Read abua Bụo Ịiruen 14 Bible Online

Bụo Ịiruen 14 - abua bible

Bụo Ịiruen 14

¹Eniin aḍio ạSamsin aten ạghi Timna kụ ạmiin oniin ọnyani ọlo aFilistia ẹpe Timna.

²Ọdi rogheel kụ ạḅeni ọde rꞌonhiin phọ ọdi mọ, “Oniin ọnyani ọlo aFilistia odi ni ẹpe Timna dị ụḅeeraan ịmi. Ịki iphinanaan ịmi ọnyani phọ.”

³Kụ ọde phọ rꞌonhiin phọ ọdi opuru nyọdi mọ, “Ọnyani ólho sịen ogbo asiya phọ ạna rꞌawe phọ ạna kụ eḍighi bọ ẹdi nạ kạki ạwa ọnyani ọlo aFilistia phọ úḍuna bọ?” Kụ ạSamsin ạḅeni ọde phọ ọdi mọ, “Ọdi kụ ẹdi mị rạwa mọ uphinanaan ịmi; ọnyani phọ ụḅeeraan ni ịmi.”

⁴Ọde phọ rꞌonhiin phọ ọdi úlegheri mọ ịphen phọ ịḍua ni esi ịlom kꞌỌmoogh-we phọ kụ emite, dị rạwa ghan ịlo ọdi kaago kụ kạteeny we aFilistia phọ, ịdi eḍighi bọ mem mọ ạmuen phọ bụo aFilistia phọ okpophonom we Ịzirel.

⁵ẠSamsin rꞌọde phọ rꞌonhiin phọ ọdi ọghi Timna; kụ ịduon bịdi rọki bọ, bịdi rọḅeeny ozo ireeny avain phọ ẹpe Timna, kụ ọdi ạnaghan ẹbam ạnam-dịka dị ramophoghu.

⁶Kụ Uwaloor Ọmoogh-we phọ aḍigh loor ọdi, kụ ọdi ạghi ạphanyi elhom ẹnam mọ aghiigh dịadi ọony ạtu-ọga, dị ọ́pham ịyaar ḍịghaagh ọdi. Ọdi ọ́ghaaph ọ́ḅeni ọde phọ rꞌonhiin phọ ọdi ịpe ọdi aḍighi bọ.

⁷Kụ ọdi ạghi ạteeny ọnyani phọ, kụ ịyal phọ ạbidi ọghaaph, kụ ọnyani phọ ạḅeeraan Sạmsin igey.

⁸Íbia bịn ọdi ạghi ọsighe ọnyani phọ, kụ ọdi ạgbatanu ạghi ophogh aḍizu elhom ẹnam mọ ọdi aghiigh bọ kụ eḍighi iikia esi ọdi ọmiin mọ aḍiowo ẹḅoor ri ẹnam mọ rẹḅor bọ kụ ẹnuum aḍiowo emuza.

⁹Kụ ọdi aghophoron ẹnuum aḍiowo phọ ạlogh ghan ḍịghaagh kụ ạlaay ghan ratelhiom, kụ ạghi ạteeny ọde phọ ọdi rꞌonhiin phọ ọdi, kụ ạsighe ạngo bịdi. Kụ bịdi ọlaay, kụ ọdi bịdi ọ́ḅeni mọ ọno ạsighe ẹnuum aḍiowo phọ loor aḍizu elhom ẹnam.

¹⁰Kụ ọde phọ ọdi ạghi ạteeny ạnir phọ; kụ ạSamsin ạsaaghi iboom ariiḍien, ịdi eḍighi bọ ẹphen phọ kụ eḍighinom ịyaar ugheel ạnmuny.

¹¹Kụ mem dị awe phọ aFilistia ọmiin bọ nyọdi kụ ọghi ọsighe ịraardi iigbo ọdi kụ oru ọrolan rꞌọdi.

¹²Kụ ạSamsin ạḅeni bịdi mọ, “Nyịidipho mị kadogh ḍidogh ịḅeni inyina. Kụ mị apakian ni tọro ọnyo anyina lọ arue ạgba ẹmhu aḍidogh phọ ụḅeni ịmi sịen ẹyaal oḍual aḍughul-otu phọ, pọ mị kạngo nyọdi ịraardi ạrusuoma iidugha rꞌịraardi areenmenemeeny ạrusuoma.”

