Nyina ẹphomoghian dọl aḅirini phọ, pọ nyina ị́moogh mun ẹphomoghian Ọde phọ sịphe iloghi phọ anyina.

¹⁶Ạraraar aḅirini phọ, pọ ạruuphua kịrokiro, rꞌephogh-aḍien, rꞌobaga. Rꞌeniin ịphen phọ rẹ́ḍua ghan esi Ọde phọ kụ keru. Ịphen phọ ịlo ịsien aḅirini phọ bịn.

¹⁷Aḅirini phọ rꞌoomo ạruuphua phọ ọdi rape, kụ oye phọ ọpo raḍighi ghan bọ ịpe Ẹnaan rẹwa bọ kạtol li kꞌagee-pọ.

¹⁸Nmụny phọ, eekuna phọ rẹteeny. Ịḅeni ni inyina mọ Ạmulogh-ḍien aKraist katu ni, kụ nyịidipho ịbadi ạbumulogh-ḍien aKraist momite oganana kụ yira mọsighe bọ olegheriom mọ eekuna phọ rẹteeny.

¹⁹Awe phọ ạbuen phọ rꞌayira ụ́karaghi ụḅoph oghuugh. Ịduon kụ iḍighi kụ bịdi ụgbatanaan bọ iyira. Mọ bịdi rꞌayira ụḅoph ni oghuugh, ọbo mụrolan ni iyira. Kụ bịdi ụgbatanaan pịdi ọkar ọmiin mọ rꞌoniin ọnyo ạbidi rꞌayira ụ́ḅoph oghuugh.

²⁰Anyina anyina, oye aghuḍuul phọ mịngo ni inyina ịikpo Uwaloor Iigbia phọ, kụ oomo phọ anyina melhegheri igey phọ.

²¹Mị ụ́tuan ịdi nyina ílegheri igey phọ kụ rạge bọ, mị ụtuan ghụn ịdi nyina elegheri ni ḅịle kẹn mọ ọkpe rạ́ḍua ghan esi igey kụ kamite.

²²Ạnhian kụ ọgbaam ọkpe phọ? Oye phọ ọpo rạḅem ghan bọ mọ ạJizos kụ káKraist phọ. Ọphon phọ kụ Ạmulogh-ḍien phọ aKraist. Ọdi maghel Ọde phọ rꞌỌony phọ,

²³ịdi eḍighi bọ tọrobo oye lọ ạpharanaan Mọony phọ ólhoonaan aani Ọde phọ, kụ oye phọ ọpo ạloghoma bọ Mọony phọ odianaan ni Ọde phọ.

²⁴Imiigha loor ẹmaar ẹsighe dom mọ nyina mẹnaghan bọ kꞌemiighom mọ eseerian iloghi phọ anyina. Kụ nyina eseerian ni ịpe nyina mẹnaghan bọ kꞌemiighom mọ sịphe iloghi phọ anyina, pọ nyina kẹtolan ni Mọony phọ rꞌỌde phọ.

²⁵Aghuḍum kꞌagee-pọ kụ ịdi aKraist rꞌaloor ọdi aguanaan bọ ọngo ayira.

²⁶Ịphen mị rạge bọ ẹkpulughiom bụphe rọwa ghan bọ ookeleghi anyina.

²⁷Anyina anyina, aKraist mịngo ni inyina ịikpo Uwaloor Iigbia phọ. Kụ ịdipho ịikpo Uwaloor Iigbia phọ edi bọ ni loor phọ anyina, ị́kpianaan mun dị oye kụ kạḅile ghan ịtughemi inyina, ịdi eḍighi bọ Uwaloor Iigbia phọ kụ rịtughemi ghan bọ inyina ịlo oomo ạraraar. Kụ ịpe ọdi rịtughemi ghan bọ inyina ọkar igey ni, ọkpe óloom. Ịnaghanan ghan ịtughemi Uwaloor Iigbia phọ, bịn ẹrolan ghan Kraist.

²⁸Ịbam ạnmuny ạmi, ịtolan ni nyọdi, ọbo mem mọ ọdi kamite bọ aganana yira ọmoogh oḍuom ologhi ịdi yira kọ́booghian loor umugholoor ḍio phọ ọdi katu bọ.

²⁹Nyina elegheri ni mọ aKraist oye aruukuan ni. Ilegheri aani mọ tọrobo oye lọ raḍighi ghan ịpe ẹkpianaan bọ, pọ mọmar ọḅile ọmar.