Read abua Ogonanami Phọ 1 Bible Online

Ogonanami Phọ 1 - abua bible

Ogonanami Phọ 1

¹Ịphen ịlo ạraraar phọ Ẹnaan eḍeenaan bọ Jịzos Kraist mọ kẹnuun ni emiteghu phọ. ẠJizos Kraist arom ni oniin ọokpaany Ẹnaan mọ ạghi ạteeny Jọn oye oḍighi phọ ọno ạḅeni mọ agananami ịphen phọ aḍeenaan bụphe roḍighi bọ oḍighi kọngo Ẹnaan.

²ẠJon mạgba oomo ịpe ọdi ạmiin bọ amitiom rạkaaph ghan ọghaaph phọ Ẹnaan rꞌịpe ạJizos Kraist agananami bọ.

³Iboh kꞌẸnaan edianaan ni tọrobo oye lọ rạbal ikpo ọnhu ịmiin phọ ịphen kamitiom, rꞌạbuphe rọnaghanan bọ, rꞌạbuphe rọdaph bọ oroma ạḍinya phọ ạḍien, ịdi eḍighi bọ esugha ẹnum bịn oomo ạraraar phọ ịphen kemiteghu ni.

⁴ Mị ạJon kụ ụge ratuomaan bụo oḍual ạsiosi phọ Esia. Ạḍiseph rꞌẹepho kꞌỌpo odi bọ kụ ạrol bọ kụ katu bọ, ḅịle kꞌoḍual aruwaloor phọ edi bọ ghisigh ạgada ọdaam ẹmha phọ, ḅịle kꞌạJizos Kraist phọ ụ́gba ghan bọ ụloghom kụoom mọ, Ọkpana sịphe ạbuphe oḅerion bọ esi aḍuugh phọ, Ọdaam ạbudaam aḅirini phọ, ịrolonaan inyina! Ọdi ụphomoghian ghan iyira kụ mạsighe ịḅaal phọ ọdi ụtagharanam iyira esi ịkaraph phọ ayira,

⁶ạḅile uḍighi iyira ọmar ariil ạrikia dị roḍighi ghan oḍighi kọngo Ẹnaan rꞌỌde phọ ọdi. Igbogh rꞌịikpo ẹrolonaan Jịzos Kraist kꞌagee-pọ kꞌagee-pọ! Ẹrol li ịdipho!

⁷Ịmiin, ọdi ratumom ni rꞌọotu. Oomo awe, ọḅaram bụphe ogimogh bọ nyọdi, kọmiin ni nyọdi. Oomo areelhe aḅirini phọ komeelom ni ọto loor ẹmhu ọdi. Ịduon phọ ni. Ẹrol li ịdipho!

⁸Ẹnaan Oomo Ịikpo, Ọmoogh-we phọ ọpo odi bọ kụ ạrol bọ kụ katu bọ, ẹḅem mọ, “Mị kụ Ạlfa rꞌOmega, emiighom mọ rꞌeekuna phọ.”

⁹Mị ạJon, ọnyo asiya phọ, ọpo rꞌanyina ẹḅophoghan bọ Jịzos ephin bin ịminimiin phọ rꞌọmar phọ rꞌọkparam mọ, ụtuan ni ọghaaph phọ Ẹnaan rꞌịpe ạJizos Kraist agananami bọ ạrol ekpu-ogbo dị oghol mọ ạPatmos.

¹⁰Ḍughul otu phọ rooseeny ghan bọ Ọmoogh-we phọ, Uwaloor phọ uphum ni ịmi kụ mị ạnaghan eboom ẹḍogh dị ẹḅa ghan ọman ạmi ịdipho ọkuodu,

¹¹kụ ẹḅem mọ, “Gẹ ịphen nạ rạmiin bọ kụ ạsighe ḍịnya phọ ạghiom oḍual ạsiosi phọ ịphen: Ẹfesos, rꞌaSimana, rꞌaPagamom, rꞌaTiatira, rꞌạSaadis, rꞌaFiladelfia, rꞌaLodisia.”

¹²Mị ukiton ni aphogh ọmiin oye phọ ạghaaph ghan bọ ịphen phọ rụḅeni ịmi. Kụ mị ạmiin oḍual ịtozi dị ọkaaghiom gol.

¹³Oye dị ạrol mụdi odi ni eye ạmeera ni sịphe ogbo phọ. Ạkpologhian ogudaguda ạsuoma dị ọsighe okuughaam agol okuughom ekpologhi phọ.

¹⁴Ạsilaal ẹmhu phọ ọdi ịḅaal fororo ịdipho eriri-ogho rꞌibikpo. Ariḍien phọ ọdi iimor ịdipho ạnian.

¹⁵Ạrada aruwol phọ ọdi ịmu ịdipho enaba dị mọozaghami kụ ọmaar ogbuurogh ọḅaalami. Ẹḍogh phọ ọdi ighur ịdipho ạmuum dị akil rasoroghu oolhe.

¹⁶Ọdi ạpham oḍual ạraanaan ḍịghaagh elhiom mọ ọdi, kụ ẹrue-rụe elhool ẹgham ịyal ọman epuka ọnhu ọdi. Aghisigh phọ ọdi ạraphan ịdipho erumuḍio dị meeleeny.

¹⁷Mị ạmiin bọ nyọdi, mị uḅololo ni sịphe aruwol phọ ọdi mụdi mị mamugh. Kụ ọdi ụḅamam ịmi ḍịghaagh elhiom mọ ọdi kụ ạḅem mọ, “Kákiilaan mun. Mị kụ emiighom mọ rꞌeekuna phọ ni.

¹⁸Mị kụ ọdi odi ghan bọ ni. Mị umugh ni, kụ pogh aani, mị odi ni kꞌagee-pọ kꞌagee-pọ. Mị kụ ụpham ịsabi aḍuugh rꞌọmar iḍim.

¹⁹Gẹ nụun rạraar phọ nạ ạmiin bọ. Ḅạraghi ni ịpe edi bọ nyịidipho rꞌịpe kemite bọ.

²⁰Mogananami ẹmhu oḍual ạraanaan phọ nạ ạmiin bọ ḍịghaagh elhiom mọ ạmi, ḅịle rꞌẹmhu oḍual ịtozi phọ ọkaaghiom bọ gol phọ ịduon: oḍual ạraanaan phọ, pọ ạruukpaany phọ Ẹnaan repogh bọ oḍual ạsiosi phọ, ḅịle oḍual ịtozi phọ, pọ oḍual ạsiosi phọ.”