Read abua 1 Jọn 5 Bible Online

1 Jọn 5 - abua bible

1 Jọn 5

¹Tọrobo oye lọ ameeraam mọ ạJizos kụ aKraist phọ ni, pọ ọlo kꞌẸnaan ni; kụ tọrobo oye lọ ạphomoghian ọde phọ ạpomoghian aani ni mọony phọ.

²Ọphomoghian Ẹnaan rꞌooko ghan iilogh phọ ọdi kụ ịdi yira kolegheriom mọ yira ọpomoghian ni nmụny phọ ọdi.

³Ooko ghan iilogh phọ ọdi kụ reḍeenaan ghan mọ yira ọpomoghian ni Ẹnaan. Ḅịle kẹn iilogh phọ ọdi ị́imor ooko,

⁴ịdi eḍighi bọ tọrobo ọlo kꞌẸnaan rạkpar ghan ni kapu ịikpo aḅirini phọ. Omeeraam mọ ayira kụ raḍighi ghan bọ ịdi yira rọkpar ghan bọ kopu ịikpo aḅirini phọ.

⁵Ọpo ameeraam bọ mọ ạJizos kụ Ọony phọ Ẹnaan ni bịn kụ rạkpar ghan bọ kapu ịikpo aḅirini phọ.

⁶ẠJizos Kraist kụ oye phọ ạḍua bọ kꞌạke aru. Owura ạmuum mọ rꞌịḅaal phọ ọdi azu bọ kụ ịyal ạraraar dị eḍeenaan ịphen phọ. Ụ́tuan owura ạmuum mọ ọdi bịn, ụḅaram ni ịḅaal phọ ọdi azu bọ kụ awe olegheri bọ ọdo oye dị ọdi aru. Uwaloor Iigbia phọ kẹn kụ ẹnon eḍeenaan dị ẹkpe omeeraam, ịdi eḍighi bọ ọdi kụ ragananami ghan igey phọ kaḍeenaan we.

⁸Uwaloor Iigbia phọ rꞌowura ạmuum mọ rꞌịḅaal phọ ạJizos azu bọ kụ ịraar areḍeenaan dị ọsighe bọ olegheriom ọdo oye dị ạJizos Kraist aru. Areḍeenaan phọ ịphen ẹḅoph ni ọnhu.

⁹Ịdipho yira romeeraam ghan bọ ni ịlo awe ọghaaph, ịkiom ologhi ịdi yira komeeraam aani ghan ịlo Ẹnaan ẹghaaph, ịdi eḍighi bọ ịraar phọ areḍeenaan phọ ịḍua ni kꞌẸnaan kụ eru, kụ riḍeenaan ghan bọ iyira mọ ạJizos Ọony phọ ọdi ni.

¹⁰Oye phọ ọpo ameeraam bọ Mọony phọ Ẹnaan ạmoogh ni oḍuom ologhi phọ ọphon sịphe ologhi phọ ọdi. Kụ oye lọ úmeeraam, pọ mạlhogh Ẹnaan ọkpe, ịdi eḍighi bọ ọdi ómeeraam reḍeenaan phọ Ẹnaan ẹngo bọ ịlo Ọony phọ ọdi.

¹¹Ịphen kụ ịlo oḍeenaan phọ: mọ Ẹnaan mịngo iyira ghuḍum kꞌagee-pọ, kụ Ọony phọ ọdi kụ azin aghuḍum mọ ạkuen yira mọmoogh bọ.

¹²Ọlo odianaan Mọony phọ ọdi rạmoogh ghan ni ghuḍum; kụ ọlo úlhoonaan Mọony phọ Ẹnaan rạ́moogh ghan ghuḍum.

¹³Mị ạge ịphen phọ riruomaan inyina phọ ạbuphe omeeraam bọ ḍien Ọony phọ Ẹnaan, pịdi nyina elegheri mọ nyina ẹmoogh ni ghuḍum kꞌagee-pọ.

¹⁴Kụ ọphon kụ oḍuom ologhi phọ yira ọmoogh bọ ghisigh Ẹnaan: mọ tọrobo ịyaar lọ yira oghol ịpe ọdi rạwa bọ kụ ọlom, ọdi rụnaghanan ghan ni iyira.

¹⁵Ọdi rụnaghanan ghan ni iyira, tọrobo ịyaar lọ yira ọlom nyọdi. Ịduon yira molegheri bọ ịphen phọ, yira ọḅile ni olegheriom mọ yira mọmoogh ni ịpe yira ọlom bọ nyọdi.

¹⁶Oye lọ ạmiin ọnyo asiya ọdi lọ aḍighi ịkaraph dị ítu ịlo aḍuugh-aḍuugh ạaḅereghinaan ghan ịdi Ẹnaan kẹngo nyọdi ghuḍum! Ịphen phọ ẹkpulughiom bụphe ịkaraph phọ ạbidi ítu bọ ịlo aḍuugh-aḍuugh. Ịkaraph aḍuugh-aḍuugh edi ghan ni kụ mị ratoma ghan mọ kékol ghan ọdo ịkaraph phọ ịphen ẹeḅereghinaan ọnyo asiya anyina.

¹⁷Tọrobo ọpioman pọ ịkaraph ni; kụ ịkaraph edi ghan ni dị íḍighi ịlo aḍuugh-aḍuugh.

¹⁸Yira olegheri ni mọ ọlo mọmar ọḅile ọmar dị raḍighi yogh ghan ịkaraph ólho, ịdi eḍighi bọ ọdi maḍigh ḍibuo Ọony phọ Ẹnaan kụ Eru nyọdi kéḍighi mun ịyaar.

¹⁹Yira olegheri ni mọ yira ạbuo kꞌẸnaan, ḅịle kẹn mọ Eru kụ rẹtooghi ghan rạraar kẹngo bụen ịsien aḅirini phọ Ẹnaan úlegheri bọ.

²⁰Yira olegheri ni mọ Ọony phọ Ẹnaan maru ụngo iyira ọnaghan ạḍughum, pịdi yira olegheri ọkaraghi Ẹnaan phọ. Ọkaraghi Ẹnaan phọ rꞌạJizos Kraist Ọony phọ ọdi kụ ụmoogh ghuḍum mọ ayira. Ẹphen phọ kụ ọkaraghi Ẹnaan phọ. Kụen phọ kụ aghuḍum kꞌagee-pọ phọ.

²¹Ịbam ạnmuny, imiigha loor ítuman ghan rụmugh ọkpe!