Read abua 1 Jọn 3 Bible Online

1 Jọn 3 - abua bible

1 Jọn 3

¹Ịmiin eboom ẹphomoghian ịdi Ọde phọ ụphomoghian iyira. Ẹphomoghian phọ ọdi ẹbugh ni iboom dị mọtuan ughol iyira mọ ạnmuny Ẹnaan — kụ ịduon phọ ọkar igey ni. Aweye aḅirini phọ iyira úlegheri, ịdi eḍighi bọ bịdi Ẹnaan úlegheri.

²Iiḅi asiya, nyịidipho yira ạnmuny Ẹnaan, kụ ọlo ke̋mite eganana ọdo awe lọ yira kotu. Ịphen kụ ịdi yira molegheri, mọ mem mọ aKraist kamite bọ aganana yira kọmoogh aani ni rọozo phọ ọdi, ịdi eḍighi bọ yira kọmiin ni nyọdi ọmadan.

³Kụ tọrobo oye lọ ạmoogh oḍuom ologhi phọ ọphon esi aKraist, pọ raselemian loor oseleman ịdipho aKraist.

⁴Tọrobo oye lọ raḍighi ghan ịkaraph, pọ masoor ologh phọ Ẹnaan. Oḍighi yogh ịkaraph, pọ osoroghu iilogh.

⁵Nyina elegheri ni mọ aKraist aru aganana ịlo ogbuurogh ịkaraph phọ awe. Ịkaraph ílho ghan loor ọdi.

⁶Kụ tọrobo oye lọ odianaan Kraist ráḍighi yogh ghan ịkaraph. Tọrobo oye lọ raḍighi yogh ghan ịkaraph, pọ nyọdi kọ̋miin ghan, ḅịle kẹn kőlhegheri.

⁷Nmụny phọ, kémeera mọ oye iikeleghian inyina. Oye lọ raḍighi ghan ịpe ẹkpianaan bọ, pọ oye aruukuan ịdipho aKraist.

⁸Oye lọ raḍighi yogh ghan ịkaraph, pọ ọlo kꞌEru, ịdi eḍighi bọ Eru phọ iḍighi yogh ni ịkaraph kꞌẹḅel emiighom mọ. Ophiemi iiḍighi phọ Eru kụ ẹmhu ịdi Ọony phọ Ẹnaan ạtuan bọ aru aganana.

⁹Tọrobo oye lọ mọmar ọḅile ọmar ráḍighi yogh ghan ịkaraph, ịdi eḍighi bọ ạroozo phọ Ẹnaan edi ni loor phọ ọdi. Ịdipho kẹn Ẹnaan kụ maḍighi bọ Ọde ọdi, ọdi kámighirom aḍighi yogh ịkaraph.

¹⁰Ịduon kụ ịdi kọmiin ọgbaranaan dị odi esi ạnmuny phọ Ẹnaan rꞌạnmuny phọ Eru: oomo ạnmuny phọ Ẹnaan roḍighi ghan ịpe ẹkpianaan bọ, ḅịle kẹn rọpomoghian ghan bụo asiya ạbidi. Ạnmuny phọ Eru úlho ghan dọl phọ ạḍien.

¹¹Kꞌẹḅel emiighom mọ ḍịen kụ adom mọ nyina ẹnaghan bọ, mọ oniin ạphomoghian ghan nyoniin,

¹²kụ́tol dọl phọ aKen. AKen aḍighi ọlo kꞌEru kụ aghiigh bọ mọony-onhiin phọ ọdi. AKen aghol eeghe kụ ạko bọ enu phọ? Ọdi aḍighi ghan ịkaraph kụ ạghagh ologhi mọ ọony onhiin phọ ọno ạtuan eeghe kụ raḍighi igey.

¹³Bụo asiya, aweye aḅirini phọ ịlogh inyina ḍien, kíḍigh iikia esi anyina.

¹⁴Ịdipho yira ọphomoghian bọ bụo asiya phọ ayira, yira olegheri ni mọ yira mọwile ḍuugh ọḅeeny oḍigh ghuḍum. Kụ tọrobo oye lọ ẹphomoghian ụ́moogh, pọ odi ni ḍịghaagh aḍuugh.

¹⁵Tọrobo oye lọ ạlogh ḍien ọnyo asiya ọdi, pọ ọokom-enu, kụ nyina elegheri ni mọ aghuḍum kꞌagee-pọ ólho ghan ologhi ọokom-enu.

¹⁶Ịdipho aKraist ughol bọ iyira kụ ạkuom bọ loor phọ ọdi ḍuugh kụ ịdi yira olegheriom bọ ịyaar dị ẹphomoghian eru. Yira phọ kẹn ọkpe ni oghol asiya phọ ayira ọkuom aani aloor phọ ayira ḍuugh.

¹⁷Oye lọ ạmoogh ẹelha kụ ạmiin dị ekuom ọnyo asiya ọdi kụ abigh ni ekpom aḅoorian, ika kụ ẹdi ọdi kaaka bọ mọ ẹphomoghian phọ Ẹnaan edi ni sịphe ologhi phọ ọdi?

¹⁸Ịbam ạnmuny, kụ́pomoghian ghan ẹphomoghian ọnhu rꞌọnhu; eḍighi ghụn egey ẹphomoghian dị kọmiin ghan sịphe eḍighinom ịyaar phọ ayira!

¹⁹Ịphen phọ kụ ịdi yira kolegheriom mọ igey phọ kụ iḍiemiom iyira. Ịphen kụ ịdi yira kọmoogh oḍuom ologhi ghisigh Ẹnaan,

²⁰mem lọ iloghi phọ ayira ị́po, ịdi eḍighi bọ Ẹnaan ẹbugh ni epu iloghi phọ ayira, ẹḅile elegheri oomo ạraraar.

²¹Iiḅi asiya, eḍighi ịyaar lọ iloghi phọ ayira ẹpho ni, pọ yira mọmoogh oḍuom ologhi ghisigh Ẹnaan.

²²Tọrobo ịyaar lọ yira ọlom, ọdi rạngo ghan ni, loor esi dị yira rooko ghan ni iilogh phọ ọdi koḍighinom ghan ịpe ẹḅeeraan bọ nyọdi.

²³Ịphen kụ iilogh phọ ọdi, mọ yira omeeraam ḍien phọ ạJizos Kraist Ọony phọ ọdi, ḅịle oniin ạphomoghian nyoniin, ịdipho aKraist ạto bọ ụḅeni iyira.

²⁴Kụ oye lọ raako ghan iilogh phọ Ẹnaan, pọ odianaan Ẹnaan, Ẹnaan ẹḅile edianaan nyọdi. Ịdipho ọdi mụngo bọ iyira Uwaloor Iigbia phọ kụ ịdi yira olegheriom bọ mọ Ẹnaan idianaan iyira.