Read abua Ogonanami Phọ 5 Bible Online

Ogonanami Phọ 5 - abua bible

Ogonanami Phọ 5

¹Mị ụmiin ni dị ọpo ạrolom bọ ạgada ọdaam ẹmha phọ ạpham ḍikpooghineen ạḍinya ḍịghaagh elhiom mọ ọdi. Ịgeeghi phọ imuza ni ịyal phọ ọman ạḍinya phọ. Ụsighe ni oba ọḅirighiom oḍual ariisi.

²Kụ mị ạmiin oniin ọokpara ọokpaany Ẹnaan dị ragbeel ghan mọ, “Ạnhian kụ ạman ọokpaghion oba phọ okpegheron ạḍinya phọ?”

³Kụ ụ́miin ẹpe kꞌạke rꞌịsien ade phọ rꞌẹpe ạtu-ropoḍi oye lọ ạman okpegheron ọmiin ologhi ạḍinya phọ.

⁴Mị umiigh ni omoghi iboom ịdi eḍighi bọ ụ́miin oye dị ạman okpegheron ọmiin ologhi ạḍinya phọ.

⁵Kụ oniin okumoor oye phọ ụudereghi ịmi mọ, “Kámoghi mun. Pọrono Ạnam-dịka eghun phọ kꞌaJuda, ogbogh ọnyo ẹemara ẹemara phọ aDevid, mạkpar apu, katue ni ạakpaghion oḍual ariisi phọ ọḅirighiom bọ oba phọ akpegheron ḍịnya phọ.”

⁶-Kụ mị ạmiin Mọony Oyool-ọga dị ạmeera sịphe ogbo ạgada ọdaam ẹmha phọ, dị inya ạraraar phọ ẹmoogh bọ ḍiphooghu phọ rꞌikumoor awe phọ oko okitonom. Ọony Oyool-ọga phọ ạrol mụdi moghiigh ni. Ạmoogh oḍual ạraphaal rꞌoḍual ariḍien, dị eḍighi oḍual aruwaloor phọ Ẹnaan erom bọ kụ eru bọ oomo aḅirini phọ.

⁷Ọony Oyool-ọga phọ ạghi ạsighe ḍikpooghineen ạḍinya phọ ḍịghaagh elhiom ọpo ạrolom bọ ạgada ọdaam ẹmha phọ.

⁸Ọdi roḍighi ịduon phọ, kụ inya ạraraar phọ ẹmoogh bọ ḍiphooghu phọ ịyaldi rꞌinya ikumoor awe phọ ukpuḍughian ni pạ ghisigh Ọony Oyool-ọga phọ. Tọrobo ọnyo ạbidi ạpham ogumogum rꞌiḍukuru ạsigbagba asigol, dị ọloghoḍi ịnsens omuzeḍi yogh. Ịnsens phọ ịphen, pọ ịiḅereghi awe phọ Ẹnaan.

⁹Bịdi ụmoor ri ḍimoom ạḍuor mọ, “Nạ kụ ụman ọsighe aḍikpooghineen ạḍinya phọ ọokpaghion ariisi phọ ọḅirighiom bọ oba phọ, ịdi eḍighi bọ ughiigh ni nyịna, kụ ọsighe ịḅaal phọ ạna ọtagharanam we oomo arughunughun rꞌạrunhu rꞌạramha rꞌareelhe oḍighi bụo kꞌẸnaan.

¹⁰Nạ maḍighi bịdi ọmar ariil ạrikia oḍighi oḍighi ọngo Ẹnaan phọ ayoor, kụ bịdi kụ kọda sịen ade phọ.”

¹¹Mị ụḅile ni aphogh kụ ạnaghan rọḍogh ạsimuunir arugu ạruukpaany Ẹnaan. Bịdi ụmeregha ni okoom ạgada ọdaam ẹmha phọ rꞌinya ạraraar phọ ẹmoogh bọ ḍiphooghu phọ rꞌikumoor awe phọ,

¹²kụ ọlo ḍụor mọ, “Ọony Oyool-ọga phọ moghiigh bọ ạman ni ọngo ịikpo rꞌẹelha rꞌolegheri ịyaar rꞌịnyaam rꞌeghuan rꞌeegu rꞌạḍiseph.”

¹³Kụ mị ạnaghan dị tọrobo tọrobo ịyaar dị ẹmoogh ḍiphooghu ẹpe kꞌạke rꞌịsien ade phọ rꞌẹpe ạtu-ropoḍi rꞌịsiphe ọphiiny phọ rꞌoomo ạraraar phọ ẹmoogh bọ ḍiphooghu sịen oomo aḅirini phọ rẹmoor ghan mọ, “Ạḍiseph rꞌeghuan rꞌeegu rꞌịikpo ẹrolonaan nyọpo ạrolom bọ ạgada ọdaam ẹmha phọ rꞌỌony Oyool-ọga phọ kꞌagee-pọ kꞌagee-pọ!”

¹⁴Kụ inya ạraraar phọ ẹmoogh bọ ḍiphooghu phọ emeeraam mọ, “Ẹrol li ịdipho!” Kụ ikumoor awe phọ okpuḍughian ooseeny Ẹnaan.