Read abua Bụo Ịiruen 21 Bible Online

Bụo Ịiruen 21 - abua bible

Bụo Ịiruen 21

¹Mem mọ awe phọ Ịzirel ookpomoghan bọ ẹpe Mizpa, bịdi uguanaan ni Ọmoogh-we phọ mọ bụno kómeera ọnyo ạBenjamin aphin ọnyani ạbuno.

²Kụ iḍighi kụ awe phọ Ịzirel ọghi ẹpe Bẹtel kụ ọrol sịphe risigh Ẹnaan tụtu kꞌadulhe. Rꞌokururu rꞌọto dị aganana kụ ẹdi ọrolom romoghi yogh mọ,

³“Ọmoogh-we Ẹnaan phọ Ịzirel, uḍighi ika kụ ịphen phọ remite bọ: rodon eniin eghun repe sịen Ịzirel?”

⁴Eḅon ạḍiroor ạḍieri phọ aḍio phọ kụ awe ọkan esi phọ ịsiphe phọ enmeny ạrikia, kụ ọphinyon ẹkia oguom ạnian rꞌẹkia ẹboroph.

⁵Kụ awe phọ Ịzirel opuru sịphe ogbo phọ ạbidi mọ, “Ạnhian sịphe aḍita arughunughun phọ Ịzirel kụ ẹdi útu aani bọ sịphe ookpomoghan phọ Ọmoogh-we phọ?” Ịyaar phọ eḍighi bọ bịdi ughunyian ni mọ tọrotoro oye lọ útu aani risigh Ọmoogh-we phọ ẹpe Mizpa pọ kokiigh ni.

⁶Kụ awe phọ Ịzirel ọotughian eghun ạBenjamin umor phọ ạbidi, kụ ọḅem mọ, “Mosoph eniin eghun ọsighe sịen Ịzirel.

⁷Yira koḍighi ika ịlo apineen esi ạbuphe nmạriir kőphinogh bọ, yira modoghoḍi bọ ịnhu risigh Ọmoogh-we phọ kụ ọḅem mọ yira kọ́ngo nmạnyaan ayira bịdi ophinogh.”

⁸Mem dị bịdi opuru ghan mọ, “Ạnhian kụ asugha bọ sịphe arughunughun phọ Ịzirel dị útu aani bọ risigh Ọmoogh-we phọ ẹpe Mizpa?” bịdi ụwa ni omitiom mọ rꞌoniin oye ọlo Jabes Gịliad ọ́ghi.

⁹Sịphe asiḍien ạbuo ẹgham mọ ọomaghagh bọ, rꞌoniin oye ómegheron.

¹⁰Kụ ookpomoghan phọ orom ḍioph rꞌịyal ọonir ikpolom ạbuo ẹgham rꞌịikpo mọ, “Ịki ẹze we phọ bụphe orugh bọ ẹpe Jabes Gịliad, ẹḅaram lephiri, rꞌạnmariir, rꞌịbam ạnmuny.

¹¹Ịduon kụ ịdi nyina keḍighi bọ, ikiigh ghan tọrobo olephiri ọony rꞌọnyani lọ mọrolan ghan esi.”

¹²Kụ bịdi ọmiin ẹpe phọ, sịphe ogbo ạbuphe orugh bọ ẹpe Jabes Gịliad, inya okuron arisina ạnmanyaan dị oye rꞌạbidi kọ̋rolan ghan esi, kụ bịdi ọpham nmạnyaan phọ ạbuen osiom ẹpe arugbogo phọ ạbidi ẹpe Sailo ẹpe ade phọ aKenan.

¹³Kụ aḍita ookpomoghan phọ orom we mọ ọghi ọghaaphan rꞌawe ạBenjamin bụphe orugh bọ ẹpe Aḍighiigh ạRimon, kụ oguanaan okureri ẹgham mọ.

