Read abua Ogonanami Phọ 20 Bible Online

Ogonanami Phọ 20 - abua bible

Ogonanami Phọ 20

¹Kụ mị ụḅile ni ạmiin ọokpaany dị ạpham ịsabi ooni phọ rꞌịgodogodo izime kụ ạḍua kꞌạke rasoor.

²Ọdi ameleghuom egbaany ẹkaraph-ịyaar phọ, nonom oḍual ạrumhu phọ — oḍighom ọghaaph, Eru phọ ḅịle mꞌaSetan — asiph ạphaḍi oniin ọonir ạsia.

³Ọokpaany phọ aroph ni nyọdi asumeeny ooni phọ ạkasi ạsighe oba ạḅirighiom eghuugh phọ, ọbo ọdi kaakeleghi ghan bọ nịiniin reelhe phọ tụtu oniin ọonir ạsia phọ eten. Ịphen phọ eten, kọḅile ni ọokpo nyọdi omitiom mọony ekulha amem.

⁴Kụ mị ụḅile ni ạmiin sịgada ọdaam rꞌạbuphe ọrologhom bọ. Ụngo ni bịdi ịnyaam oogboom ịiruen. Mị ụmiin kẹn ni ruwaloor ạbuphe ọtuan bọ mọ ọkaaph ịpe ạJizos agananami bọ ḅịle ọghaaph phọ Ẹnaan kụ ọzeeghi bọ. Bịdi kꞌekulha úuseeny elhom ẹnam mọ mꞌịyaar ọotughianam ghan ọdi phọ, ḅịle kẹn ụ́logha aani elegh elhom ẹnam mọ rolhor mꞌạraghaagh phọ ạbidi. Bịdi ụrol li ọḅarama Kraist ọtooghi rạraar ịdipho ạbudaam esi ọonir ạsia phọ.

⁵(Bụeri phọ ạbuphe omuughu bọ ụ́ḅile mun uḅerenu tụtu ọonir ạsia phọ eten bọ.) Ọphon kụ ọḅel oḅerion esi aḍuugh phọ.

⁶Iboh rꞌạḍiseph kꞌẸnaan edianaan ni bụphe oḍighom aani bọ sịen ọḅel oḅerion esi aḍuugh phọ. Bịdi mokpetenaan ịikpo aḍuugh phọ emuneniom bọ ịyal phọ. Bịdi koḍighi bụpinyon rịkia Ẹnaan rꞌaKraist dị kọḅarama nyọdi ọtooghi rạraar esi oniin ọonir ạsia.

⁷Ọonir ạsia phọ remunughan kụ ọokpo Setan omitiom ikoli phọ,

⁸kụ ọdi ạki ookeleghi aGog rꞌạMagog areelhe phọ ịpe edi bọ inya ạsiagaany aḅirini phọ. ASetan kaakpomoghi ni ḍita ạbidi dị kótue ọbal omuneni ịdipho ikpo ịisaar ekpolom ọphiiny phọ kụ atuphiom ẹgham.

⁹Bịdi uleeny ni eleeny oomo aḅirini phọ okoom simarugh awe phọ Ẹnaan, ḅịle rꞌẹmha phọ ẹpe ọdi ạphomoghian bọ. Kụ ạnian ịḍua ni kꞌạke eru ephiemi bịdi.

¹⁰Kụ oroph Eru phọ eekeleghi bọ bịdi osumeeny ọodu ạnian rꞌạsolfa phọ mọ ạtuan elhom ẹnam mọ rꞌoyil ọkpe phọ ọphur bọ osumeeny. Kụ kọmiine ni bịdi ḍughul rꞌootaany kꞌagee-pọ kꞌagee-pọ.

¹¹Kụ mị ụḅile ni ạmiin oboom ọphalaḅaal ạgada ọdaam rꞌọpo ạrolom bọ. Ạke phọ rꞌade phọ isuma ni ẹḍua ghisigh phọ ọdi bịn ụ́miin mun.

¹²Kụ mị ạmiin bụphe momuughu bọ, bụbam rꞌabugbogh, dị ọmeregha ghisigh ạgada ọdaam mọ. Ukpenyon ni rịnya kụ ọḅile okpegheron ḍịnon ạḍinya, ḍịphe ạbuphe odi bọ. Ụge ni iiḍighi ạbuphe momuughu bọ sịphe ạrinya phọ. Ụdaph ni ịphen phọ kụ oogboonaan bọ bịdi ịiruen phọ.

¹³Bụlo omuughu ọphiiny, ọphiiny phọ amiteghom ni. Aḍuugh rꞌọmar iḍim imiteghom ni bụphe ạbidi. Kụ ọdaph ghan iiḍighi phọ ạbidi kụ oogboonaan bịdi ịiruen.

¹⁴Kụ ogbi oroph aḍuugh rꞌọmar iḍim osumeeny ọodu ạnian phọ. Ọodu ạnian phọ ọphon kụ aḍuugh phọ emuneniom bọ ịyal phọ.

¹⁵Uroph aani ni tọrobo oye lọ ḍien ọdi ụ́ge aani sịphe ạḍinya ạbuphe odi bọ osumeeny ọodu ạnian phọ.