Read abua Ogonanami Phọ 4 Bible Online

Ogonanami Phọ 4 - abua bible

Ogonanami Phọ 4

¹Mem dị ịphen phọ meten, mị ụmiin ni uḍien dị ọnhu-aḍibuo kꞌạke aghughuronu. Kụ ẹḍogh dị ẹḅa ghan ịdipho ọkuodu, dị mị mạnaghan ghan ni ẹḅile ịḅeni ịmi mọ, “Tue ẹphen ạnyu mị kaḍeenaan nyịna ịdi kẹḅile emite mem dị ịphen phọ meten.”

²Egina amem bịn mị aloghoma ịdi Uwaloor Iigbia phọ mụsiiny ịmi. Ẹpe kꞌạke phọ, ạgada ọdaam aḅirini ạrol li dị oye ạrolom.

³Aḍimite oye phọ ịraphan ịdipho ạraraar dị oghol mọ ạjaspa rꞌikpo ẹbe. Aghozogh oburukeeny dị ạghigh ịyaar dị oghol mọ ẹmerald akitonom ni ạgada phọ.

⁴Kụ ịyaldi rꞌinya ịnon ạsigada ọdaam mọ dị ịyaldi rꞌinya ikumoor awe kụ ọrologhom iko ni ạgada ọdaam mọ ẹlhogh ogbo. Bịdi uunmenan ịphalaḅaal kụ ozuughian roghoony ọdaam dị oḍighinom gol.

⁵Kụ ạnian ịḍua ghan ni meleleph pạ ạgada ọdaam ẹmha phọ emite rꞌạḍiaḅa rꞌọraphan ọomaany, kụ oḍual ịmure eemor ghan pạ aghisigh ạgada ọdaam mọ. Ịphen phọ kụ oḍual aruwaloor phọ Ẹnaan.

⁶Ịyaar dị ẹghigh ọphiiny asitamaḍiki dị ạnmananmana ịdipho ẹenaan, ịrol kẹn ni pạ aghisigh ạgada ọdaam mọ. Inya ạraraar dị ẹmoogh ḍiphooghu iko ni ạgada ọdaam ẹmha phọ ekitonom. Ariḍien imuza ni ọman rꞌighisigh.

⁷Ẹḅel ịyaar phọ ẹrol mụdi ạnam-dịka; ẹdi etum pạ mụdi aḍilephiri ạnam; aghisigh ẹdi emuneniom ịraar ịdipho ạkuo oye; kụ ẹpe emuneniom bọ inya phọ mụdi uga lọ rạpeeph.

⁸Sịphe inya ạraraar phọ, eniin ịmoogh ghan odiiny araphaaph ḅịle rꞌariḍien dị emuza ologhi rꞌạnyu aloor phọ ekitonom. Ísoph mem ḍughul rꞌootaany ọmoor ghan mọ, “Iigbia, iigbia, iigbia kụ Ẹnaan Oomo Ịikpo, Ọmoogh-we phọ ọpo ạrol bọ ni kụ odi bọ ni, kụ kẹḅile bọ kẹn ni etu.”

⁹Tọrobo amem lọ inya ạraraar phọ ịphen phọ ẹmoor ḍụor eghuan rꞌigbogh rꞌạḍiseph ẹngo nyọpo ạrolom bọ ạgada ọdaam ẹmha phọ kụ kạtol bọ kꞌagee-pọ kꞌagee-pọ phọ,

¹⁰Ịyaldi rꞌinya ikumoor awe phọ rokpuḍughian ghan pạ aghisigh ọpo ạrolom bọ ạgada phọ kụ kooseeny nyọpo kạtol bọ ni kꞌagee-pọ kꞌagee-pọ phọ. Bịdi rozunyonaan ghan roghoony ọdaam ẹmha phọ ạbidi kotebeneghi ghisigh ọpo ạrolom bọ ạgada phọ kọmoor ghan mọ,

¹¹“Nạ, Ẹnaan rꞌỌmoogh-we phọ ayoor, ạman ni lọ yoor kọngo ghan eghuan rꞌigbogh rꞌịikpo, ịdi eḍighi bọ nạ kụ ụlhem bọ oomo ạraraar phọ. Esi ịtooghi phọ ạna kụ ẹdi bịdi edi ghan bọ repooghu.”