Read abua Bụo Ịiruen 10 Bible Online

Bụo Ịiruen 10 - abua bible

Bụo Ịiruen 10

¹Ạbimelek romugh, kụ aTola ọony phọ aPua ọony phọ aDodo ọlo eghun Ịsaka aru ni amite ọphel awe Ịzirel. Ọdi arugh ẹpe Samir ẹpe aroogbolom mọ Ifraim.

²Ọdi aagboonaan ghan Ịzirel ịiruen ịyaldi rꞌịraar ạsia kụ amugh, kụ oḍi nyọdi ẹpe Samir.

³ATola romugh, kụ aJair ọlo ạGiliad aagboonaan ghan ịiruen Ịzirel ịyaldi rꞌịyal ạsia.

⁴Ọdi ạmar bọ ịraardi ạnmuny. Ạnmuny phọ ọdi ughiilom ghan ịraardi ịnam adool. Bịdi ọmoogh bọ ịraardi ạramha dị rokol ghan mọ aHavot Jair kꞌarodon. Ạramha phọ ịphen edi ẹpe de ạGiliad.

⁵Kụ aJair amugh kụ oḍi nyọdi ẹpe Kamon.

⁶Amem ịrol kẹn ni dị awe phọ Ịzirel oḍighi yogh ịkaraph risigh Ọmoogh-we phọ esi ooseeny ghan aruru aBaal rꞌAstarte, rụmugh ạSiria, rụmugh aSaidon, rụmugh ạMoab, rụmugh Amonait rꞌạrumugh ạbuo aFilistia.

⁷Kụ Ọmoogh-we phọ ạghagham ologhi we phọ Ịzirel kụ ạsighe bịdi aalha bụo aFilistia rꞌAmonait phọ.

⁸Esi aḍioph rꞌọphaanya ạsia bịdi ụkpiloghom ni ọḅile ọmiine we phọ Ịzirel bụphe orugh bọ de Ạmorait ẹpe Gịliad ẹpe ẹḅeenyom ạJodan.

⁹Amonait phọ ụkar ri ọḅeeny Jọdan ophun ọghi ozuom ẹgham eghun aJuda rꞌeghun ạBenjamin rꞌeghun Ifraim, kụ ẹeḅaghami we phọ Ịzirel iboom.

¹⁰Pọ kụ amem dị awe phọ Ịzirel omoghiom Ọmoogh-we phọ kụ ọḅem mọ, “Yoor moḍighi ni ịkaraph risigh ạna, ịdi eḍighi bọ yoor moghel Ẹnaan phọ ayoor ọḅile rọoḅereghi ghan rụmugh aBaal.”

¹¹Kụ Ọmoogh-we phọ ạḅeni we mọ, “Mịna kụ inyina ị́phel bọ ḍịen ạsighe ḍịghaagh ạbuo Ijipt, rꞌẠmorait rꞌAmonait rꞌạbuo aFilistia?

¹²Ạbuo aSaidon rꞌẠmalekait phọ rꞌaMaonait phọ ịmiine bọ inyina, kụ nyina imoghiom bọ ịmi, kụ mị ịphel bọ inyina ạsighe rạghaagh ạbidi.

¹³Kụ nyina ighel ịmi kụ reeseeny ghan ịnon ạrumugh. Kụ iḍighi, kụ mị inyina kị́phel mun.

¹⁴Ịki emoghiom rụmugh phọ ịpe nyina mẹsaḅar bọ, bịdi ịphel inyina ẹsighe esi ịminimiin phọ anyina.”

¹⁵Kụ awe phọ Ịzirel ọḅeni Ọmoogh-we phọ mọ, “Yoor mọpioman ni oḍighi risigh ạna. Uḍighi ni iyoor tọrobo ịlo ẹḅeeraan nyịna. Kụ ọlo, seseeny, yoor rọoḅereghi ni nyịna ụphel iyoor rodon ạsighe.”

¹⁶Kụ bịdi omutonaan loor ạbidi iiruen ạrumugh phọ kụ ọḅile ooseeny ghan Ọmoogh-we phọ. Kụ ịminimiin phọ awe phọ Ịzirel ẹeḅaghami Ọmoogh-we phọ.

¹⁷Kụ Amonait phọ ọghi ookpomoghan egina esi, kụ ọghi odoghoḍi rugbogo ẹpe Gịliad; kụ awe phọ Ịzirel ookpomoghan ọghi odoghoḍi rugbogo ẹpe Mizpa.

¹⁸Kụ awe phọ rꞌạbuo ạrumhu phọ ạGiliad, oniin apuru ghan nyoniin mọ, “Ạnhian ọdo oye, ọphon phọ katu bọ ozuom ẹgham Amonait phọ? Ọdi kụ kaḍighi uwo ẹmhu oomo ạbuphe orugh bọ ẹpe Gịliad.”