¹³Kụ eru mạar dị nyina ítue ịgba ẹmhu aḍidogh phọ ịḅeni ịmi, pọ nyina kịngo bọ ịmi ịraardi ịphalaḅaal ạrusuoma rꞌịraardi areenmenemineeny ạrusuoma. Kụ bịdi ọḅeni nyọdi mọ, “Dogh ḍidogh phọ ạna yoor ọnaghan.”

¹⁴Kụ ọdi adogh mọ, “Esi ọpo rale ghan bọ kụ ẹdi ịyaar olhe ẹḍua ghan emite. Ịsiphe ẹkpar bọ kụ esi dị ẹedugha ẹḍua ghan remite.” Bịdi útue ụ́gba ẹmhu aḍidogh phọ ịraar aḍughul-otu.

¹⁵Kụ rẹman inya phọ aḍughul-otu phọ kụ bịdi ọḅeni ạnir phọ ạSamsin mọ, “Keekeleghi olhom mọ ạna, dị ạgba ẹmhu aḍidogh phọ, aru ụḅeni iyoor. Ịduon kụ ílho, pọ yoor kọḅar otu ọde phọ ạna rꞌạna kụ ọsu nịan. Nạ uukpomoghi iyoor sịen ịlo ozirion ayoor ruphua phọ ayoor ọsighiogh?”

¹⁶Kụ ạnir phọ ạSamsin amoghi sịphe risigh ạSamsin kụ ạḅem mọ, “Mị akia ni nyịna. Nạ ịmi ụ́phomoghian. Nạ adoghonaan ḍidogh we ẹmha phọ ạmi, kụ nạ ịmi ẹmhu aḍidogh phọ ụ́gba ụ́ḅeni.” Kụ ọdi ạḅeni ạnir phọ mọ, “Mịin. Ọde phọ ạmi rꞌonhiin phọ ạmi mị ụ́gba ẹmhu aḍidogh phọ ụ́ḅeni, kụ mị ạḅeni nyịna?”

¹⁷Kụ ạnir phọ ọdi ạrol emoghi oomo oḍual phọ aḍughul-otu ẹyaal phọ loor aḍidogh phọ. Kụ mạaḅaghami Sạmsin iboom, kụ ḍịphe emuneniom bọ oḍual aḍughul-otu phọ, kụ ọdi ạgba ẹmhu aḍidogh phọ ạḅeni ạnir phọ. Kụ ạnir phọ ạḅeni we ẹmha phọ ọdi ẹmhu aḍidogh phọ.

¹⁸Ḍịphe emuneniom bọ oḍual aḍughul-otu phọ, mem dị erumuḍio remeel ighool, awe ẹmha phọ opuru nyọdi mọ, “Eeghe kụ idugh epu ẹnuum aḍiowo? Eeghe kụ ịmoogh ịikpo epu ạnam-dịka?” Kụ ạSamsin ạḅeni bịdi mọ, “Mụghumo nyina mị́sighe bọ ọnyani iḍighi ẹsua oḅephom iizo, nyina mílegheri ni ẹmhu aḍidogh phọ ạmi.”

¹⁹Ekperenom bịn Uwaloor Ọmoogh-we phọ aḍigh loor ạSamsin rꞌịikpo, kụ ọdi ạghi ẹpe Askelon kụ ạze ịraardi awe ạbuo ẹmha phọ, kụ awum rạraar phọ ạbidi, kụ ạkporion ịphalaḅaal ạrusuoma phọ ạbidi, kụ ạsighe aru ạngo bụphe ọgba bọ ẹmhu aḍidogh phọ ọdi, kụ rꞌọghagh ologhi kụ ọdi aḅula agheel kꞌọde phọ ọdi.

²⁰Kụ ọsighe ạnir phọ ạSamsin ọngo onyoogbo phọ ọpo aḍighi bọ ooḅi ọyaghiri phọ ọdi ḍio phọ apinien phọ.