Read abua Bụo Ịiruen 20 Bible Online

Bụo Ịiruen 20 - abua bible

Bụo Ịiruen 20

¹Oomo awe phọ Ịzirel ụnaghanan ni ḍịmagh phọ, emiigh kꞌẹpe Dạn ẹghi esiemi ẹpe Beersheba, ọḅaram rꞌạbuo ade ạGiliad. Kụ ḍita phọ ạbidi ookpomoghan egina esi dịadi oniin oye risigh Ọmoogh-we phọ ẹpe Mizpa.

²Kụ bụo ạrumhu awe oomo arughunughun phọ Ịzirel ọghi ọmeregha sịphe ookpomoghan awe phọ Ẹnaan, inya okuron ọonir awe dị orelhe owol kụ ọpham rolhool ẹgham.

³(Kụ eghun ạBenjamin ụnaghan mọ oomo ạbueri phọ awe Ịzirel mọghi ẹpe Mizpa.) Kụ awe phọ Ịzirel opuru mọ, “Ịḅeni iyoor ịpe eḍighi bọ kụ ịgbakian phọ ịphen phọ emite bọ.”

⁴Kụ ọnyo aLivai phọ oghiigh bọ ọyuga phọ ọdi, ạphagharanaan kụ ạḅeni bịdi mọ, “Mị ụghi Gibia ẹpe ade eghun ạBenjamin, mị rꞌọyuga phọ ạmi, kụ yoor ọrol esi ọmina ẹḅaal ḍịroor phọ.

⁵Kụ awe ạbuo aGibia phọ oru uzuom iyoor, kụ oko otu phọ yoor ọrol bọ okitonom ḍughul. Bịdi ụnya oghiigh ạmi kụ ọḅile osiph ọyuga phọ ạmi ọsighe ọphueghi dị amugh.

⁶Kụ mị ạsighe bọ ruzu phọ ọdi ạkiriph adiemi ḍioph rꞌịyal asibin, kụ ạsighe ạghiomaan oomo arughunughun phọ Ịzirel bin eghun, ịdi eḍighi bọ bịdi moḍighi ugbini ugbini, ạḅaphanya Ịzirel.

⁷Oomo phọ anyina edi bọ sịen ạbuo Ịzirel. Yira koḍighi ika ịlo ịphen phọ?”

⁸Kụ oomo phọ ạbidi oḅerenu dịadi oniin oye, kụ ọḅem mọ, “Ọnyo ayira kụ́tol, mụghumo atugh ogbogo mꞌogeny otu, dị kakeel kꞌọdi.

⁹Kụ nyịidipho ịduon kụ ịdi yira koḍighi we aGibia phọ. Yira kọsa ẹlhel kụ ọson opol awe dị kozuom we aGibia.

¹⁰Sịphe oomo arughunughun phọ Ịzirel kọsighe muniin abin esi aḍioph abin awe dị kọsighe eḍien olhe ọngo we ẹgham mọ. Bụeri phọ kọki Gibia ọliom we aGibia esi ẹkaraph eḍighinom ịyaar olhe-ẹmha phọ ịphen oḍighi bọ Ịzirel.”

¹¹Kụ oomo awe Ịzirel ookpomoghan ọḅoph ọnhu dịadi oniin oye ọghi ozuom ẹmha phọ.

¹²Kụ arughunughun phọ Ịzirel orom we orelhe yogh oomo ade eghun phọ ạBenjamin kụ opuru bịdi mọ, “Ịphen phọ eeghia ọdo ịkaraph dị nyina meḍighi?

¹³Nyịidipho imitiom reepheeny phọ ạbuen odi bọ Gibia ịngo iyoor, yoor ọze bịdi, ogbuurogh ịkaraph ọsighe ogbo Ịzirel.” Kụ eghun phọ ạBenjamin ọgunom ikpo ọnhu ạbueri phọ awe phọ Ịzirel.

¹⁴Kụ eghun phọ ạBenjamin omiteghu ẹpe ạramha phọ ạbidi ookpomoghan ọḅophoghan rꞌawe aGibia phọ ịlo eeghian ẹgham rꞌawe phọ Ịzirel.

¹⁵Kụ eghun phọ ạBenjamin ọson we sịphe ạramha phọ ạbidi omitiom, we dị ọman ịyaldi rꞌodiiny ọonir awe dị ọpham rolhool ẹgham, ụ́ḅaram we bụo aGibia. Kụ ogbi we dị bụo aGibia ọson omitiom ọman bọ oḍual okuron.

¹⁶Esi oomo awe phọ ạbuen phọ ọson bọ omitiom, ụman ni oḍual okuron awe dị roḍighinom ghan ịyaar ekeeny, we dị tọrobo ọnyo ạbidi katue ni bịn ạsighe ekpo kụ atoph ḍịlaal oye bịn dị kạ́piom.

¹⁷Ạbueri phọ arughunughun awe phọ Ịzirel uukpomoghi inya okuron ọonir awe dị ọngo ịtughemi ẹgham.

