Read abua Ogonanami Phọ 6 Bible Online

Ogonanami Phọ 6 - abua bible

Ogonanami Phọ 6

¹Kụ mị ạmiin dị Ọony Oyool-ọga phọ ạkpagharan ọḅel oba phọ sịphe oḍual phọ ịne. Kụ mị ạnaghan dị eniin sịphe inya ạraraar phọ ẹmoogh bọ ḍiphooghu phọ ẹḅemom rꞌeboom ẹḍogh ịdipho ọomaany mọ, “Tue!”

²Mị uphogh ni kụ ạmiin ọphalaḅaal ạsu. Ọpo aḍigh bọ ạsu phọ ạpham kụmugh, kụ ọngo nyọdi eghoony iphelegbe. Ọdi anyeene ịdipho ọokpara ọkaaghi areelhe.

³Kụ Ọony Oyool-ọga phọ ạḅile ạkpagharan oba phọ amuneniom bọ ịyal phọ, kụ mị ạnaghan dị ẹlo aḍiphooghu dị emuneniom ịyal ẹḅem mọ, “Tue!”

⁴Kụ ọtogh-tọgh ạsu aru amite. Ụngo ni nyọpo aḍigh bọ ạsu phọ ịikpo mọ alher ẹgham sịen aḅirini phọ, mọ awe ọzian siloor. Ụngo kẹn ni nyọdi eboom elhool ẹgham.

⁵Kụ Ọony Oyool-ọga phọ ạḅile ạkpagharan oba phọ amuneniom bọ ịraar phọ, kụ mị ạnaghan dị ẹlo aḍiphooghu dị emuneniom ịraar ẹḅem mọ, “Tue!” Mị uphogh ni kụ ạmiin oḍiil ạsu. Ọpo aḍigh bọ ạsu phọ ạpham ịyaar dị rọtooghiom ghan ẹemor ḍịghaagh ọdi.

⁶Kụ mị ạnaghan ịyaar dị ẹḅa ịdipho ẹḍogh dị ẹḍua esi inya ạraraar phọ ẹmoogh bọ ḍiphooghu phọ kụ eru. Ịḅem mọ, “Eeku ịbiakpa mẹman ikpoki oḍighi ẹmhu aḍio, ḅịle kẹn ịraar aruuku abali ẹman ikpoki oḍighi ẹmhu aḍio, kụ ọlo kạ́logh ḍighi ạmunum rꞌamiim!”

⁷Kụ Ọony Oyool-ọga phọ ạḅile ạkpagharan oba phọ amuneniom bọ inya phọ, kụ mị ạnaghan dị ẹlo aḍiphooghu dị emuneniom inya ẹḅem mọ, “Tue!”

⁸Mị uphogh ni kụ ạmiin okpaghaghaany ạsu. Ḍien ọpo aḍigh bọ ạsu phọ ughol mọ Aḍuugh, kụ Ọmar Iḍim mạkpulan ni ọman ọdi. Udi ni aḅirini phọ inya abin kụ ọngo bịdi ịikpo mọ ọsighe ẹgham rꞌịgbakuro rꞌạreezegh rꞌilhom ịnam ọziom muniin abin.

⁹Kụ Ọony Oyool-ọga phọ ạḅile ạkpagharan oba phọ amuneniom bọ oogh phọ. Mị ụmiin ni sịphe eeḍian enmeny ịyaar aghuḍum mọ ruwaloor ạbuphe ọtuan bọ mọ ọkuom loor ạbidi ọghaaphaan rꞌogbeelom ghan ọghaaph phọ Ẹnaan kụ ọze bọ.

¹⁰Bịdi ụlo ni ọghiom ạnyu mọ, “Ọmoogh-we oomo ịikpo rꞌaruukuan rꞌigey, rokori ghan pụr amem kụ nạ agbi oogboonaan ịiruen rꞌọliom aweye aḅirini phọ ụze bọ iyoor?”

¹¹Ụngo ni tọrobo ọnyo ạbidi ọphalaḅaal ạsuoma, kụ ọḅeni mọ bịdi ophooghian ẹphurukpu kụ okoriom ghan tụtu aḍita ạbuḅarama phọ rꞌasiya phọ kọze aani bọ memunughan.

¹²Kụ mị ạmiin dị Ọony Oyool-ọga phọ ạkpagharan oba phọ amuneniom bọ odiiny phọ. Ade phọ iphiigha ni ẹekia ephiighaam. Erumuḍio phọ ekitonu ewiil ịdipho ukpe-ọto, kụ ụnwanyu phọ akitonu ạtogh ạman ịdipho ịḅaal.

¹³Kụ ạraanaan ẹḍua ẹpe okuaḍio phọ ẹgharaghu, ịdipho iimuma oreeny-ạfig lọ rẹkar eloogh mem oghim.

¹⁴Kụ okuaḍio phọ akpooghian ịdipho aḍikpooghineen ạḍinya bịn ụ́miin mun, kụ tọrobo eegum rꞌekpu-ogbo eenmeeghi sịdol.

¹⁵Kụ ạbudaam aḅirini phọ rꞌabugbogh awe rꞌạbuo ạrumhu ẹgham rꞌạraalha rꞌarephelegbe rꞌoomo ạbunon awe, rẹbene rꞌạbuo ade, ạaghian ologhi aropogh rꞌeeḍian asighiigh aruugum mọ.

¹⁶Kụ bịdi ọmagh ghan rạaḅaraph rꞌasighiigh phọ ọḅeni mọ, “Imeleghuom iyoor ạaghi, ọbo ọpo ạrolom bọ ạgada phọ kụmiin ghan bọ iyoor, ḅịle ạghelhe Ọony Oyool-ọga phọ kụteeny ghan bọ iyoor.

¹⁷Aḍigbogh aḍio ạghelhe phọ ạbidi mẹteeny. Ạnhian kụ kạmerenyan bọ?”