Read abua Ogonanami Phọ 2 Bible Online

Ogonanami Phọ 2 - abua bible

Ogonanami Phọ 2

¹“Gẹ ịphen ạghiom ọokpaany phọ Ẹnaan rapogh bọ sịosi phọ Ẹfesos mọ, ‘Ọpo ạpham bọ oḍual ạraanaan phọ ḍịghaagh elhiom mọ ọdi kụ ratelhe yogh bọ ogbo oḍual ireeny ịtozi phọ ọkaaghiom bọ gol phọ, ạsighe dom mọ aḍien kụ ratu.

²Mị alegheri ni iiḍighi phọ rꞌarukumuan phọ rꞌọkparam mọ anyina, ḅịle rꞌịdi nyina kétue ẹminoghom ịkaraph awe. Mị alegheri ni mọ nyina mẹeḅeghion ni ẹmiin ẹman mọ bụphe oghophora bọ mọ ạbuno abutelhedom mọ rokue ni.

³Nyina rẹkparam ni, nyina meghol li ẹmhu ạmi ẹmiinom ịminimiin, kụ inyina ị́pher.

⁴Kụ ọlo eḍighinom ịyaar anyina esughanam ni. Nyina ịmi ị́phomoghian mun ịdipho ẹḅel amem mọ.

⁵Ịkiom ghan ologhi ḍịḅel ạdol phọ anyina. Ikiton esi ịkaraph phọ anyina, eḍighi ghan ịdipho ẹḅel amem mọ. Mọ nyina íkiton esi ịkaraph phọ anyina, mị katu ni esi anyina ạsighe ọtozi phọ anyina sịphe ạdol phọ ọdi.

⁶Iboonaan ni, ịpe bụo ạNikolaos roḍighi ghan bọ ikia ni inyina, ịdipho ikia bọ ịmi.

⁷“‘Oye lọ ạmoogh rụru ạnaghanan ịpe Uwaloor phọ rạḅeni bọ sịosi ẹmha kịrokiro phọ! “‘Mị kạngo ni iimuma oreeny aghuḍum mọ ọpo odi bọ sịphe ologhi oghoony phọ Ẹnaan mọ bụphe ọkpar bọ opu ole.’”

⁸“Gẹ ịphen ạghiom ọokpaany phọ Ẹnaan rapogh bọ sịosi phọ aSimana mọ, ‘Ọpo aḍighi bọ ọḅel rꞌeekuna phọ, amugh bọ kụ ạḅile bọ aḅetenu, ạsighe dom mọ ạḍien kụ ratu.

⁹Mị alegheri ni ịminimiin phọ anyina. Mị alegheri ni mọ ikuom ni inyina kụ, ọmaar ophogh, ịboghoghoom ni inyina. Mị alegheri ni ịkaraph ạsiagba dị bụphe oghophora bọ mọ ạbuno ạbuo aJu phọ rịgbaanaan inyina. Otul phọ ạbidi ọlo aSetan.

¹⁰Oomiigh anyina kúkaph ghan ịlo ạraraar phọ kemiteghu bọ. Ịnaghanan. Eru phọ kẹloghoḍi ni buniin anyina ikoli ịlo ọdeghom anyina ophogh. Ịminimiin phọ anyina kẹtol ḍioph aḍughul-otu bịn. Ghạlamo rꞌosoph ni ooko anyina, iseere ologhi anyina esi ạmi kụ mị kizu ni inyina eghoony aghuḍum mọ.

¹¹“‘Oye lọ ạmoogh rụru ạnaghanan ịpe Uwaloor phọ rạḅeni bọ sịosi ẹmha kịrokiro phọ! “‘Aḍuugh phọ emuneniom bọ ịyal phọ kẹ́ḅogh bụphe ọkpar bọ opu.’”

¹²“Gẹ ịphen ạghiom ọokpaany phọ Ẹnaan rapogh bọ sịosi phọ aPagamom mọ, ‘Ọpo ạpham bọ ẹrue-rụe elhool ẹgham ịyal ọman phọ ạsighe dom mọ ạḍien kụ ratu.

¹³Mị alegheri ni marugh phọ anyina, ẹpe ạgada ọdaam mọ aSetan odi bọ. Nyina ịmi ị́wile; omeeraam mọ anyina ọ́gbol esi ạmi, ghạlamo amem mọ oghiigh bọ ni Ạntipas phọ aseere ghan bọ ologhi phọ ọgbaanaan ạmi ẹpe amarugh phọ aSetan.