¹⁸Awe phọ Ịzirel uḅetenu ọghi ẹpe Bẹtel ọoḅereghi Ẹnaan kụ opuru mọ, “Sịphe ogbo phọ ayira, ạnhian kụ kạpur ạki ozuom kꞌạBenjamin phọ ẹgham?” Kụ Ọmoogh-we phọ ạḅeni bịdi mọ, “AJuda kụ ạphur ạghi.”

¹⁹Kụ awe phọ Ịzirel oḅon oḅetenu esoph ạḍiroor ọghi odoghoḍi rugbogo okoom Gibia.

²⁰Kụ awe phọ Ịzirel ọghi ịlo ozuom ẹgham eghun ạBenjamin; kụ bịdi osereghi we ẹgham mọ ạbidi ọrol ophogh ẹmha phọ.

²¹Kụ awe eghun phọ ạBenjamin ọḍua sịphe Gibia omite, kụ ophiemi we phọ Ịzirel osiemi ude ḍio phọ ạḍiphe ịyaldi rꞌịyal ọonir awe.

²²Kụ awe phọ Ịzirel ọghi ọoḅereghi kụ ọrol rꞌọto ghisigh Ọmoogh-we phọ tụtu kꞌadulhe kụ opuru mọ, “Yoor ọḅile ni ọghi eenom ẹgham rꞌeghun phọ ạBenjamin abumor phọ ayoor ḍụghum?” Kụ Ọmoogh-we phọ ạphagharanaan mọ, “Ịki ni eenom bịdi ẹgham.” Kụ awe phọ Ịzirel ọmoogh ọkparami oḅio kụ ọḅile osereghi we ẹgham mọ ạbidi sịphe eniin phọ esi phọ ẹpe osereghi bọ bịdi ẹḅel amem mọ.

²³

²⁴Kụ awe phọ Ịzirel oḅetenu ọghi oḍuraan ọobeeph kụ ozuom eghun phọ ạBenjamin ẹgham kẹn, sịen ịyal amem.

²⁵Kụ awe phọ ạBenjamin ọḍua sịphe Gibia omite ọghi ozuom bịdi ẹgham, rꞌegi phọ sịen ịyal aḍio, kụ ophiemi we phọ Ịzirel kẹn, osiemi ude ḍioph rꞌọphaanya ọonir awe dị ọngo ịtughemi ẹgham.

²⁶Kụ oomo awe phọ Ịzirel rꞌoomo awe ẹgham mọ ọghi Bẹtel kụ ọrol rꞌọto risigh Ọmoogh-we phọ kụ ọkaagh rọḍogh ạbidi ḍio phọ ạḍiphe tụtu kꞌadulhe. Bịdi ụphinyon ni rịkia oguom ạnian rꞌạrikia ẹboroph sịphe risigh Ọmoogh-we phọ.

²⁷Igbe Ịyo phọ Ẹnaan ịrol li ẹpe Bẹtel riiḍio phọ ịpe phọ, kụ ạFinehas ọony phọ Ẹliazar ọony phọ Eeron kụ aphogh ghan igbe phọ. Awe phọ upuru ni Ọmoogh-we phọ mọ, “Yoor ọḅile ni ọghi eeghian awe phọ ạBenjamin abumor phọ ayoor kụ ọwile?” Kụ Ọmoogh-we phọ ạḅeni bịdi mọ, “Ịki ni. Iḍue mị kạḅogh bịdi ịngo inyina.”

²⁸

²⁹Kụ awe phọ Ịzirel ọghi ọḅona yogh oko Gibia okitonom rokori ghan.

³⁰Kụ awe phọ Ịzirel ọghi oruphiom ẹgham eghun phọ ạBenjamin rꞌẹphen egi phọ sịen ịraar aḍio kụ osereghi ọrol ophogh Gibia ịdipho bịdi oḍighi ghan bọ ịyal phọ amem mọ.

³¹Awe phọ ạBenjamin umite ni ọghi ozuom we phọ Ịzirel ẹgham, ophorogh bịdi ọsighiogh sịphe ẹmha phọ, kụ okuphogh buniin sịphe ogbo awe phọ Ịzirel kụ ọze bịdi ịdipho ịyal phọ amem mọ, sịphe ịgbaranuom ịyal areten, eniin rẹki Bẹtel eniin rẹki Gibia rꞌịsiphe elegheḍum, we dị ọman ni ọghiom ịraardi awe Ịzirel.

³²Kụ awe phọ ạBenjamin ọḅem ghan mọ, “Yira mọḅile kẹn ọze bịdi ịdipho ịyal phọ amem mọ.” Kụ bịdi úlegheri mọ awe phọ Ịzirel ọḅem mọ, “Itu osumughu ọpham bịdi bịdi ọḍuanam sịen ẹmha phọ ọghimom ẹpe oḅodo phọ.”

