Read abua Bụo Ịiruen 11 Bible Online

Bụo Ịiruen 11 - abua bible

Bụo Ịiruen 11

¹AJefta ọlo ạGiliad aḍighi ni ophelegbe dị ạmoogh ịikpo. Ọdi phọ ọony oliom ẹmha ạnir; ạGiliad kụ ọde phọ ọdi.

²ẠGiliad ọde phọ ọdi ạmoogh ni bụnon ạnmuny dị ạnir phọ ọdi ạmar, kụ ạnmuny phọ romite rọmanam bịn omiigh ophorogh Jefta, kụ ọḅeni ghan nyọdi, “Nạ ọony oliom ẹmha. Nạ kụ kále erua ạraraar ọde phọ ayoor.”

³AJefta aghiilaan bumor phọ ọdi kụ asuma agheel ẹpe Tob kụ arugh. Kụ ighiilaani ọdo awe ookpomoghan ọghi oḍighom Jefta kụ bịdi orelhian ghan.

⁴Iru ni ẹteeny mem dị Amonait phọ oruphiom ẹgham we Ịzirel.

⁵Mem dị ịphen phọ remite, kụ ikumoor awe ạGiliad ọnya ọghi ọpham aJefta ẹpe de phọ aTob orighelom.

⁶Kụ bịdi ọḅeni Jefta mọ, “Tue aḍighi uwo ẹmhu ẹgham ayoor, pịdi yoor eeghian Amonait phọ.”

⁷Kụ aJefta ạphagharanaan bịdi mọ, “Nyina ịlogh ni ịmi ḍien dị tụtu nyina iphorogh ịmi otu ọde ạmi. Uḍighi ika kụ nyina rịwa bọ ịmi nyịidipho nyina edi bọ esi ịiḅaghami phọ?”

⁸Kụ ikumoor awe phọ ạGiliad ọḅeni Jefta mọ, “Yoor moru ọteeny nyịna ịdi eḍighi bọ yoor rọwa mọ tue ạghi rꞌayoor eeghian Amonait phọ, kụ nạ aḍighi oḍiemiom oomo awe phọ ạbuphe orugh bọ ẹpe Gịliad.”

⁹AJefta ạḅeni ikumoor awe phọ ạGiliad mọ, “Eru mạar dị nyina ịpham ịmi ẹghimom eeghian ẹgham mọ rꞌAmonait phọ, kụ Ọmoogh-we phọ ạḅogh bịdi ụngo iyira ghisigh ạmi, pọ mị kaḍighi oḍiemiom anyina ḍụghum?”

¹⁰Kụ ikumoor awe phọ ạGiliad ọḅeni Jefta mọ, “Yoor omeera ni. Ọmoogh-we phọ kụ ọgbaanaan ayira.”

¹¹Kụ aJefta ạdaph ikumoor awe phọ ạGiliad ạghi kụ awe phọ ọsighe nyọdi oḍighi oḍiemiom rꞌuwo ẹmhu awe ẹgham. AJefta ạḅeni ni bịdi ịpe ạraraar phọ kẹtol bọ ghisigh Ọmoogh-we phọ ẹpe Mizpa.

¹²AJefta arom ni rụukpaany ạghiom ọdaam mọ Amon mọ ọḅeni nyọdi mọ, “Mịna rꞌạna ígbian eeghe? Uḍighi ika kụ nạ mazuom bọ de phọ ạmi elephiri?”

¹³Kụ ọdaam mọ Amon ạphagharanaan rụukpaany phọ aJefta mọ, “Mem mọ awe phọ Ịzirel ọḍua bọ Ijipt omite, bịdi ụsighe ni de ạmi, emiigh kꞌẹpe Ọphiiny Anon ẹghi esi ẹpe Ọphiiny ạJabok ẹsighe ẹghi esiemi ẹpe Ọphiiny ạJodan. Kụ iḍighi, ḍighi wọor bịn aḅulemi rere phọ ịpe phọ ụngo.”

¹⁴AJefta ạḅile ni arom rụukpaany ạghiom ọdaam mọ Amon,

¹⁵mọ ọḅeni nyọdi mọ, “AJefta ạḅem ịduon mọ: Ọkpe ni ọḅem mọ awe phọ Ịzirel ọsighe de ạMoab rꞌade Amonait phọ.

