Read abua Bụo Ịiruen 13 Bible Online

Bụo Ịiruen 13 - abua bible

Bụo Ịiruen 13

¹Awe phọ Ịzirel ụḅile ni oḍighi ịkaraph risigh Ọmoogh-we phọ, kụ Ọmoogh-we phọ ạḅogh bịdi ạngo bụo aFilistia phọ inyadi ạsia.

²Oniin oye ạrol li, ọlo aZora eghun ạDan, dị oghol mọ aManoa. Ạnir phọ ọdi ẹ́mar, mọony ụ́moogh.

³Kụ ọokpaany kꞌỌmoogh-we phọ amite egaan esi ạnir phọ, kụ ạḅeni mọ, “Nạ ẹ́mar, mọony nạ ọ́moogh; kụ nạ kaamor ri ạmar mọony, olephiri ọony.

⁴Kụ iḍighi, kụ mạar agona loor kạ́pughol ghan miim, mꞌamiim ịya mꞌạmuukpara amiim, úle ghan ịyaar lọ ogbi.

⁵Kụ iḍighi, mem lọ nạ mạmar olephiri ọony phọ, kạ́sam ghan ẹmhu ọdi, ịdi eḍighi bọ mọḅogh ọngo Ẹnaan okiremi ịyo rꞌỌmoogh-we phọ, emiigh kꞌamem mọ kọmar bọ nyọdi. Ọdi kụ kamiigh ọphel Ịzirel ọsighe ạḍighaagh ạbuo aFilistia phọ.”

⁶Kụ ạnir phọ ạghi ạḅeni olhom mọ ọdi mọ, “Oye kꞌẸnaan maru ụteeny ịmi, kụ aḍimite phọ ọdi ẹkigh ḍimite ọokpaany kꞌẸnaan, aḍigh ruugu. Kụ mị nyọdi úpuru mọ, ‘Nạ ạnhian?’ kụ ḍien ọdi óghola ụ́ḅeni ịmi.

⁷Ụḅeni ni ịmi mọ, ‘Nạ kaamor ri ạmar olephiri ọony. Kạ́pughol ghan miim ịya kẹn mꞌạmuukpara amiim, úle ghan ịyaar lọ ogbi. Ọony phọ kaḍighi Nạzarait (ẹmhu rókul ghan) risigh Ẹnaan, emiigh kꞌamem mọ kọmar bọ nyọdi ẹteeny kꞌamem aḍuugh ọdi.’”

⁸Kụ aManoa ạaḅereghi Ọmoogh-we phọ ạlhom ạḅeni mọ, “Seseeny, Ọbumoogh-we, meera oye phọ kꞌẸnaan ạḅile aru esi ayoor ụtughemi iyoor ịpe yoor koḍighinom ghan bọ mọony phọ kọmar bọ.”

⁹Kụ Ẹnaan iḍighi ni ịpe aManoa ạlhom bọ, kụ ọokpaany phọ kꞌẸnaan ạḅile aru ạteeny ạnir phọ mem dị ạnir phọ ạrol ẹpe ozo phọ. Olhom ạnir phọ ólho aani ẹpe ozo phọ.

¹⁰Kụ ạnir phọ aagborion aghiil ạghi ạḅeni olhom mọ ọdi mọ, “Pogh. Oye phọ aru bọ amite egaan esi ạmi ḍio phọ ạḍiphe phọ mạḅile kẹn atu.”

¹¹Kụ aManoa aḅetenu bịn ạdaph ạnir phọ ọdi. Ọdi ạghi kụ apuru oye phọ mọ, “Nạ kụ oye phọ ạḅaanaan bọ rꞌạnir phọ ọphon?” Kụ ọdi ạḅem mọ, “Mị ni.”

¹²Kụ aManoa ạḅem mọ, “Ịpe nạ ạghaaph bọ kụ ẹtuugh ni emite, kụ eeghe ọdo aghuḍum kụ ạkudi ọony phọ kaḍum? Kaḍighi eeghe ịyaar?”

