Read abua Bụo Ịiruen 17 Bible Online

Bụo Ịiruen 17 - abua bible

Bụo Ịiruen 17

¹Oniin oye ạrol li dị oghol mọ aMaika dị arugh ẹpe aroogbolom mọ Ifraim.

²Kụ ọdi ạḅeni onhiin phọ ọdi mọ, “Mem mọ omi bọ ḍioph rꞌoniin okuron ipoḍi asilva phọ ạna nạ uronyon ni oye phọ. Mị ụnaghan ni, kụ mị kụ ụsighe bọ ikpoki phọ, edi ni rꞌạmi.” Kụ onhiin phọ ọdi ạḅeni nyọdi mọ, “Ọmoogh-we phọ ạseph ni nyịna, mọony ạmi.”

³Ọdi aḅulemi ni ikpoki phọ, ḍioph rꞌoniin okuron ipoḍi asilva phọ, ạngo onhiin phọ ọdi. Kụ onhiin phọ ọdi ạḅem mọ, “Esi oogbonyon ịkaraph itonyonaan phọ ẹmhu ọony phọ ạmi, mị rꞌaloor ạmi mạḅogh silva kạngo Ọmoogh-we phọ. Kọsighe oreeny kụ ọkaam ẹkaaneen ẹmugh ọḅile ọsighe silva kụ ạdaphariom ạnyu phọ. Kụ nyịidipho mị kaḅulemi ipoḍi asilva phọ ạngo nyịna.”

⁴Kụ mem mọ ọdi aḅulemi bọ ikpoki phọ ạngo onhiin phọ ọdi, ạnir phọ ạsighe ịyal okuron ipoḍi asilva ạngo oye dị rạlem ghan silva. Kụ ọdi ạsighe oreeny ạkaam ẹkaaneen ẹmugh kụ ạḅile ạsighe silva phọ ạdaphariom ạnyu phọ. Kụ edi ghan sịphe otu phọ aMaika.

⁵Kụ aMaika, oye phọ ọphon phọ, ạmoogh ḍịghom rꞌẹphan ạrumugh, kụ ạsighe oniin ọony ọdi aḍighi oyil ạrikia.

⁶Mem mọ ạmuen phọ ọdaam ólho Ịzirel, kụ tọrobo oye aḍighi yogh ghan ịlo ẹḅeeraan nyọdi.

⁷Mem mọ ạmuphe phọ onyugheel ọlo eghun aLivai ạrol li dị arugh ẹpe Bẹtilihem ẹlo aJuda.

⁸Ọdi ạwile Bẹtilihem kụ ạwa ghan ekpisi orugh, kụ ọdi arelhe ạghi asi ẹpe aroogbolom mọ Ifraim, kụ aru asi kꞌaMaika.

⁹Kụ aMaika apuru nyọdi mọ, “Nạ ọlo ẹghen?” Kụ oye phọ ạḅeni nyọdi mọ, “Mị ọnyo aLivai. Mị ọlo ạBetilihem ẹpe eelhe aJuda, kụ mị rạwa ghan esi orugh.”

¹⁰AMaika ạḅeni oye phọ mọ, “Tue ạrolan rꞌạmi, aḍighi oye oroma rꞌọpinyon rịkia ạmi kụ mị kạkpe ghan nyịna ḍioph ipoḍi asilva lhạ. Mị kạngo nyịna eḍien olhe rꞌarukpe omuuna.”

¹¹Onyugheel ọlo eghun aLivai phọ ameeraam ni kụ ạrolan rꞌọdi ịdipho ọony.

¹²Kụ aMaika ạkoonaan ịko ariil ạrikia onyugheel phọ, kụ ọnyo aLivait phọ aḍighi oyil ạrikia aMaika kụ arugh sịphe kꞌaMaika.

¹³Kụ aMaika ạḅem mọ, “Nyịidipho ọnyo aLivai kụ maḍighi bọ oyil ạrikia ạmi, mị alegheri ni mọ Ọmoogh-we phọ kaḍighi ni ịdi ạraraar kịnighenaan ịmi.”