Read abua Ogonanami Phọ 22 Bible Online

Ogonanami Phọ 22 - abua bible

Ogonanami Phọ 22

¹Ọokpaany phọ ạḅile ni uḍeenaan ịmi ọphiiny ạmuum aghuḍum dị raaloghoḍian ịdipho ạkiristel. Ạmuum mọ akil ghan sịphe ạgada ọdaam mọ Ẹnaan rꞌỌony Oyool-ọga phọ

²asoor ogbo olhom oḅodo ẹmha phọ. Sịphe iigbom ọphiiny phọ oreeny aghuḍum asi ni, ạga ekeeny, ạga elhiom. Ọdi amuum ghan ḍioph rꞌịyal amem lhạ, ụnwanyu mem; ḅịle ạrinya phọ ọdi ịlo ookonomom ghan areelhe phọ.

³Tọrobo ịyaar dị Ẹnaan meronyon kọ́miin sịphe ẹmha phọ. Ạgada ọdaam mọ Ẹnaan rꞌỌony Oyool-ọga phọ kụ kẹtol sịphe ẹmha phọ; ḅịle bụo iiḍighi phọ ọdi kooseeny ni nyọdi.

⁴Bịdi kọmiin ni ghisigh ọdi, kụ ọge ḍien phọ odi rolhor ạbidi.

⁵Aḍughul kékul mun, bịdi ịtozi mꞌogogo kọ́wa mun, ịdi eḍighi bọ Ẹnaan Ọmoogh-we phọ kụ kaḍighi ḍịḅaal phọ ạbidi, kụ bịdi ọtooghi rạraar ịdipho ạbudaam, ọda ẹmha phọ kꞌagee-pọ kꞌagee-pọ.

⁶Kụ ọokpaany phọ ụḅeni ịmi mọ, “Ikpo ọnhu phọ ịphen ịne ni, amabi ólho. Ḅịle, Ẹnaan Ọmoogh-we phọ rạngo ghan bọ Uwaloor phọ ọdi riil phọ kụ irom ọokpaany phọ ọdi mọ aru aḍeenaan bụo iiḍighi phọ ọdi rạraar dị kẹnuun ni emiteghu.”

⁷ẠJizos rạḅem ghan mọ, “Ịnaghan! Mị ạnuun ni ratu. Iboh kꞌẸnaan edianaan ni bụphe ọnaghanan bọ ikpo ọnhu ịmiin phọ edi bọ sịen ạḍinya phọ ạḍien.”

⁸Mị ạJon mạnaghan ni, ạḅile ạmiin oomo ạraraar phọ ịphen. Mị rọnaghan bọ rọmiin rọman, kụ mị akpuḍian rạda aruwol ọokpaany phọ uḍeenaan bọ ịmi oomo phọ ịphen ịlo ooseeny ọdi.

⁹Kụ ọdi ụḅeni ịmi mọ, “Káḍighi ịduon. Sịphe oḍighi phọ, mị kụ ọḅarama ạna rꞌạbuo asiya phọ ạna oḍighi bọ riil phọ rꞌoomo ạbuphe ọnaghanan bọ ikpo ọnhu ạḍinya phọ ạḍien. Seeseeny ghụn Ẹnaan.”

¹⁰Kụ ọdi mọ, “Kạ́booghi ikpo ọnhu ịmiin ạḍinya phọ ạḍien, loor esi dị amem mọ oomo ịphen phọ kemiteghu bọ rẹteeny ni.

¹¹Oye lọ raḍighi ghan ịkaraph, aḍighi ni ạghiom ghisigh! Oye lọ mạbiphigha ẹenir, pọ ạrolom ni! Oye lọ raḍighi ghan igey, aḍighi ni ạghiom ghisigh! Oye lọ raakuan ruukuan, aakuan ni ạghiom ghisigh!”

¹²ẠJizos rạḅem ghan mọ, “Ịnaghan! Mị ạnuun ni ratu. Mị ạpam ni ruunmo ratumom dị mị kaanmo uwo oḍighi rꞌoḍighi.

¹³Mị kụ Ạlfa phọ ḅịle rꞌOmega phọ, ọḅel phọ rꞌosughanam ọman phọ, emiighom mọ rꞌekureriom mọ.”

¹⁴Iboh kꞌẸnaan edianaan ni bụphe mootol bọ rụsuoma phọ ạbidi ọḅaalami kụ mọman bọ olhe aani iimuma oreeny aghuḍum mọ, ọḅile ọman ọḍua ạrunhu-aḍibuo phọ kụ oḍigh ẹmha phọ.

¹⁵Kụ ạbuminian rịiniom rꞌạruḅaghama rꞌạbuo ipesi rꞌạrookom enu rꞌạbuo ịiḅereghi aruru rꞌạbugbaam ọkpe rꞌạbuo iigbegheḍiom úlho aani sịphe ẹmha phọ.

¹⁶“Mị ạJizos marom ọokpaany phọ ạmi mọ aru ạghaaph ịphen phọ ịḅeni inyina ạbuo ạsiosi ẹmha kịrokiro. Mị ọnyo ẹemara ẹemara aDevid. Mị rạmu ịdipho okoriom ạḍiroor phọ.”

¹⁷Uwaloor phọ rꞌỌnyani phọ kopin bọ ọḅem mọ, “Tue!” Ọlo ạnaghan aani, ạḅem aani ghan mọ, “Tue!” Ọlo ạmuum rạpu, aru! Ọlo rạwa, ạphughol mụum aghuḍum mọ oopho!

¹⁸Mị ạJon rạpur ri rụru ạtorobo oye lọ ạnaghan ikpo ọnhu ịmiin ạḍinya phọ ạḍien: oye lọ ạsighe ịnon ịlo ọdi kụ ạḅaram ịphen phọ, Ẹnaan kẹsighe ni imananaany phọ ọgo bọ sịen ạḍinya phọ ạḍien eseenaan nyọdi.

¹⁹Kụ oye lọ asoph iniin ikpo ọnhu ịmiin ạḍinya phọ ạḍien aroph, Ẹnaan kẹboor ri nyọdi bin iimuma oreeny aghuḍum mọ rꞌạdol phọ ọdi sịphe ẹmha iigbia phọ ọgo bọ sịen ạḍinya phọ ạḍien.

²⁰Ọpo ọdi kụ aḍighi bọ egananamiom ịphen phọ rạḅem ghan mọ, “Ọkar igey ni, mị ạnuun ni ratu.” Ẹrol li ịdipho! Jịzos Ọmoogh-we, tue!

²¹Ooḅi ọghor phọ kꞌạJizos Ọmoogh-we phọ ạrolonaan oomo phọ anyina!