Read abua Ogonanami Phọ 8 Bible Online

Ogonanami Phọ 8 - abua bible

Ogonanami Phọ 8

¹Mem dị Ọony Oyool-ọga phọ ạkpagharan oba phọ amuneniom bọ oḍual phọ, ẹpe kꞌạke inamian ni esi obekeen amem.

²Kụ mị ạmiin oḍual ạruukpaany phọ ọmeregha bọ ghisigh phọ Ẹnaan. Ụngo ni bịdi oḍual ạrukuodu.

³Ọnon ọokpaany Ẹnaan dị ạpham ịyaar asigol dị rọlogh ghan ịnsens aru ạmeera sịphe enmeny ạrikia phọ. Ụngo ni nyọdi iboom ịnsens mọ ạsu ạḅam ạnyu enmeny asigol phọ ẹrol bọ ghisigh ạgada ọdaam mọ ạḅaram ịiḅereghi awe phọ Ẹnaan.

⁴Kụ ạmughi ịnsens phọ ọsu bọ rꞌịiḅereghi awe phọ Ẹnaan ẹḍua rạghaagh ọokpaany phọ ạmeera bọ ghisigh phọ Ẹnaan emite ẹghi ạnyu.

⁵Kụ ọokpaany phọ ạsighe ịyaar phọ rọlogh ghan bọ ịnsens phọ kụ ạghoph nịan sịphe enmeny phọ ạlogh amuzeḍi kụ atebeeny sịen ade phọ. Kụ aḍio phọ ẹḅaaghi, ẹmepheghian; ọomaany ạraphan; ade phọ ephiigha.

⁶Kụ oḍual ạruukpaany phọ ẹmoogh bọ oḍual ạrukuodu phọ ookolobian ophula.

⁷Ọḅel phọ aphula nyọpo ọdi, kụ ibikpo rꞌạnian dị ẹguanam ịḅaal eru emeelom de phọ, kụ amuniin esi ịraar abin ade phọ rꞌamuniin esi ịraar abin ireeny phọ rꞌoomo ạtugbiir ạroogho phọ ẹnuughi.

⁸Kụ ọdi atum pạ aphula ọkuodu phọ ọdi kụ oruphuron ịyaar dị ẹghigh eboom eegum rꞌạnian dị reemor oroph osumeeny ọphiiny-ạbazi phọ, kụ amuniin esi ịraar abin ọphiiny-ạbazi phọ akitonu aḍighi ịḅaal,

⁹amuniin esi ịraar abin ạraraar phọ ẹmoogh bọ ḍiphooghu phọ sịphe ọphiiny-ạbazi phọ emuughu, kụ ophiemi muniin esi ịraar abin arughuugh phọ.

¹⁰Kụ ọokpaany Ẹnaan phọ amuneniom bọ ịraar phọ aphula ọkuodu phọ ọdi, kụ eboom ẹenaan dị reemor ịdipho ọtozi ẹḍua ẹpe okuaḍio phọ emeelom muniin esi ịraar abin ạriphiiny rꞌạruunu adir phọ.

¹¹Ḍien ẹenaan phọ ughol mọ Eghiḍim. Amuniin esi ịraar abin ạmuum mọ aghiḍim, kụ eghiḍim mọ ịze ni ịbadi awe dị ọphughol mụum mọ.

¹²Kụ ọokpaany Ẹnaan phọ amuneniom bọ inya phọ aphula ọkuodu phọ ọdi, kụ ufiri asoorom muniin esi ịraar abin erumuḍio phọ rꞌamuniin esi ịraar abin ụnwanyu phọ, rꞌamuniin esi ịraar abin ạraanaan phọ, bịn amuniin esi ịraar abin ạḍiḅaal phọ ạbidi aphe. Ạḍiḅaal ị́tol muniin esi ịraar abin ootaany phọ rꞌamuniin esi ịraar abin aḍughul phọ.

¹³Kụ mị aphogh kụ ạmiin uga dị rạpeeph ẹpe eekuna okuaḍio phọ, dị rạḅem ghan rꞌeboom ẹḍogh mọ, “Ịminimiin, ịminimiin, pọ eeghe ọdo ịminimiin dị kẹtolonaan oomo phọ ạbuphe orugh bọ ẹpe ade phọ, mem mọ bụeri phọ ịraar ạruukpaany phọ kopula aani bọ rụkuodu phọ ạbidi!”