Read abua Bụo Ịiruen 16 Bible Online

Bụo Ịiruen 16 - abua bible

Bụo Ịiruen 16

¹Eniin aḍio ạSamsin ạghi ẹmha aFilistia dị oghol mọ aGaza kụ ọdi ạrolan esi rꞌoniin oliom-ẹmha.

²Kụ ọḅeni we aGaza mọ ạSamsin maru ẹphen. Kụ bịdi ọghi oko esi phọ okitonom rogon ghan nyọdi oomo aḍughul phọ sịphe ọnhu-aḍibuo oghoony ẹmha phọ. Bịdi uḅoroghian ni oomo phọ aḍughul phọ, kụ ọotughian ghan mọ, “Yira kokori ni nyọdi tụtu rẹḅaal kụ okiigh nyọdi.”

³ẠSamsin ạrol li ẹmina tụtu ẹteeny ogbo aḍughul, kụ ọdi aḅetenu kụ ạghi ạpham ọnhu-aḍibuo oghoony ẹmha phọ kụ aruphi yogh ịḅaghaghaam, rughuugh rꞌigodo rꞌoomo phọ ịdi, kụ ạḅam ọpha ọdi, kụ arool ạsighe ạghi ạsiinyom eegbolom mọ ẹrol bọ repogh Hẹbron kụ aseere.

⁴Ịphen phọ reru reten, kụ ọdi ạghi ẹpe Eḍiiny aSorek, kụ alegherian oniin ạnir dị oghol mọ aDelaila.

⁵Kụ ạbuo ạrumhu aFilistia ọghi ọteeny ạnir phọ kụ ọḅeni mọ, “Lẹelekian nyọdi ọdi ạḅeni nyịna ịpe eḍighi bọ kụ ọdi ạmoogh bọ iboom mọ ịikpo phọ ịphen, ịlo yoor koḍighi kụ ọkpar opu nyọdi, pịdi yoor ọphaḍi nyọdi odughe. Tọrobo ọnyo ayoor kạngo nyịna ḍioph rꞌoniin okuron ipoḍi asilva.”

⁶Kụ aDelaila ạḅeni Sạmsin mọ, “Seseeny, ụḅeni ịmi ịpe eḍighi bọ kụ nạ ạmoogh bọ ịikpo dị eleeny ịduon, rꞌịlo kọphaḍi nyịna kụ nạ adugh.”

⁷Kụ ạSamsin ạḅeni ạnir phọ mọ, “Eru mạar dị bịdi ọsighe oḍual imoom ipoḍi ạḍiye lọ kẹ̋gharaghar kụ ụphaḍiom ịmi bịn mị madugh, bịn mị ạtol ịdipho ạbueri phọ awe phọ.”

⁸Kụ ạbuo ạrumhu aFilistia phọ ọsighe oḍual imoom ipoḍi ạḍiye dị kẹ̋gharaghar ọsighe oru ọngo ạnir phọ, kụ ạsighe ạphaḍiom nyọdi.

⁹Ạnir phọ ạsighe we aseere sịphe otu phọ ọdi dị rokori ghan, kụ ạnir phọ ạlho ạghiom ạnyu mọ, “Sạmsin. Bụo aFilistia phọ moru ozuom ạna.” Kụ ọdi arunyi iḍigh phọ ịdipho iri lọ ạnian ekoph. Bịn bịdi úlegheri ni ịpe ịikpo phọ ọdi ẹḍua bọ kụ eru.

¹⁰Kụ aDelaila ạḅeni Sạmsin mọ, “Mịin, nạ mụbeephe ịmi, nạ ụgba ọkpe kụ ụḅeni ịmi. Seseeny, kạr ụḅeni ịmi nyịidipho ịyaar dị kọsighe kụ ọphaḍiom nyịna.”

¹¹ẠSamsin ạḅeni ạnir phọ mọ, “Ịsighe imoom iḍigh dị ịyaar kőḍighinom ịphaḍiom ịmi bịn mị madugh ạtol ịlo oye dị ịikpo ụ́moogh, ịdipho ạbueri phọ awe phọ.”

