Read abua Bụo Ịiruen 15 Bible Online

Bụo Ịiruen 15 - abua bible

Bụo Ịiruen 15

¹Ịphen phọ reru reten, kụ rẹteeny mem ọgbo ịbiakpa, kụ ạSamsin ạpham mọony ạtu-ọga ạghimom ophogh ạnir phọ ọdi. Kụ ọdi ạḅeni ọde phọ mọ, “Mị kạki apogh osoph ạnir phọ ạmi.” Kụ oye phọ ómeera mọ ọdi aḍigh otu,

²kụ ạḅeni nyọdi, “Mị rạatughian ghan ni mọ nạ ạkaraghi ni ạlogh ọnyani phọ ạmi ḍien. Kụ iḍighi kụ mị ạtu bọ ạsighe ạnir phọ ạna ạngo onyoogbo phọ ạna. Kụ ọlo, ọbam umarani ọdi dị ạnighe apu nyọdi odi ni. Sịghe nyọon kpạripe.”

³Kụ ạSamsin ạḅeni bịdi mọ, “Egi phọ ẹphen mị kaḍighi bụo aFilistia ịkaraph kụ erugh ịmi kíphum.”

⁴ẠSamsin ạghi asiphi ịraar okuron ạraakpaku kụ ạkpooghi ịsoph phọ ạbidi ịyal ịyal ịne esi kụ ạloghom ịmure esi ẹeḅugh phọ.

⁵Kụ ọdi ạloghoḍi nịan sịphe ịmure phọ, kụ ạwile rạakpaku phọ ẹghi ẹpe iizo ịbiakpa ạbuo aFilistia phọ; kụ ạnian phọ ele sịgba ịbiakpa dị kọ̋ku rꞌịdi mọku ḅịle rꞌiizo ireeny ọliv.

⁶Kụ ạbuo aFilistia phọ opuru ghan mọ ạnhian kụ aḍighi bọ ịphen phọ, kụ ọḅeni bịdi mọ ạSamsin ọyogo oye ọlo aTimna phọ kụ ạlogh bọ nịan phọ, ịdi eḍighi bọ oye phọ mạsighe ạnir phọ ạSamsin ạngo ọyaghiri ạSamsin. Kụ ạbuo aFilistia phọ ọghi ọsighe ọnyani phọ rꞌọde phọ ọdi oguom nịan.

⁷Kụ ạSamsin ạḅeni bịdi mọ, “Ịphen phọ kụ ịdi nyina eḍighi. Mị maghunya mọ mị kạle ni ghẹlhe loor ịphen phọ esi anyina, kụ mị agbi ọḍua.”

⁸Kụ ọdi azuom bịdi rꞌịghagh iloghi kụ ạze ọoloogh ạbidi; kụ ọdi ạghi aḍigh epogh aḍighiigh ẹpe Ẹtam.

⁹Bụo aFilistia phọ uru ni odoghoḍi rugbogo ẹpe Juda, kụ ozuom ẹgham ẹmha Lehi.

¹⁰Kụ awe aJuda phọ opuru bịdi mọ, “Esi ika kụ ẹdi nyina eru bọ bịn rizuom iyoor?” Kụ bịdi ọphagharanaan mọ, “Yoor uru ọphaḍi ạSamsin rꞌoḍighi aani ọdi ịdipho ọdi muḍighi bọ iyoor.”

¹¹Kụ ịraar ọonir awe aJuda ọḍua ọghi ẹpe epogh aḍighiigh phọ Ẹtam, kụ opuru Sạmsin mọ, “Nạ ólhegheri mọ ạbuo aFilistia kụ ruphogh iyoor ḍụghum? Kụ ịphen nạ uḍighi bọ iyoor ịghen?” Kụ ọdi ạḅeni bịdi mọ, “Ịdi bịdi muḍighi ịmi kụ ịdi mị ạtuugh aḍighi aani bịdi.”

¹²Kụ bịdi ọḅeni nyọdi mọ, “Yoor uru ọphaḍi ạna, ọsighe ọghi ọngo ạbuo aFilistia phọ.” Kụ ạSamsin ạḅeni bịdi mọ, “Ikunya mọ nyina ịmi kíghiigh rꞌaloor anyina.”

¹³Kụ bịdi ọḅeni nyọdi mọ, “Eeye, yoor kọphaḍi nyịna bịn, ọḅogh ọngo bụo aFilistia phọ. Yoor nyịna rókiigh.” Kụ bịdi ọsighe ịyal imoom iḍigh ọphaḍiom nyọdi, kụ ọpham omitiom sịphe aḍighiigh phọ.

¹⁴Mem dị bịdi ọghi osi Lehi, ạbuo aFilistia phọ utuphuron eghiil ọsar rọki ozuan ọdi, kụ Uwaloor Ọmoogh-we phọ aḍigh loor ọdi rꞌịikpo, kụ iḍigh phọ edi bọ rạghaagh ọdi ẹrol dịadi iphurubu lọ ạnian ele, kụ iḍigh phọ ẹgbuan sịphe ạraghaagh phọ ọdi.

¹⁵Kụ ọdi ạmiin ọḅarara ạleegh ẹnam adool dị memugh, kụ ọdi asele ḍịghaagh ọdi ạkpoton ạsighe, kụ ạsighe ạziom oniin ọonir awe.

¹⁶Kụ ạSamsin ạmoor ḍụor mọ, “Ọḅarara ạleegh ẹnam adool kụ akpologhi rugu, Ọḅarara ạleegh ẹnam adool kụ ẹdi mị ạsighe ạziom oniin ọonir awe.”

¹⁷Ọdi rọghaaph bọ rọmadan kụ ọdi aroph ọḅarara ạleegh ẹnam adool phọ ọdi ạpham bọ ḍịghaagh phọ ọdi. Esi phọ ịphen phọ emite bọ ughol mọ aRamat Lehi.

¹⁸Kụ ạmuum ọphughol rạpu Sạmsin iboom, kụ ọdi ạmagh Ọmoogh-we phọ kụ ạḅeni mọ, “Nạ kụ uḍighi bọ ịdi ọphel otene phọ aleeny bọ ịduon ạḍua bọ ḍịghaagh otelhedom mọ ạna amite, kụ nyịidipho mịna ạmoogh bọ ẹephua ạmuum, mị umeel uḍighanaan rạghaagh ạbuo eḍuna phọ?”

¹⁹Kụ Ẹnaan ạay akpegheron ooni dị odi ẹpe Lehi kụ ạmuum akilogh sịphe phọ amite, kụ ạSamsin akor mụum mọ ạphughol kụ ịnyaam eḍigh loor ọdi kụ ọdi aloghoma loor. Ịphen phọ eḍighi ịdi dị aghol okiilia ạmuum mọ mọ “En Hakore”. Edi ni ẹpe Lehi kꞌarodon.

²⁰ẠSamsin aḍiemiom Ịzirel ịyaldi ạsia mem mọ bụo aFilistia phọ ophogh ghan bọ de phọ.