¹⁴Awe phọ ạBenjamin ụḅile ni oru, kụ ạbueri phọ awe phọ Ịzirel ọngo bịdi nmạriir ilom nmạnyaan phọ ạbuphe bịdi osiphi bọ ẹpe Jabes Gịliad ọpham orighelom, kụ ọlo ạnmariir phọ ụ́gbaanyan bịdi ụ́kasian.

¹⁵Kụ awe phọ Ịzirel onme ịitughian ạbidi kụ uḍur eghun phọ ạBenjamin ụloghoma, ịdi eḍighi bọ Ọmoogh-we phọ mạay rughunughun phọ Ịzirel.

¹⁶Kụ ikumoor awe sịphe ookpomoghan phọ opuru mọ, “Ạnmariir úlho mun eghun phọ ạBenjamin. Yira kọwa ni reten ịdi eghun phọ ạBenjamin kẹmeera.

¹⁷Ị́nighe dị kọze eniin eghun ọmadan kꞌỊzirel. Ạbuanhian kụ kọmaranaan nmụny ọngo bụphe kꞌạBenjamin okpetenaan bọ?

¹⁸Kụ ọlo, yira kómeera bịdi ophinogh nmạnyaan ayira, ịdi eḍighi bọ awe phọ Ịzirel modoghoḍi ịnhu okunya ọḅem mọ ‘Itulughian ẹrolonaan tọrobo oye lọ ạngo ọnyani ọdi ọlo kꞌạBenjamin mọ aphin.’”

¹⁹Kụ bịdi ọotughian mọ, “Ẹyaal ạlha etum lhạ Ọmoogh-we phọ edi ghan bọ ẹpe Sailo rẹkpul li.” (ASailo odi ạga ephunom ạBetel, ẹpe emitenom erumuḍio, eten phọ rẹki bọ ạBetel rꞌạSekem, ẹpe esoorom aLebona.)

²⁰Kụ bịdi ọto ọḅeni we eghun phọ ạBenjamin mọ, “Ịki ạaghian yogh ẹpe iizo ireeny iimuma avain kụ ekori.

²¹Mem dị ạnmanyaan ạbuo aSailo phọ komiteghu ọgher ịḅa mem ẹyaal phọ, tọrobo ọnyo anyina asiph oniin ọnyani kụ ạpham agheelom aḍighi ạnir ọdi ẹpe eelhe phọ ạBenjamin.

²²Eḍighi ịyaar dị ạburude phọ, mꞌabumor phọ, kụ oru ịteeny inyina kụ rọḅa, ịḅem mọ, ‘Seseeny, ịbile yoor ọpham aani bụen phọ, loor esi dị yoor inyina ị́aar nmạnyaan phọ mem ẹgham oḍighi ạnmariir ayoor. Kụ nyina kẹn iyoor ị́ngo, pọ ologh aruguanaan phọ inyina ị́pham.’”

²³Eghun phọ ạBenjamin ụtuugh ni ịpe ọḅeni bọ bịdi oḍighi. Tọrobo ọnyo ạbidi ạsaḅar ri oniin sịphe ạnmanyaan phọ rọker bọ ịḅa phọ ẹpe Sailo ạpham agheelom aḍighi ạnir ọdi. Kụ bịdi oḅula ẹpe eelhe phọ ạbidi, oselemi rạmha phọ kụ orugh sịphe.

²⁴Kụ awe phọ Ịzirel ọḍuaghu sịphe phọ ọgbaranaan mem mọ ạmuphe phọ, tọrobo oye agheel ọto ọdi, eghun ạbidi; kụ bịdi ọḍuaghu sịphe phọ ogheleghu uwo abin ẹmoogh ẹlo ọdi rꞌẹlo ọdi.

²⁵Mem mọ ạmuphe phọ ọdaam ọ́rol Ịzirel, kụ tọrobo oye aḍighi yogh ghan ni bịn ịlo ẹḅeeraan nyọdi.