¹²Kụ aDelaila ạsighe imoom iḍigh phọ ạphaḍiom Sạmsin kụ ạlho ạghiom ạnyu mọ, “Sạmsin, bụo aFilistia phọ moru ozuom ạna.” Awe phọ ụrol li ọnon osoph rokori ghan, kụ ọdi arunyi iḍigh phọ ọphaḍiom bọ rạghaagh phọ ọdi ịdipho iri.

¹³ADelaila ạḅeni Sạmsin mọ, “Nạ mạḅile kẹn ụbeephe ịmi, ạgba kẹn ọkpe. Ụḅeni ịmi ịpe kọpaḍi bọ ịikpo phọ ạna.” ẠSamsin ạḅeni nyọdi mọ, “Eru mạar dị nạ ạsighe osiileen ukpe kụ ạkpaam oḍual phọ arukpu ạsilaal ẹmhu phọ ạmi kụ ạsighe ọkpoloneen oreeny ạkparamiom, bịn mị madugh, ạtol ịdipho ạbueri phọ awe phọ.”

¹⁴ẠSamsin rạnaani kụ aDelaila ạsighe osiileen ukpe kụ ạkpaam oḍual arukpu ẹmhu phọ ọdi, ạsighe ọkpoloneen oreeny ạkparamiom, kụ ạlho ạghiom ạnyu mọ, “Sạmsin, bụo aFilistia moru ozuom ạna.” Kụ odi ạsuma, kụ ọdi ạakpuan ạsighe pịni phọ sịphe olhooneen ukpe phọ.

¹⁵Kụ ạnir phọ apuru nyọdi mọ, “Ịlo eeghe, esi ika kụ ẹdi nạ apu ghan bọ bịn rạḅem ghan bọ mọ nạ ụphomoghian ni ịmi? Ologhi ạna ólho esi ạmi? Nạ mụbeephe bọ ịmi sịen ịraar amem, nạ kụ̋ḅeni ịmi esi phọ ịikpo phọ ạna edi bọ.”

¹⁶Kụ ạnir phọ ạaḅaghami nyọdi ḍio etum ḍio, kụ ẹpher nyọdi ịlo ạraghaaph ịikpo phọ ọdi.

¹⁷Kụ ạSamsin ạghaaph oomo ịpe ologhi phọ ọdi ạḅeni ạnir phọ mọ, “Kꞌekulha ụmar bọ ịmi sịlaal ẹmhu phọ ạmi kọ̋sam ghan, ịdi eḍighi bọ ụḅogh ịmi ọngo Ẹnaan kꞌọkuruḅaka onhiin ạmi. Kụ rọsam ẹmhu ạmi bịn ịikpo phọ ạmi mẹḍua loor ạmi, bịn mị adugh ạtol ịdipho ạbueri phọ awe phọ.”

¹⁸ADelaila rọmiin bọ mọ ạSamsin mạghaaph ịpe eru bọ ịne ạḅeni nyịno, kụ ọdi arom ọghi ọmagh ạbuo ạrumhu aFilistia phọ mọ, “Ịḅile eru egi phọ ẹphen bịn. Ọdi mụḅeni ịmi ịpe eru bọ ịne.” Kụ ạbuo ạrumhu aFilistia phọ oru ọteeny ạnir phọ ọpham ikpoki oruom ạnir phọ.

¹⁹Kụ ạnir phọ aḍighi ịdi ạSamsin ạrol rụgbo ọdi ạnaani, kụ ạnir phọ ạmagh oye kụ ạghi aghul oḍual ạsigala ạsilaal ẹmhu phọ ạSamsin kụ amiigh ọgilaam ọdi, loor esi dị ịikpo phọ ọdi ílho mun.

²⁰Kụ aDelaila ạlho mọ, “Sạmsin, bụo aFilistia moru ozuom ạna.” Kụ ọdi ạsuma kụ agbi mọ ọno kạḅile ni aḅetenu rꞌẹereegh ịdipho ẹnon amem. Kụ ọdi aaguna, ólhegheri mọ Ọmoogh-we phọ mạwile nyọdi.

