Read abua Ogonanami Phọ 18 Bible Online

Ogonanami Phọ 18 - abua bible

Ogonanami Phọ 18

¹Ịphen phọ eten bọ, mị ụmiin ni ọnon ọokpaany dị ạḍua kꞌạke rasoor. Ọdi ạmoogh ni iboom ịikpo kụ ạḍiḅaal eegu phọ ọdi esoorom oomo aḅirini phọ.

²Ọdi ạlho ni ạghiom ạnyu mọ, “Ọdi phọ mameel. Eboom mọ ẹmha phọ ạBabilon memeel. Ịigama aruru rꞌịkaraph aruwaloor reesophoghian ni nyọdi, ịkaraph ịnun dị eḍighi ḅạphanya kụ irughogh,

³ịdi eḍighi bọ ọdi ạmeleghi mụkaraph amiim ipesi phọ ọdi, aḍighi ịdi oomo areelhe ọphughol aani. Ạbudaam aḅirini phọ upesiom ni nyọdi ipesi, kụ ẹruphiom ẹeniom mọ ọdi igboomi ni bumuul ḍighi aḅirini phọ.”

⁴Kụ mị ạḅile ạnaghan ẹnon ẹḍogh dị rẹḅem ghan ẹpe kꞌạke mọ, “We phọ ạmi, itu emite kꞌọdi ẹḍua. Íḍighom aani ghan oḍighi yogh ịkaraph phọ ọdi; ípin aani ghan bin ịpe kọliom bọ nyọdi.

⁵Mokpologhi egu ịkaraph phọ ọdi rosiemi kꞌạke, kụ Ẹnaan rẹetughian ghan ni ịkaraph areten phọ ọdi.

⁶Ịtuugh ịpe ọdi iḍighi bọ inyina kụ eḍighi aani. Ịkpe nyọdi ịyal amem epeeliom ịpe ọdi ạpioghom bọ. Ịlogh miim dị ạkpo ịyal amem apu mụphe ọdi ịngo bọ inyina emuzeḍi ọphaal amiim mọ ọdi.

⁷Ịngo nyọdi ịminimiin rꞌamukum ologhi dị aalenyan eegu rꞌẹediom mọ ọdi abagaam ghan bọ, loor esi dị ọdi ạḅenian ghan loor phọ ọdi mọ, ‘Mị kụ ukueni phọ ạrolom bọ ạgada ọdaam mọ. Mị kékpukele ạnir. Mukum ologhi mị kálegheri.’

⁸Esi ịduon phọ, imananaany ạreezegh rꞌamukum ologhi rꞌịgbakuro kẹḅoph ni ọnhu eniin aḍio ẹgurogh nyọdi. Kụ oguom nyọdi nịan, ịdi eḍighi bọ Ẹnaan Ọmoogh-we phọ resophonaan bọ nyọdi ọoruen phọ ẹmoogh ni ḍịghaagh iphelegbe.”

⁹Mem dị ạbudaam aḅirini phọ oḍighom aani bọ ipesi phọ rꞌole ẹmha phọ ọdi kọmiin bọ mụghi ạnian phọ rele bọ ẹmha phọ, bịdi kọlooghi ni omoghi yogh.

¹⁰Loor aruugu ịminimiin phọ ọdi, bịdi kọmeera ni egher kụ ọlooghi ghan mọ, “Oloo, oloo, eboom ẹkutu-kụtu phọ ẹmha phọ ạBabilon memeel. Esi oniin ạwa bịn mọlhiom ghụn ni nyịna!”

¹¹Abumuul ḍighi aḅirini phọ omoghi ni rọtoonaan nyọdi, ịdi eḍighi bọ oye rạraar ạbidi ráko mun.

¹²Gol, silva, rạla, ịbekulari; iidugha, oodor, sịloko; ireeny dị ọsa, rạraar kịrokiro lọ ọsighe reme rꞌireeny kụ ọkaaghiom; enaba, okuron, mạbul;

¹³ọoza, sẹnt, ịnsens, maa, frạnkinsens; miim rꞌạmunum; ogey aflaur rꞌịbiakpa; sịnam rꞌiyool-ịga; rụsu rꞌạsigada ariigida; rẹbene ḅịle rꞌaruwaloor awe, oye ráko mun.

