Read abua Bụo Ịiruen 3 Bible Online

Bụo Ịiruen 3 - abua bible

Bụo Ịiruen 3

¹Ịphen kụ areelhe phọ Ọmoogh-we phọ ạwile bọ aseere ịlo ọsighe ghan ọdegheghom awe Ịzirel, ḍita ạbuo Ịzirel phọ úlegheri aani bọ ịlo ạraagham mọ aKenan,

²ọbo oomo oghiil awe Ịzirel olegheri ịlo ẹgham, ọbo ọdi ạtughemi bụphe kọ̋ghi ghan bọ ẹgham.

³Ịphen kụ areelhe phọ: oogh ạramha phọ ạbuo aFilistia, rꞌoomo awe ạbuo aKenan rꞌaSaidon, rꞌạbuo aHivait phọ orugh bọ ẹpe ạraaḅaraph phọ ạLebanon, emiigh sịphe Eegum aBaal Hẹrmon ẹsighe ẹghi esi ẹpe eḍighom ạHamat.

⁴Bụen phọ kụ kọdeghogh bọ Ịzirel opogh, olegheri mụghumo Ịzirel kọnaghanan ni iilogh phọ Ọmoogh-we phọ, ịpe ọdi ạḅeni bọ Mozis, ạlogh bọ ạngo bụrude phọ ạbidi.

⁵Kụ awe phọ Ịzirel rꞌaKenanait phọ rꞌạHitait phọ rꞌẠmorait phọ rꞌạPerezait phọ rꞌaHivait rꞌaJebusait phọ kụ urughan yogh.

⁶Bịdi ophinighan yogh nmạnyaan awe phọ ạbuen phọ kụ ọsighe nmạnyaan phọ ạbidi ọnughenyan yogh nmụny awe phọ, kụ ooseeny ghan rụmugh phọ ạbidi.

⁷Kụ awe phọ Ịzirel oḍighi ịkaraph risigh Ọmoogh-we phọ; oghel Ọmoogh-we Ẹnaan phọ ạbidi, kụ ooseeny ghan Baal rꞌAsera.

⁸Kụ ẹghagh ologhi Ọmoogh-we phọ, kụ ạghagham we Ịzirel ologhi kụ ạsighe bịdi aalha Kusan Risataim ọdaam mọ aMesopotamia dị ạda bịdi ọphaanya ạsia.

⁹Reḍighi ịdipho, kụ awe phọ Ịzirel omoghi ọmagh Ọmoogh-we phọ, kụ Ọmoogh-we phọ amitiom ọpelia dị kạpel Ịzirel. Ọtniel ọony phọ aKenaz ọbam umor phọ ạKeleb kụ ạphel bịdi.

¹⁰Uwaloor Ọmoogh-we phọ aḍigh loor ọdi; kụ ọdi aagboonaan ghan we Ịzirel ịiruen. Kụ ọdi aḅetenu ạghi eenom ẹgham rꞌaKusan Risataim kụ Ọmoogh-we phọ ạḅogh bịdi ạngo nyọdi, kụ ọdi ạkpar apu bịdi.

¹¹Kụ ade phọ ẹpho ephooghian inyadi ạsia, kụ Ọtniel ọony phọ aKenaz agbi omugh.

¹²Kụ awe phọ Ịzirel ọḅile kẹn oḍighi ịkaraph risigh Ọmoogh-we phọ; kụ Ọmoogh-we phọ ạngo ịikpo Ọdaam Ẹglon ạMoab mọ azuom Ịzirel ẹgham, ịdi eḍighi bọ bịdi moḍighi ịkaraph risigh Ọmoogh-we phọ.

¹³Ọdi aakpomoghi Amonait phọ rꞌẠmalekait phọ, kụ bịdi ọghi kụ ọkpar opu we phọ Ịzirel. Kụ bịdi ọsighe ọmoogh Jeriko, ẹmha areelhe phọ.

¹⁴Kụ awe phọ Ịzirel okumu Ọdaam Ẹglon ạMoab ḍioph rꞌọphaanya ạsia.

¹⁵Kụ awe phọ Ịzirel omoghiom Ọmoogh-we phọ, kụ Ọmoogh-we phọ amitiom ọpelia dị kạpel bịdi, Ehud ọony phọ aGera ọlo ạBenjamin, oye ạḍighaagh ekeeny. Kụ awe phọ Ịzirel ọsighe ruunmo ọngo nyọdi mọ ạsighe ạghi ạngo Ọdaam Ẹglon ạMoab.

¹⁶Kụ Ehud ạlhem elhool ẹgham ịyal ọman, dị ạḍidoony phọ ẹghiom ni ooghdi ạrukulom ạghunugh kụ ạsighe ạgbana ologhi arukpe phọ ọdi, ịgolom elhiom.