¹⁶Iḍighi ịduon: mem mọ awe phọ Ịzirel ọḍua bọ ẹpe Ijipt omite, bịdi urelhe ẹpe ẹdala phọ ọghi osi ẹpe Ọphiiny Akaba ọḍua sịphe ọghi osi Kades,

¹⁷kụ bịdi orom rụukpaany ọghiom ọdaam mọ Idom kụ ọḅeni nyọdi mọ, ‘Seseeny meera yoor orelhe oten aani de phọ ạna.’ Kụ ọdaam mọ Idom ómeera. Bịdi ọḅile kẹn orom ḍiniin phọ adom mọ ọghiom ọdaam mọ ạMoab, kụ ọdi kẹn ómeera. Esi ịduon phọ bịdi orugh ẹpe Kades.

¹⁸Íbia bịn bịdi orelhe ẹpe ẹdala phọ kụ okiton oḅula oogo ẹpe ade phọ Idom rꞌade phọ ạMoab, ọghi osi ḍịghaagh phọ ạḍiphe erumuḍio phọ remite ghan bọ, ẹpe de phọ ạMoab, kụ orugh nyọori phọ ạga phọ Anon. Bịdi úḍigh ẹpe ọku phọ ạMoab loor esi dị Anon kụ ọku ạMoab.

¹⁹Awe phọ Ịzirel orom rụukpaany ọghiom Sihon ọdaam mọ Ạmorait rꞌọdaam mọ aHesbon, kụ Ịzirel ạḅeni nyọdi mọ, ‘Seseeny meera yoor orelhe oten aani de phọ ạna, ọghi osi ẹmha ayoor.’

²⁰ASihon óḍuom ologhi we phọ Ịzirel kụ ọdi ómeera mọ bịdi orelhe oten aani de phọ ọdi kụ aSihon aakpomoghi oomo awe phọ ọdi kụ odoghoḍi rugbogo ẹpe Jahaz, ọghi oruphiom ẹgham we phọ Ịzirel.

²¹Kụ Ọmoogh-we Ẹnaan phọ Ịzirel ạḅogh Sihon rꞌoomo awe phọ ọdi ạngo Ịzirel, kụ Ịzirel ọkpar opu bịdi. Eḍighi ẹdi Ịzirel kụ ạarom bịdi oomo ade phọ Ạmorait ọmoogh bọ rꞌạbuphe orugh bọ ẹpe.

²²Kụ bịdi ọsighe oomo areelhe phọ Ạmorait ọmoogh bọ emiigh kꞌAnon ẹpe esoorom mọ ẹghi esi Jạbok ẹpe ephunom mọ ẹḍua ẹpe ẹdala phọ ẹpe erumuḍio phọ remite ghan bọ, ẹghi esi Jọdan ẹpe erumuḍio phọ remeel ghan bọ.

²³Ịdipho phọ kụ ẹdi Ọmoogh-we Ẹnaan phọ Ịzirel aphorogh bọ we Ạmorait phọ ạsighe de phọ ạbidi ạngo Ịzirel.

²⁴Awe phọ ọdi kụ nạ kụ kạsighe ạmoogh ḍụghum? Nạ kạpam ni tọrobo ade aKemos ẹmugh phọ ạna mẹngo bọ nyịna mọ mọogh. Kụ ọlo yoor kọpam ni tọrobo ạḍiphe Ọmoogh-we Ẹnaan phọ ayoor ụngo bọ iyoor.

²⁵Kụ nyịidipho nạ ragbi ghan mọ nạ ạnighe ni apu Bẹlak ọony phọ aZipor ọdaam mọ ạMoab? Mạghi ghan ni ọwa asighiton esi awe phọ Ịzirel ḍụghum? Maruphiom ghan ni ẹgham we phọ Ịzirel ḍụghum?

²⁶Ịraar okuron ạsia kụ ẹdi Ịzirel morugh bọ ẹpe Hesbon rꞌịbam ạramha phọ ạbidi, rꞌẹpe Aroer rꞌịbam ạramha phọ ạbidi, rꞌoomo ạramha phọ ịpe etuman bọ Anon, eeghe kụ iḍighi kụ kꞌaḍio phọ nạ éenan bọ ọsighe?

²⁷Eeye, mị nyịna ịkaraph úḍighi. Nạ kụ rạpioman ozuom ạmi ẹgham. Ọmoogh-we phọ oogboom ịiruen phọ kụ kasophonaan ọoruen rodon we phọ Ịzirel rꞌAmonait phọ.”