²¹Ạbuo aFilistia phọ usiph ni nyọdi kụ ọponyon riḍien phọ ọdi, kụ ọpham nyọdi ọghi osiom Gaza, kụ ọsighe izime enaba ọphaḍiom nyọdi, ọsighe nyọdi ọghi ọlogh otu ikoli, kụ ọdi ạgbe ghan ịbiakpa pạ otu ikoli phọ.

²²Kụ ạsilaal ẹmhu phọ ọdi oghul bọ mẹḅile emiigh resi.

²³Ạbuo ạrumhu aFilistia phọ uukpomoghan ni oḍighi ịyaar aghuḍum ọngo Dagon ẹmugh phọ ạbidi. Robo kụ ọḅem ghan mọ, “Ẹnaan phọ ayira mẹḅogh Sạmsin ạmulogh-ḍien phọ ayira ẹlogh ḍịghaagh ayira.”

²⁴Kụ tọrobo amem lọ awe phọ ọmiin Sạmsin, bịdi ọseph ẹmugh phọ ạbidi kụ ọḅem ghan mọ, “Ẹmugh phọ ayira mạḅogh mụlogh-ḍien phọ ayira ạlogh ḍịghaagh ayira, ọpo aphiemi bọ ẹmha phọ ayira, ạze ịminighan awe ayira.”

²⁵Mem dị iloghi ạbidi ẹḅaal, bịdi ọḅem mọ, “Ịki ẹmagh Sạmsin dị aru aḍighi yogh ịlo ạreegh risigh ayira.” Kụ bịdi ọsighe nyọdi ọmeremi ịbaay ịyal ạroko.

²⁶Kụ ạSamsin ạḅeni mọony phọ ratelhiom bọ nyọdi mọ, “Ḍighi ịdi mị kạpam ịyal phọ igbogh ạroko phọ ẹpham bọ otu phọ ẹmeremi mị ụbedenom.”

²⁷Ạnmariir rꞌalephiri umuza ni otu phọ. Oomo ạbuo ạrumhu aFilistia ụrol li sịphe phọ. Awe dị odi ẹpe ạnyu otu phọ ọkiom ni ịraar ọonir, nmạriir rꞌalephiri, ropoghoghom ghan ịlo ạreegh phọ ạSamsin raḍighi yogh bọ.

²⁸ẠSamsin ạmagh Ọmoogh-we phọ kụ ạḅeni mọ, “Ẹnaan Oomo Ịikpo, ụutughian ịmi, seseeny, ụngo ịmi ịikpo sịen amem mọ ạmuen bịn mị aḅulemian bụo aFilistia phọ esi ịyal ariḍien phọ ạmi bịdi mọponyon bọ.”

²⁹Kụ ạSamsin ạpham ịyal phọ igbogh ạroko phọ ịpe ẹpham bọ otu phọ ẹmeremi, kụ ọdi ạsighe ịnyaam ọdi ạbedenom kụ ạpham nyeniin ẹko ḍịghaagh elhiom, ạpham nyẹeri phọ ḍịghaagh ekeeny, kụ anyu ịyal phọ ịdi,

³⁰kụ ạlho mọ, “Bịle mị utelhian bụo aFilistia phọ umugh.” Kụ ọdi ạsighe ịnyaam mọ ọdi ạbedenom, kụ otu phọ ameel azuom oomo ạbuo ạrumhu aFilistia phọ rꞌoomo awe phọ ạbuphe ọrol bọ sịphe otu phọ. Kụ awe dị ọdi agheelom bọ mem aḍuugh phọ ọdi opu bụphe ọdi ạze bọ mem mọ ọdi ạrol bọ eye.

³¹Abumor ọdi rꞌạbunon awe ọto ạbidi uru ni ọsighe aruzu phọ ọdi. Bịdi ụsighe ni ogheelom ẹpe igbo aZora rꞌEstol, kụ oḍi nyọdi ologhi oḍi aManoa ọde phọ ọdi. Ọdi aḍiemiom bọ Ịzirel ịyaldi ạsia.