Read abua 3 Jọn 1 Bible Online

3 Jọn 1 - abua bible

3 Jọn 1

¹Mị okumoor oye phọ kụ ụge ḍịnya phọ ạḍien raruomaan nyịna ooḅi ạGayos ọpo mị ạphomoghian bọ ni igey.

²Ooḅi ọnyo asiya, mị rạaḅereghi ghan Ẹnaan mọ edughom rꞌomoon aloor kụ ẹrolonaan nyịna, ịdipho mị alegheri bọ ni mọ ẹnighenaan ni uwaloor phọ ạna.

³Ịḅaal li ologhi ạmi iboom mem dị buniin asiya oru bọ osi kụ ụḅeni bọ ịmi mọ nạ ạkoloma ni ragbeelom igey phọ, ḅịle kẹn mọ nạ ạtuugh ni dọl igey phọ kụ odi.

⁴Ọḅaal ologhi dị apu ọnaghan mọ ạnmuny phọ ạmi odimom ni igey phọ ólho.

⁵Ooḅi ọnyo asiya, ạroozo phọ ạna eelenyan ni sịphe oḍighi phọ nạ raḍighinaan ghan bọ bụo asiya phọ, ghạlamo rꞌesi ạbuphe oḍighi bọ ni ruuruen.

⁶Bịdi mọghaaph ni ịlo ẹphomoghian phọ ạna ọḅeni bụo ạsiosi phọ ẹphen. Lọghonaan ni bịdi ḍịghaagh reten dị ẹkasian rꞌịpe Ẹnaan phọ yira rokumu bọ kọngo kụ bịdi ọḅile omiigh erelhe phọ ạbidi,

⁷ịdi eḍighi bọ bịdi oghol bọ Kraist kụ oḅetenu bọ erelhe phọ, úmeera ụboor ịyaar ḍịghaagh ạbuo aruru phọ.

⁸Esi ịduon phọ, ẹkpe ni dị yira kọloghoma ọdo awe phọ ạbuen, pịdi yira oḍighi bụḅarama ạbidi sịphe ọghaaph igey phọ oleenye.

⁹Mị mạge ni ẹphurukpu ạraraar atuomaan bụo ạsiosi phọ; kụ aDiotrefis phọ raaka ghan bọ oḍighi uwo ẹmhu phọ rạ́naghanan ghan ịlo mị ạghaaph.

¹⁰Ḍio lọ mị aru, mị kạkaaph ni aagurion oomo phọ ịpe ọdi raḍighi yogh ghan bọ, rꞌịkaraph ikpo ọnhu phọ ọdi ruroḅologhiom ghan bọ ịmi. Ịphen phọ bịn nyọdi ị́gbaanyan ni. Rámeera ghan kẹn kạlogh otu bụo asiya phọ. Ạḅile kẹn ni ramirighan ghan bụlo rọwa ọlogh ạbidi otu, rámeera ghan mọ bịdi ọḅile ọrol sịphe ookpomoghan ạbuo ạsiosi phọ.

¹¹Ooḅi ọnyo asiya, kạ́ta ghan ịkaraph, tạ ghan ghụn igey. Oye lọ raḍighi ghan igey, pọ ọlo kꞌẸnaan. Oye lọ raḍighi ghan ịkaraph, pọ kőlhegheri Ẹnaan.

¹²Tọrobo oye rạkaaph ghan ni eeḅi ẹrolom ạDemetrios, kụ igey phọ emeeraam ni ịphen phọ. Mị kẹn bịn alegheri aani ni eeḅi ẹzo phọ ọdi, kụ nạ alegheri ni mọ ọkpe ólho ghan ẹghaaphom-ịyaar ạmi.

¹³Mị ạmoogh ni iboom ạraraar ọḅeni ạna, kụ mị ụ́wa ọsighe ọgeom rꞌiki kụ ọgeom oruom ạna.

¹⁴Mị aḍuom ni ologhi mọ mị kạnuun ni ạmiin nyịna dị yira kọkaaphan.

¹⁵Ẹepho ẹrolonaan nyịna! Ạrighiri phọ ạna mopuru nyịna. Upurunaan rịghiri phọ ayoor oniin atum nyoniin!