²⁸Kụ ọdaam mọ Amonait phọ ọ́naghanan dom mọ aJefta arom bọ ạghiom nyọdi.

²⁹Kụ uwaloor Ọmoogh-we phọ aḍigh loor aJefta kụ ọdi arelhe aten Gịliad rꞌạManase, aten ạghi asi Mizpa, (ẹpe phọ pọ ạGiliad) kụ ọdi ạḍua Mizpa ẹpe phọ ạGiliad ạḍua ạghi asi de Amonait phọ.

³⁰Kụ aJefta aguanaan Ọmoogh-we phọ kụ ạḅem mọ, “Eru mạar dị nạ ụ́bile kụ nạ ạḅogh ni bụo Amonait ạlogh ḍịghaagh ạmi,

³¹pọ ọḅel oye lọ kạḍua kꞌạmi kụ atu ozuan ạmi mem erigheel ẹgham mọ mị mạkpar bọ apu Amonait phọ, mị kạsighe oye phọ ọpo ạphighironom ẹkia oguom ạnian.”

³²Kụ aJefta ạghi azuom ẹgham Amonait phọ, kụ Ọmoogh-we phọ ạsighe bịdi ạngo nyọdi.

³³AJefta ạze bịdi emiigh Aroer ạghi asiemi bụphe otuman bọ Minit, ịyaldi ạramha ẹḍua ẹghi esi kꞌẹpe Ebel Keramim, ạze bịdi ịminighan.

³⁴AJefta aten ratigheel kꞌọdi ẹpe Mizpa, bịn pogh ọnyani ọdi amite ạghi azuan nyọdi rꞌịkpaalaam dị ạpham rꞌịḅa. Ọnyani phọ ọphon phọ bịn kụ ogina ọony dị ọdi ạmar; omuton ogina phọ ọnyani phọ ọphon aJefta ạmar bọ, ọnon ọony, mꞌọnyani mꞌolephiri, aJefta ọ́mar.

³⁵Mem dị aJefta ạmiin bọ ọnyani phọ ọdi bịn ọdi ạphanyi rukpe ọdi loor ọto, kụ ạḅem mọ, “Sey, nyạni ạmi, nạ muphiemi ịmi ạmadan; nạ museenaan ịmi iboom ịiḅaghami loor esi dị mị mạsighe ọnhu ạmi aguanaan Ọmoogh-we phọ kụ mị kạ́bile ịpe mị maguanaan bọ.”

³⁶Kụ ọnyani phọ ạḅeni nyọdi mọ, “Ọde ạmi, eru mạar dị nạ mạsighe ọnhu ạna aguanaan Ọmoogh-we phọ, pọ ụsighe ịmi aḍighinom ịpe nạ ạḅem bọ, esi ịdipho Ọmoogh-we phọ malhe bọ ghẹlhe esi ạbumulogh-ḍien phọ ạna Amonait phọ.”

³⁷Kụ ọnyani phọ ạḅeni ọde phọ ọdi mọ, “Uḍighinaan ịmi eniin ịyaar phọ ẹphen. Ụngo ịmi ịyal ụnwanyu mị ụki ẹpe ạraaḅaraph mọ utelhe yogh esi ịduon mị kamugh bọ ịdipho esina ọnyani dị olephiri ọony úlegheri, mị rꞌiigbo ạmi.”

³⁸Kụ ọdi ạḅeni ọnyani phọ mọ, “Kịa ạrol ịyal phọ ụnwanyu phọ.” Kụ ọdi rꞌiigbo phọ ọdi ọghi rꞌamukum ologhi kụ omite isina ẹpe ạraaḅaraph mọ.

³⁹Kụ remunughan ịyal phọ ụnwanyu phọ kụ ọnyani phọ arigheel kꞌọde phọ ọdi, kụ ọde phọ ọdi ạsighe ọnyani phọ ọdi aḍighinom ịpe ọdi aguanaan bọ kụ ọnyani phọ amugh, esina ọnyani dị olephiri ọony úlegheri. Ịduon kụ iḍighi kụ eḍighinom ịyaar emite ẹpe Ịzirel.

⁴⁰Tọrobo ạlha ạnmanyaan Ịzirel rọḍua ghan ni sịphe ẹmha phọ kọrol inya aḍughul-otu ọtoonaan ọnyani phọ aJefta ọlo ạGiliad phọ.