Read abua Ogonanami Phọ 14 Bible Online

Ogonanami Phọ 14 - abua bible

Ogonanami Phọ 14

¹Kụ mị ụḅile ni aphogh kụ ạmiin Mọony Oyool-ọga dị ạmeera ạnyu Eegum ạZayon. Awe dị ọrolan bọ nyọdi dị ọgeeghi rolhor phọ ạbidi ḍien phọ ọdi rꞌaḍien Ọde phọ ọdi ụman ni oniin okuron inyadi rꞌinya ọonir.

²Kụ mị ạnaghan ẹḍogh ạḍiaḅa ẹpe kꞌạke dị ẹghigh ḍịo ạmuum dị akil rasoroghu oolhe, rꞌịdipho ạḍio ọomaany dị rạtaphan. Ẹḍogh phọ mị ạnaghan bọ ịghigh ọnhu iitia arugumogum dị ạbuo ạsuor rotiighi.

³Bịdi ụmeregha ni osoman ạgada ọdaam mọ rꞌinya ạraraar phọ ẹmoogh bọ ḍiphooghu phọ rꞌikumoor awe phọ, kụ ọmoor ḍimoom ạḍuor dị ọnon oye mútue ụtuugha emuton oniin okuron inyadi rꞌinya ọonir awe phọ mọtagharan bọ ọsighe ọḍuanam sịen ade phọ.

⁴Bịdi kụ awe phọ ruwaloor phọ ạbidi ụ́puenaan bọ, ịdipho ạregelenya dị kọ̋rolan ghan esi rꞌạnmariir. Bịdi rọdaph ghan ni Mọony Oyool-ọga phọ tọrobo ekpisi lọ ọdi rạki. Mọtagharan bịdi ọsighe rạghaagh ạbueri phọ awe aḅirini phọ, mọ oḍighi iimuma phọ ogbiom bọ ạya phọ ọngo Ẹnaan rꞌỌony Oyool-ọga phọ.

⁵Kọ́naghan ghan mọ bịdi ọgba ọkpe. Bịdi ọpioman ụ́moogh.

⁶Kụ mị ụḅile ni ạmiin ọnon ọokpaany dị rạpeeph kꞌẹpe eekuna okuaḍio phọ. Ọdi ạpham ni dom ooḅi ọghaaph kꞌagee-pọ phọ, kụ aru ọghaaph omitiom ọḅeni awe oomo areelhe phọ rꞌarughunughun rꞌạrunhu rꞌạramha oomo aḅirini phọ.

⁷Ọdi ạlho ni ạghiom ạnyu mọ, “Ịlogh eegu Ẹnaan eghueni igbogh phọ ọdi. Mẹteeny mem mọ ọdi kaagboonaan bọ ịiruen oomo aḅirini phọ. Ikpuḍughian ghisigh Ẹnaan eeseeny nyọdi phọ ạlhem bọ kẹ phọ rꞌade phọ rꞌọphiiny phọ rꞌạruunu adir phọ.”

⁸Ọnon ọokpaany Ẹnaan ạdaph ni ạḅem aani mọ, “Ọdi phọ mameel. Eboom mọ ẹmha phọ ạBabilon ẹmeleghi bọ mụkaraph amiim ipesi phọ ọdi kụ ẹkpaariom bọ mọ oomo areelhe phọ ọphughol phọ memeel.”

⁹Ọokpaany dị amuneniom ịraar ạdaph aani ni ịyal ạbuḅel phọ kụ ạlho ạghiom ạnyu mọ, “Tọrobo oye lọ aaseeny ghan elhom ẹnam mọ rꞌịyaar ọotughianam ghan ọdi phọ kụ ạlogha aani elegh elhor phọ mꞌạḍighaagh phọ ọdi

¹⁰kạpughol aani ni miim ọghagh ologhi phọ Ẹnaan, mụphe ụ́pueri bọ kụ ọdi mạlhogh bọ ni amuzeḍi ọphaal ạghelhe phọ ọdi. Kọsighe nịan rꞌạsolfa ọmiiniom oomo ạbulo oḍighi ịphen phọ ghisigh ạruukpaany phọ Ẹnaan ḅịle rꞌỌony Oyool-ọga phọ.

¹¹Ạmughi ạnian phọ rẹmiine bọ bịdi rạki ghan ạnyu kꞌagee-pọ kꞌagee-pọ. Kétighom eepoogh ḍughul rꞌootaany bụphe ooseeny ghan bọ elhom ẹnam mọ rꞌịyaar ọotughianam ghan ọdi phọ, rꞌọlo ạlogha aani elegh aḍien elhom ẹnam mọ.”

¹²Ịphen phọ regbologh ghan mọ awe phọ Ẹnaan rooko ghan bọ iilogh phọ, ọḅile bọ roseere ghan ologhi phọ ạbidi esi ạJizos, ọmoogh ọkparam.

¹³Kụ mị ụḅile ni ạnaghan ẹḍogh dị rẹḅa ghan ẹpe kꞌạke mọ, “Gẹ ịphen. Emiigh nyịidipho ẹghiom ghisigh, iboh kꞌẸnaan edianaan ni bụphe oḍighi ghan bọ oḍighi ọngo Ọmoogh-we phọ kụ momuughu bọ.” Kụ Uwaloor phọ mọ, “Ịduon phọ ni. Bịdi kopooghian aani rukumuan phọ ạbidi. Eḍu oḍighi phọ ạbidi kẹdaph ni bịdi.”

¹⁴Kụ mị ụḅile ni aphogh kụ ạmiin ọphalaḅaal ọotu. Oye dị ạghigh mụdi odi ni eye ạrolom ni ude ọotu phọ. Azua eghoony agol ọdaam ẹmha kụ ạpham ḍịghaagh ọdi ẹrue-rụe epeke.

¹⁵Kụ ọnon ọokpaany Ẹnaan ạḍua sịphe otu ịiḅereghi phọ amite ạlho ạghiom ạnyu ạḅeni nyọpo ạrolom bọ ọotu phọ mọ, “Amem mọ memunughan. Iimuma ade phọ mẹkpooghi. Sịghe epeke phọ ạna abughaam ibugha phọ.”

¹⁶Kụ ọpo ạrolom bọ ọotu phọ ạphiph epeke phọ ọdi kụ ạkuughi iimuma ade phọ.

¹⁷Kụ ọnon ọokpaany Ẹnaan dị ạpham ẹrue-rụe epeke ạḍua ni otu ịiḅereghi phọ kꞌạke amite.

¹⁸Kụ ọnon ọokpaany dị rapogh ghan nịan phọ ạḍua sịphe enmeny ạrikia phọ amite. Ọdi ạlho ạghiom ạnyu ạḅeni nyọpo ạpham bọ ẹrue-rụe epeke phọ mọ, “Iimuma ireeny amiim ade phọ mẹḅaalogh ni. Sịghe epeke phọ ạna ạkuughiom.”

¹⁹Kụ ọokpaany phọ ạphiph epeke phọ ọdi kụ ạkuughi sịgba iimuma phọ aroph ạloghoḍi esi oḍighi ghan amiim ọghagh ologhi phọ Ẹnaan.

²⁰Kụ omimighi iimuma phọ ẹpe ọgbal ẹmha phọ, sịphe roḍighi ghan bọ miim mọ. Ịḅaal kụ ikilogh ekughe phọ ịdipho ạmuum-aḍigho emite esi dị ẹman ni ịraar okuron itobi ḍịdoony rꞌịyal akuḅu ḍịkel ude.