Read abua Bụo Ịiruen 18 Bible Online

Bụo Ịiruen 18 - abua bible

Bụo Ịiruen 18

¹Mem mọ ạmuphe phọ ọdaam ọ́rol Ịzirel, kụ siḍughul-otu phọ ịpe phọ eghun phọ ạDan ụwa ghan ni de ọmoogh aani lọ bịdi kotugh, ịdi eḍighi bọ bịdi kọ̋ngaani de ḍio ạbidi esi ịpe rodiighi bọ rughunughun phọ Ịzirel.

²Kụ ạbuo ạrumhu phọ ạDan ọson oogh ikpolom awe sịphe aropolo eghun phọ ạbidi kụ orom mọ ọghi ẹpe Zora rꞌẹpe Estol ọnmanaghian oḅiligha de phọ ophogh. Mem dị bịdi oru bọ ẹpe aroogbolom mọ kụ orom Ifraim, bịdi usi kụ ọrol kꞌaMaika.

³Kụ bịdi odi sịphe ịisua otu phọ aMaika kụ ọnaghan ọnhu ạḍiaḅa ọnyo aLivai phọ kụ ọlogh elegh, kụ bịdi okiton ọghi ạga phọ ọpo ọdi odi bọ, kụ opuru nyọdi mọ, “Ạnhian kụ ạsighe bọ nyịna aru sịen? Nạ raḍighi ghan sịen phọ eeghe? Eeghe ọdo ịyaar kụ oḍighi ạna sịen phọ?”

⁴Kụ ọdi ạḅeni bịdi ịpe aMaika aḍighi bọ nyọdi mọ, “AMaika uphir ịmi ạsighe aḍighi oyil ạrikia ọdi.”

⁵Kụ bịdi ọḅeni nyọdi mọ, “Seseeny, upurunaan iyoor Ẹnaan yoor olegheri mụghumo ẹghi phọ ayoor kẹnighe ni.”

⁶Kụ oyil ạrikia phọ ạḅeni bịdi mọ, “Ẹghi anyina ẹnighe; erelhe phọ nyina rẹki bọ edi risigh Ọmoogh-we phọ.”

⁷Kụ oogh phọ awe phọ oten ọghi ẹpe ẹmha aLais. Bịdi ụmiin ni ịdi awe dị orugh sịphe phọ otugh ọdaph rọozo awe phọ aSaidon, bịdi ụ́moogh ịikonoghian, oḅoroghian. Oye asighiton ólho sịphe ade phọ, dị umugholoor kasiph bịdi esi ạtorobo ịyaar. Bịdi ọkelan ni rꞌawe aSaidon phọ, bịdi rꞌoye ụ́ḅaran oḍighi.

⁸Kụ bịdi oḅula ọghi ọteeny bumor phọ ạbidi ẹpe Zora rꞌẹpe Estol. Kụ abumor phọ ạbidi opuru bịdi mọ, “Nyina ẹmoogh ni ịyaar ọghaaph?”

⁹Kụ bịdi ọḅeni bumor phọ ạbidi mọ, “Iḅetenu ọghi ozuom bịdi, ịdi eḍighi bọ yoor mọghi ọmiin de phọ kụ ẹnighe ni igey. Itu yira ọghi ọsighe de phọ ọmoogh.

¹⁰Mem dị yira osi ẹpe, nyina kẹmiin ni mọ awe phọ ụ́maar iḅiligha ạraraar. Eboom eelhe ni. Ọmoogh ni tọrobo ịyaar lọ rọwa, kụ Ẹnaan mịngo ni inyina.”

¹¹Awe dị ọman odiiny okuron awe sịphe eghun phọ ạDan ọnyaaghian ịlo ẹgham, kụ ọḍua sịphe Zora rꞌẹpe Estol oḅetenu ọghi.

¹²Kụ bịdi oḅetenu ọḍua ọghi osi ẹmha ạKiriat Jiarim ẹpe Juda, kụ odoghoḍi rugbogo ọrol sịphe. Ọtuan esi ịphen phọ oghol esi phọ mọ aMahane Dạn kꞌarodon; ẹdi etuman ẹmha phọ ạga ẹpe emeelom erumuḍio phọ.

¹³Kụ bịdi ọḍua ẹpe phọ kụ ọghi ẹpe aroogbolom mọ Ifraim, kụ ogbi oru ẹphen otu phọ aMaika.

¹⁴Kụ oogh phọ awe phọ ọghi bọ oḅiligha ẹmha phọ aLais opuru bumor phọ ạbidi mọ, “Nyina ílegheri mọ oniin otu odi ni sịen aruutu phọ ịphen dị ạḍighom, rꞌẹphan, rꞌịkaaghineen ạrumugh dị ogbul silva rꞌigbudu kụ edi? Ịitughian nyịidipho ịlo yira koḍighi.”

¹⁵Kụ bịdi okiton ọghi osi ẹpe otu phọ aMaika, nyọpo ọnyo aLivai phọ arugh bọ, kụ opuru nyọdi ịlo ọdi odi.

¹⁶Mem mọ ạmuen phọ odiiny okuron awe ẹgham ạbuo eghun ạDan phọ ọnyaaghian bọ ịlo ẹgham mọ ụmeregha ni ẹpe ọnhu-aḍibuo eḍighom oghoony ẹmha phọ kụ okori.