¹⁷Kụ ọdi ạsighe ruunmo phọ ạghi ạngo Ọdaam Ẹglon ạMoab. Ẹglon aḍighi oye dị ạbugh ekpo.

¹⁸Kụ Ehud rọsighe bọ ruunmo phọ rọngo ọdaam mọ, bịn ạḅeni we phọ ọpham bọ ruunmo phọ ọdapham bọ nyọdi mọ ikeel.

¹⁹Ogina ọdi akiton ọman ẹpe ịkaaghineen asighiigh phọ edi bọ, etuman bọ Gịlgal abula, kụ ạḅeni ọdaam mọ mọ, “Mị ạmoogh ni dom ịbooghian dị mị kạḅeni nyịna.” Kụ ọdaam mọ ạḅeni butelhedom mọ ọdi mọ, “Ịḍua ịwile iyoor.” Kụ oomo awe phọ ọrol bọ ọḍuaghu.

²⁰Kụ Ehud ạsiiny ạnyu asi ọsoph phọ ạpho bọ ọpo ọdaam mọ ạrolom bọ ạgada ọdi, ogina ọdi bịn odi bọ, kụ Ehud ạḅeni nyọdi mọ, “Ẹnaan irom ni ịmi dom ọḅeni ạna.” Kụ ọdi aḅetenu bịn ạmeera.

²¹Ehud ạsighe ḍịghaagh ekeeny phọ ọdi ạphamaam elhool ẹgham mọ dị ạgbanaan bọ ịgolom elhiom mọ ọdi kụ agim ọkuruḅaka phọ ọdi akputon.

²²Kụ ẹmhu elhool ẹgham mọ ẹdaphan rꞌarisigh elhool phọ eḍigh ologhi kụ ẹnuum mọ eekpereghiom oomo elhool phọ kụ dị órue mun ọkpoton elhool phọ ọsighe sịphe ọkuruḅaka phọ ọdi bịn ẹghi ekputon ẹeniom mọ ọdi.

²³Kụ Ehud amite erugh, kụ aghughi yogh otu phọ ạkasaghi, kụ ạḍua.

²⁴Ọdi romite rọḍua, kụ abutelhedom ọdaam mọ oru ophogh ọdi, kụ ọmiin mọ oomo ịnhu-aḍibuo ịpe ogbotu phọ ọkasaghi ni, kụ bịdi ugbiom ghan mọ ọdi odi ẹpe osoph phọ ramunum munum.

²⁵Bịdi okori okori ịdi ẹkasian oghughuron eghuugh phọ. Úkughuron, kụ bịdi ọsighe ịsabi ọkagharanam oghughuron ọnhu-aḍibuo ologhi osoph otu phọ. Bịdi ophogh bọ, ọde-otu phọ ạbidi ạmina ni bịn sịphe oopho ude phọ ọdi mamugh.

²⁶Bịdi roobinya bọ kụ Ehud aagborion atenom ịkaaghineen asighiigh phọ, asuma ạghi ẹpe Seira.

²⁷Kụ ọdi rọghi rosi ẹpe eelhe aroogbolom mọ Ifraim kụ ọdi aphula ọkuodu ọmagham awe Ịzirel ọghi ẹgham; kụ aḍiemiom bịdi kꞌẹpe aroogbolom mọ.

²⁸Kụ ọdi ạḅeni bịdi mọ, “Ịdaph ịmi, ịdi eḍighi bọ Ọmoogh-we phọ mạḅogh bụmulogh-ḍien phọ anyina bụo ạMoab phọ ịngo inyina.” Kụ bịdi ọdaph nyọdi ọghi osi ịpaḅi ạJodan ọsighe ạarom ḍịghaagh ạbuo ạMoabait phọ, kụ úmeera mun mọ oye ạḅeeny aphun ẹphen.

²⁹Kụ awe ạMoab dị bịdi ọze mem mọ ạmuphe ụghiom ni ḍioph ọonir awe. Sịphe oomo phọ awe phọ ạbuphe ọmoogh bọ ịikpo, ọlo akpetenaan bịdi ọ́rol.

³⁰Ḍio phọ ạḍiphe phọ kụ ẹdi awe Ịzirel ọkpar opu we ạMoab. Kụ ade phọ ẹpho ephooghian ọphaanyadi ạsia.

³¹Kụ reten nyọdi, kụ ẹteeny Samgar ọony phọ Anat. Ọdi ạsighe ọsiosio ọkolhom dị rọoḅakiom ghan sịnam kụ ạziom odiiny okuron awe ạbuo aFilistia. Ọdi ạḅile kẹn ạphel we Ịzirel.