¹⁴Abumuul ḍighi phọ rọḅeni ghan nyọdi mọ, “Oomo igey ạraraar phọ nạ agbeghe bọ ọmoogh phọ mephe, ḅịle oomo ẹelha phọ rꞌigbogh phọ ạna megheel, ịdi nạ kạ́miin mun.”

¹⁵Loor aruugu ịminimiin ẹmha phọ, abumuul ḍighi phọ ạbuphe ẹmha phọ eḍume bọ kọmeera ni egher. Bịdi komoghi ni ọtoonaan ẹmha phọ kụ ọlooghi ghan

¹⁶mọ, “Oloo, oloo, eboom mọ ẹmha phọ remeel. Ọdi aanmenan ghan iidugha rꞌoodor, ạdaaghian sigol, ạdia rạla rꞌịbekulari,

¹⁷kụ esi oniin ạwa bịn oomo ẹelha phọ ẹphen mephe emuneen.” Mem dị oomo aruwo ẹmhu arughuugh phọ rꞌạbuphe oḍigh aani bọ, rꞌạbuo ịzoghi phọ rꞌoomo ạbueri phọ aḍigbo phọ ạbidi edi ghan bọ ọphiiny phọ, ọmiin bọ mụghi ạnian phọ rele bọ ẹmha phọ, ụmeera ni egher

¹⁸kụ ọlooghi ọghiom ạnyu mọ, “Ẹnon ẹmha kẹ̋rol ghan dị ẹman ọmaaniom eboom mọ ẹmha phọ.”

¹⁹Bịdi umophoghian ni ophugh rụmhu ạbidi, omoghi yogh ọto ghan kụ ọlooghi ọghiom ạnyu mọ, “Oloo, oloo, eboom mọ ẹmha phọ remeel. Ẹdi kụ ẹmha phọ ẹeḍiom mọ ọdi eḍume bọ oomo ạbulo ọmoogh rughuugh dị rọzoghiom sịphe ạriphiiny phọ. Kụ esi oniin ạwa bịn mephe emuneen.”

²⁰Kẹ, mọogh ni iboh ịduon mophiemi bọ nyọdi. We phọ rꞌabutelhedom mọ rꞌariil phọ Ẹnaan, ịmoogh ni iboh. Ẹnaan iphogh ni ịpe ẹmha phọ iḍighi bọ inyina kụ esoph bọ ephume nyọdi.

²¹Kụ oniin oboom ọokpaany ạsighe ḍighiigh dị ẹmanam ni ọgbiom igbilha aroph asumeeny ọphiiny kụ ạḅem mọ, “Ịduon kụ ịdi kọsighe igbagbaar olerom eboom mọ ẹmha phọ ạBabilon ịdi kọ́miin mun.

²²Kọ́naghan mun kꞌạna iitia arugumogum, rꞌẹḍogh ạsuor, ruphulaam aruuḍue rꞌạrukuodu. Kọ́miin mun kꞌạna bụo iiḍighi ạḍighaagh. Kọ́naghan mun kꞌạna ḍịaḅa asighiigh dị rọgbeeghiom rạraar.

²³Kọ́miin mun kꞌạna ḍịḅaal ọtozi dị ọsu. Kọ́naghan mun kꞌạna rọḍogh ạnmariir rꞌalephiri dị rọbalan ilom. Abumuul ḍighi phọ ạna kụ uḍiemiom sịen aḅirini phọ, kụ nạ ạgbe bọ ghạma phọ ạna aakeleghiom oomo areelhe aḅirini phọ.”

²⁴Ụtuan ịḅaal ariil phọ rꞌawe phọ Ẹnaan ọze bọ sịen aḅirini phọ kụ ọliom bọ Bạbilon.