¹³Kụ ọokpaany Ọmoogh-we phọ ạḅeni Manoa mọ, “Ạnir phọ agona loor ọdi mọ ọdi aḍighi oomo phọ ịpe mị ạḅeni bọ nyọdi.

¹⁴Ạnir phọ kúle ghan tọrobo ịyaar lọ ẹḍua esi oreeny avain kụ emite. Ọdi kụ́pughol ghan miim, mꞌamiim ịya mꞌạmuukpara amiim. Ọdi kúle ghan ịyaar lọ ogbi. Oomo ịpe mị ạlogh bọ ologh ạngo nyọdi, ọdi ạphamanam aako ghan.”

¹⁵AManoa ólhegheri mọ ọdi ọokpaany Ọmoogh-we phọ, kụ ạḅeni nyọdi mọ, “Seseeny, yoor roobinyemi nyịna, yoor oghiigh ọony ạtu-ọga ọsaanaan nyịna.” Kụ ọokpaany phọ ạḅeni Manoa mọ, “Eru mạar dị nạ kuubinyemi ịmi, pọ mị eḍien ạna kále. Kụ eru mạar dị nạ rạwa ookolobian ịyaar aghuḍum oguom ạnian, pọ ḍighi ạngo Ọmoogh-we phọ.”

¹⁷Kụ aManoa apuru ọokpaany Ọmoogh-we phọ mọ, “Ḍien ạna ughol ika? Ọbo mem lọ ịphen nạ ạghaaph bọ emite, yoor oghueni nyịna.”

¹⁸Kụ ọokpaany Ọmoogh-we phọ apuru nyọdi mọ, “Nạ ụtu ika kụ apuru bọ ḍien ạmi, dị nạ rạmiin bọ ni rạraar ịbooghian?”

¹⁹Kụ aManoa ạsighe mọony ạtu-ọga phọ ḅịle rꞌịbiakpa, ạsighe ọphighironom ẹkia oguom ạnian ạnyu aḍighiigh ạngo Ọmoogh-we phọ. Kụ ọokpaany aḍighi ịiḍaany kụ aManoa rꞌạnir phọ ọdi ophogh ghan.

²⁰Kụ mem dị anem ạnian phọ ẹḍua sịphe enmeny ạrikia phọ eemor rẹki ạnyu ạke, kụ ọokpaany Ọmoogh-we phọ ạghi aḍigh sịphe ạnian phọ ẹḍua bọ sịphe enmeny ạrikia phọ ạsiiny ạnyu ạke, kụ aManoa rꞌạnir phọ ọdi ophogh ghan kụ ozumeri yogh risigh ạbidi ude.

²¹Kụ ọokpaany Ọmoogh-we phọ ómite mun egaan esi aManoa rꞌạnir phọ ọdi. Kụ aManoa agbi olegheri mọ ọdi phọ ọokpaany Ọmoogh-we phọ.

²²Kụ aManoa ạḅeni ạnir phọ ọdi mọ, “Ílho mun mọ yira komugh, ịdi eḍighi bọ yira mọmiin Ẹnaan.”

²³Kụ ạnir phọ ọdi ạḅeni nyọdi mọ, “Eru mạar dị eru ịlo aḍuugh ọbo Ọmoogh-we phọ mụ́sighe ẹkia oguom ạnian phọ rꞌịyaar aghuḍum ịbiakpa phọ ayira. Ọdi kẹn múḍeenaan iyira oomo ạraraar phọ ịphen. Ọdi kẹn mụ́ḅeni iyira mem mọ ạmuen oomo ọdo kịrokiro ạraraar phọ ịphen.”

²⁴Kụ ạnir phọ aamor ạmar olephiri ọony kụ oghol ḍien mọony phọ mọ ạSamsin. Kụ ọony phọ amite aphoph, kụ Ọmoogh-we phọ ạseph nyọdi.

²⁵Kụ Uwaloor Ọmoogh-we phọ amiigh ọbugh aloor ọdi, eeni amem ẹpe arugbogo phọ ạDan, ogbo aZora rꞌEstol.