³³Kụ mem dị ogbogh opol awe phọ Ịzirel omiigh bọ oḅula ọman kụ ọḅile ookpomoghan ẹpe Baal Tạmar, awe phọ Ịzirel bụphe ạaghian yogh bọ okoom ẹmha phọ aGibia, ạga phọ ọpo erumuḍio phọ remeel ghan bọ, egina amem bịn umiteghu ni ẹpe ariisi asighiigh phọ bịdi ọrologhu bọ.

³⁴Kụ awe dị ọman ḍioph ọonir awe, bụphe awe phọ Ịzirel ọson bọ umite bịn ozuom Gibia, kụ ẹgham mọ elegheri ẹkpar. Kụ awe phọ ạBenjamin úlegheri mọ ịiḅaghami metuman bụno.

³⁵Kụ Ọmoogh-we phọ aphiemi we phọ ạBenjamin esomanan awe phọ Ịzirel. Kụ awe phọ Ịzirel ḍio phọ ạḍiphe ọze ịyaldi rꞌoogh ọonir rꞌoniin okuron awe; oomo phọ ạbuen phọ ạbudi ọphamagh ni rolhool ẹgham.

³⁶Kụ awe phọ ạBenjamin ọmiin mọ mophiemi bụno. Ogbogh opol awe ẹgham mọ Ịzirel uḅula ọman esi awe phọ ạBenjamin, ịdi eḍighi bọ bịdi uḍuom ologhi we phọ ạbidi ạaghian yogh bọ rokori ghan bọ ozuom awe aGibia phọ.

³⁷Awe phọ ạbuphe ạaghian yogh bọ uugborion bịn oghiil ọghi ozuom we aGibia. Awe phọ ạaghian yogh bọ ọwalala ẹmha phọ kụ ọsighe ḍịmaam elhool ẹgham ọziom oomo awe phọ.

³⁸Eḍeenaan dị awe phọ Ịzirel rꞌạbuphe ạaghian yogh bọ momeera ịduon: mem dị awe phọ Ịzirel ọmiin nịan dị ọkpooni rꞌạmughi dị amiteghu sịphe ẹmha phọ, bịdi kolegheriom mọ amem mọ mẹteeny ọḍua ẹpe ẹgham mọ oḅula. Mem mọ ạmuen phọ awe phọ ạBenjamin mọze ni we dị ọman ịraardi awe kụ ọotughian mọ, “Yira mọkpar ri opu bịdi ịdipho ịyal phọ amem mọ.”

³⁹

⁴⁰Pọ kụ amem dị eḍeenaan phọ imite ni: ọotu ạmughi amiigh omite ịpa ẹmha phọ ọghi ạnyu. Awe phọ ạBenjamin uphogh ni ọman ạbidi kụ eḍighi iikia ọmiin dị oomo ẹmha phọ kụ reemor nịan.

⁴¹Kụ awe phọ Ịzirel ooghiraan, kụ iloghi awe eghun ạBenjamin ẹkonono yogh ịduon bịdi molhegheri bọ mọ bụno mophe omuneen.

⁴²Kụ bịdi ọgumom ọman we phọ Ịzirel osomori risigh ạbidi ẹpe rẹki bọ ẹpe ẹdala phọ, kụ ẹgham mọ esophoghom bịdi, kụ bụphe ọḍua bọ sịphe ẹmha phọ romite ọḅophoghian bụphe ạaghian yogh bọ ẹpe eḍum mọ. Romite bịn kụ ọze bịdi.

⁴³Kụ bịdi osophoghom we eghun phọ ạBenjamin oko bịdi okitonom, ophorogh bịdi ọozeghiom ruwol esi dị bịdi ọrol ropooghian osiemi ẹpe emitenom erumuḍio phọ aGibia.

⁴⁴Ḍioph rꞌọphaanya ọonir igeny awe ẹgham ạBenjamin kụ ẹdi ọze.

⁴⁵Bụeri phọ uughiraan kụ oghiil osoman ẹpe ẹdala phọ, ọghi ẹpe Aḍighiigh ạRimon. Oogh ọonir awe ạbidi ụze ẹpe elhom eten phọ kụ ophorogh bụeri phọ osiemi Gidom kụ ọze ịyal ọonir awe.

⁴⁶Abugey awe eghun phọ ạBenjamin dị ọze ḍio phọ ạḍiphe ụman ni ịyaldi rꞌoogh ọonir awe bụdi ọphamagh ni rolhool ẹgham; oomo phọ ạbidi ikpolom awe.

⁴⁷Odiiny okuron awe ughiil li osumughu ẹpe ẹdala phọ kụ ọghi osi ẹpe Aḍighiigh ạRimon, kụ ọrol ẹpe inya ụnwanyu.

⁴⁸Kụ awe phọ Ịzirel oḅula kụ ọze bụeri phọ awe eghun phọ ạBenjamin, oomo alephiri, rꞌạnmariir, rꞌạnmuny, rꞌịnam mọ ạbidi. Bịdi ụlogh ni nịan tọrobo ẹmha dị ẹrol eelhe phọ.