¹⁴Kụ ọlo ịphen kụ ạnmuny ariisi dị nyina esughanam, mọ buniin anyina rọdaph ịtughemi ạBelam mọ ọpo ạtughemi bọ Bẹlak mọ aḍighi ịdi aweye phọ Ịzirel mọtuan olhe ghan eḍien dị ọphighironom ẹkia ọngo ruru, ḅịle rꞌopesi ghan ipesi, omeel oḍighanaan ịkaraph.

¹⁵Nyina ẹḅile kẹn ni ẹmoogh bụdi rọdaph ịtughemi ạbuo ạNikolaos phọ sịphe ogbo phọ anyina.

¹⁶Ikiton esi ịkaraph phọ anyina. Mọ ịdipho ílho, mị kạnuun ni atu ạsighe elhool ẹgham mọ edi bọ ọnhu phọ ạmi atuphiom we phọ ạbuphe phọ.

¹⁷“‘Oye lọ ạmoogh rụru ạnaghanan ịpe Uwaloor phọ rạḅeni bọ sịosi ẹmha kịrokiro phọ! “‘Mị kapoor ri ẹphurukpu ạmana phọ ạaghi bọ ạngo bụphe ọkpar bọ opu. Mị kạḅile kẹn ni ạngo tọrobo ọnyo ạbidi ẹphalaḅaal ẹna dị ọge ḍimoom aḍien dị ọnon oye úlegheri, epel nyọpo keḍigh bọ ḍịghaagh phọ.’”

¹⁸“Gẹ ịphen ạghiom ọokpaany phọ Ẹnaan rapogh bọ sịosi phọ aTiatira mọ, ‘Ọony phọ Ẹnaan ọpo ariḍien phọ reemor bọ ịdipho ạnian, ạrada aruwol phọ rẹtaphan bọ ịdipho enaba dị mọozaghami ogbuurogh ọḅaalami, ạsighe dom mọ ạḍien kụ ratu.

¹⁹Mị alegheri ni iiḍighi phọ rꞌẹphomoghian phọ rꞌomeeraam mọ rꞌarukumuan phọ rꞌọkparam mọ anyina, ḅịle mọ iiḅi iiḍighi phọ ịphen ạnyiidipho mepu ịḅel phọ.

²⁰Kụ ọlo eḍighinom ịyaar phọ anyina esughanam ni mọ nyina eḅoronom ni ạnir phọ ọpo oghol bọ mọ ạJezebel phọ aghophora bọ mọ ọno oyil Ẹnaan phọ. Ọdi rạtughemi ghan kaakeleghi bụo oḍighi phọ ạmi mọ opesi yogh ipesi, ọḅile oleeghi ghan riiḍien lọ ọphighironom ẹkia ọngo ruru.

²¹Mị mạngo ni nyọdi eepoogh okiton esi ịkaraph phọ ọdi kụ ọdi ómeera ọwile ipesi phọ.

²²Kụ mị kạnyuph nyọdi ạmuneen ẹmina dị ọdi rꞌạbuphe rꞌọdi ọḅem bọ romerenyan ipesi phọ kọmiinom ịminimiin dị anem kétue ẹkaaph, epel lọ bịdi ọkporion rạghaagh ạnir phọ.

²³Mị kạze kẹn ni nmụny phọ ọdi, kụ ạsiosi ẹmha kịrokiro phọ agbi olegheri mọ mị kụ oye phọ raḅiligha ghan bọ iloghi rꞌịitughian phọ awe. Mị kạkpe ni ịikpia lọ oḍighi oye phọ ạman.

²⁴“‘Kụ bụeri phọ anyina ẹpe Tiatira kọ̋daph aani ịkaraph ịtughemi phọ ịphen. Nyina kẹ̋maar aani ịpe bụeri phọ rokol ghan bọ mọ eekuna ạraraar ịbooghian phọ aSetan. Mị rịḅeni ghan inyina mọ mị inyina ḍịnon adool rị́leti mun.

²⁵Kụ ịmaar ri ẹpham ẹkparami ịlo nyina ẹmoogh tụtu mị aru.

²⁶Bụphe kọkpar bọ opu kụ oḍighi ghan ịpe mị rạwa bọ osi eekuna phọ, mị kạngo ni igina phọ ịikpo phọ mị ạar bọ Ọde phọ ạmi. Mị kạngo ni bịdi ịikpo ophoghom areelhe phọ, ọsighe ịkpara okuron kụ ọdaam ạbidi, ḅịle rꞌọgurogh ạbidi oḅomoghi ịdipho ịnyoki. Mị kạngo kẹn ni bịdi okoriom-ẹenaan ạḍiroor.

²⁹“‘Oye lọ ạmoogh rụru ạnaghanan ịpe Uwaloor phọ rạḅeni bọ sịosi ẹmha kịrokiro phọ!’”