¹⁷Kụ oogh phọ awe phọ ọghi bọ oḅiligha ade phọ oḍiemi ghan ọghi oḍigh ọsighiogh ịkaaghineen ạrumugh phọ, dịghom mọ ẹphan phọ rꞌigbudu phọ, mem dị oyil ạrikia phọ odi ẹpe eḍighom mọ rꞌodiiny okuron awe phọ ọnyaaghian bọ rạraar ẹgham mọ.

¹⁸Mem mọ awe phọ ạbuen phọ oḍigh bọ otu phọ aMaika kụ ọsighiogh ịkaaghineen ạrumugh phọ, dịghom mọ, ẹphan phọ rꞌigbudu phọ, oyil ạrikia phọ apuru ni bịdi mọ, “Ịphen nyina reḍighi bọ ịghen?”

¹⁹Kụ bịdi ọḅeni nyọdi mọ, “Kpomori ọnhu ạna. Sịghe ḍịghaagh ạna apukiom ọnhu ạna, aru ụdaph iyoor aḍighi oye oroma ayoor rꞌọpinyon rịkia ayoor. Nyịna kẹḅeeraan oḍighi oyil ạrikia kꞌoniin oye, rꞌoḍighi oyil ạrikia kꞌopolo rꞌeghun Ịzirel?”

²⁰Ịduon phọ ọghaaph bọ ịḅeeraan ni oyil ạrikia phọ kụ ọdi ạsighe ḍịghom mọ, ẹphan phọ, ịkaaghineen ạrumugh phọ rꞌigbudu phọ kụ ạdapham we phọ.

²¹Bịdi uughiraan bịn omiigh ọḍua, rꞌịbam ạnmuny ạbidi, ịnam-otu ạbidi rꞌaruphua phọ ạbidi.

²²Bịdi mọkelan ni iboom ọto kꞌaMaika, kụ ọdi amite aagbologh we ekool phọ ọdaph ọdi ọghi ẹgham. Kụ bịdi ophorogh we eghun phọ ạDan ọteeny

²³kụ ọlooghiom bịdi. Kụ awe phọ ạDan ooghiraan opuru Maika mọ, “Eeghe kụ reḍighi nyịna kụ nạ ạpham bọ bụen phọ kụ arumom?”

²⁴Kụ ọdi ạḅeni bịdi mọ, “Nyina mẹsighe rụmugh phọ mị kụ ạkaaghi bọ ni, rꞌọpinyon rịkia phọ ạmi, ẹḍuanam. Eeghia kụ isughanaan bọ ịmi? Esi ika kụ ẹdi nyina ẹtu bọ kụ ripuru ghan bọ ịmi mọ, ‘Eeghe kụ reḍighi nyịna?’”

²⁵Kụ awe phọ ạDan ọḅeni nyọdi mọ, “Yoor ụ́wa ọnaghan ẹḍogh ạna sịen ogbo phọ ayoor, ọbo bụo amugh-eghe phọ ạbuen kozuom ghan bọ nyịna bịn opiemi ghuḍum ạna rꞌaghuḍum ọto ạna.”

²⁶Awe phọ ạDan unyeene bịn, kụ aMaika ạmiin mọ ịnyaam ạbidi kụ ipu ni ịlo ọno, kụ ọdi ạḍua agheel kꞌọdi.

²⁷Mem dị awe phọ ạDan mọsighe bọ rạraar phọ ịpe aMaika ạkaaghi bọ rꞌọpinyon rịkia phọ ọdi, kụ bịdi ogbi ọghi ozuom Lais ẹgham, ẹmha ẹepho phọ, awe dị rọ́wa ghan sighiton kụ ọsighe ẹmhu elhool ẹgham mọ ọziom bịdi, ọsighe nịan ọsu ẹmha phọ.

²⁸Kụ oye ọphel ạbidi ólho, ịdi eḍighi bọ ekpisi phọ ẹkelan rꞌaSaidon. Edi ẹpe Eḍiiny ạBet Rehob. Bịdi udoghoḍi ni ruutu kụ orughogh, kụ ọlo bịdi rꞌạbunon awe ụ́mooghan mụḅoph.

²⁹Kụ bịdi onme ḍien ẹmha phọ aLais kụ ọḅile oghol mọ ạDan, ọdaph ḍien ạDan ọony phọ ạJekob ọde ọde phọ ạbidi.

³⁰Awe phọ ạDan ụsighe ẹkaaneen ẹmugh phọ kụ oselemi ịlo ịyaar dị kọoḅereghi ghan, kụ ạJonatan ọony phọ aGersom ọony phọ aMozis, ọdi rꞌạnmuny phọ ọdi, oḍighi riil dị rọpinyonaan ghan rịkia bụo eghun phọ ạDan tụtu ẹteeny ḍio phọ ạḍiphe ophorogh bọ bịdi sịphe ade phọ ọsighe.

³¹Kụ ẹkaaneen ẹmugh phọ aMaika ạka bọ ịrol ghan ni sịphe phọ oomo amem mọ ạmuphe Ogbogo Ạdol Ẹnaan phọ ạrol bọ ẹpe Sailo.