Read abua Ogonanami Phọ 16 Bible Online

Ogonanami Phọ 16 - abua bible

Ogonanami Phọ 16

¹Kụ mị ụḅile ni ạnaghan ḍịolho dị ẹḍua sịphe otu ịiḅereghi phọ ẹḅeni ghan oḍual ạruukpaany phọ mọ, “Ịki ezuughiom de phọ ghẹlhe phọ Ẹnaan odi bọ ologhi oḍual iḍukuru ạsigbagba phọ.”

²Ọḅel ọokpaany phọ ạghi azuom de phọ ịpe ạgbagba phọ ọdi. Ạroko dị repur kelomian emiteghu loor ạbuphe ọlogha yogh bọ elegh elhom ẹnam mọ rꞌạbuphe mooseeny bọ ịyaar ọotughianam ghan ọdi phọ.

³Kụ ọokpaany phọ amuneniom bọ ịyal phọ azu ịpe ạgbagba phọ ọdi ạsagharan otu-ḅualhe phọ. Kụ ạmuum mọ akitonu ạghigh ịḅaal oye lọ mamugh, kụ oomo ạraraar phọ erugh bọ sịphe ọphiiny-ạbazi phọ emuughu.

⁴Kụ ọokpaany phọ amuneniom bọ ịraar phọ azu ịpe ạgbagba phọ ọdi ạsagharan rịphiiny rꞌạruunu adir phọ. Kụ ạmuum mọ akitonu aḍighi ịḅaal.

⁵Kụ mị ạnaghan dị ọokpaany phọ rapogh bọ rụmuum mọ ạḅem mọ, “Nạ Oye Aghuḍuul phọ ọpo odi bọ, kụ ạrol bọ, ịiruen phọ ạna esel li.

⁶Bịdi uzu ni ịḅaal awe rꞌariil phọ Ẹnaan kụ nạ mạngo bọ bịdi ịḅaal ọphughol phọ. Ịphen phọ ‘ạkasian-rạgbaanyan.’”

⁷Kụ mị ạnaghan ẹḍogh dị rẹḅem ghan sịphe enmeny ịyaar aghuḍum mọ mọ, “Ẹnaan Oomo Ịikpo, Ọmoogh-we phọ, ịiruen phọ ạna esel li ḅịle ọkaraghi igey ni.”

⁸Kụ ọokpaany phọ amuneniom bọ inya phọ azuom erumuḍio phọ ịpe ạgbagba phọ ọdi, kụ umeeraam ni mọ ogogo phọ ạghologhol ịdipho ạnian alhe we.

⁹Eboom mọ ẹghologhol phọ ịmoogh ni we kụ bịdi oronyon ḍien phọ Ẹnaan phọ rẹtooghi bọ ịlo imananaany phọ ịphen, kụ bịdi úkiton ni esi ịkaraph phọ ạbidi úboomiom igbogh phọ ọdi.

¹⁰Kụ ọokpaany phọ amuneniom bọ oogh phọ azuom ịpe ạgbagba phọ ọdi ạgada ọdaam mọ ọpo elhom ẹnam mọ. Ufiri asoor ri oomo ọmar elhom ẹnam mọ, kụ awe phọ oloma yogh sinem mọ ạbidi loor eephina phọ,

¹¹kụ bịdi oghol riiphina rꞌạroko phọ ạbidi oronyon Ẹnaan phọ edi bọ kꞌạke phọ, kụ bịdi úkiton ni esi ịkaraph phọ ạbidi.

¹²Kụ ọokpaany phọ amuneniom bọ odiiny phọ azu ịpe ạgbagba phọ ọdi ạsagharan oboom Ọphiiny aYufratis. Ạmuum ọphiiny phọ amooph ni ịlo eten kemitenaan bụdaam mọ kọḍua bọ ẹpe erumuḍio phọ remite ghan bọ otu.

¹³Kụ mị ạmiin ịraar ịkaraph aruwaloor dị ẹghighogh ịḅal, dị ẹḍua ọnhu ẹnam oḍual ạrumhu phọ rꞌọnhu elhom ẹnam mọ rꞌọnhu oyil ọkpe phọ remite.

¹⁴Bịdi phọ aruwaloor aruru dị reḍighi yogh ghan ịiḍaany. Ịraar aruwaloor phọ ịphen remite ghan kẹghi ookpomoghi oomo ạbudaam aḅirini phọ okoriom ẹgham mọ kesoor bọ ḍigbogh aḍio Ẹnaan Oomo Ịikpo phọ.

¹⁵“Ịnaghan, mị ratu ni ịdipho ọḅa. Iboh kꞌẸnaan kẹtolonaan ni oye lọ ụ́naani, ḅịle ukpe ọdi ụ́katanaan, ọbo ọdi kạtol ghan bọ ẹdaḅa obalelhe, ḅịle umugholoor asiph nyọdi.”

¹⁶Kụ aruwaloor phọ eekpomoghi bụdaam mọ sịphe oghol bọ ọnhu aHibru mọ Ạmagedon phọ.

¹⁷Kụ ọokpaany phọ amuneniom bọ oḍual phọ azuom ookuugh phọ ịpe ạgbagba phọ ọdi. Ạḍiolo ẹḅem ghan sịphe ạgada ọdaam mọ sịphe otu ịiḅereghi phọ mọ, “Memineen.”

¹⁸Kụ aḍio phọ ẹḅaaghi, ẹmepheghian, ẹḅile ẹraphan. Ade phọ ephiigha ẹekia ephiighaam dị ke̋phiigha ghan kꞌaḍio phọ ọlhem bọ oye.

¹⁹Kụ eboom mọ ẹmha phọ edia ịraar abin, kụ ophiemi igbogh ạramha oomo areelhe phọ. Ẹnaan ịitughian ni ẹḅile eḍighi ịdi oboom mọ ạBabilon ạphughol aani miim ọghagh ologhi phọ odi bọ ologhi ọphaal ạghelhe phọ ọdi.

²⁰Oomo arukpu-ogbo phọ eḅiighi, kụ aruugum mọ eḍiku ude.

²¹Iboom iiḅoghoḍi ibikpo dị ẹemorogh ịdipho ạkpuru ịgheneneeny iziph ịḍua ni kꞌạke ẹgharaghuom we. Kụ awe ughol li imananaany ibikpo phọ ịphen kꞌekulha ị́kar bọ oronyon Ẹnaan.