Read abua Ogonanami Phọ 9 Bible Online

Ogonanami Phọ 9 - abua bible

Ogonanami Phọ 9

¹Kụ ọokpaany Ẹnaan phọ amuneniom bọ oogh phọ aphula ọkuodu phọ ọdi. Mị ụmiin ni ẹenaan dị ẹḍua kꞌạke ẹghar sịen ade phọ. Ịsabi ooni ạtu-ropoḍi phọ ụngo nyọdi.

²Ẹenaan phọ eghughuron ooni ạtu-ropoḍi phọ kụ ạmughi ạdumughaan amite ịdipho ạmuo ạnian dị ogu kụ atene erumuḍio phọ rꞌookuugh phọ ufiri.

³Kụ igurubia ẹḍua sịphe ạmughi phọ esoor ude, kụ ọngo bịdi ịikpo dị ẹghigh ịpe asikororoph ạnyu ade.

⁴Kụ ọḅeni bịdi mọ kụ́pue rọogho phọ rꞌireeny phọ, ḅịle rꞌịnon ịizupha; kụ ọlo oḍighi ni ịlo ẹekaany we phọ ạbuphe phọ ụ́moogh bọ elegh phọ Ẹnaan rolhor phọ ạbidi bịn.

⁵Ugbiemi ni igurubia phọ ọze awe phọ ạbuen, kụ umeeraam mọ ẹmiine bịdi bịn esi oogh ụnwanyu. Kụ eephina ịminimiin phọ ạbidi ẹkigh nyẹpe oye lọ aḍikororoph ạnyu ade elom rạmiinom ghan bọ.

⁶Sịphe oogh ụnwanyu phọ awe phọ ạbuen kọwa ghan ḍuugh kụ kọ́miin. Kọwa ghan omugh kụ aḍuugh kekiil li ẹkelan bịdi.

⁷Aḍimite igurubia phọ ịghigh ḍịo ịnam dị mookolobian oseere ọghimom ẹgham. Ịwa ọghigh mụdi bịdi ozua yogh roghoony agol ọdaam ẹmha. Asighisigh phọ ạbidi ịghighogh ịlo awe.

⁸Ạsilaal ẹmhu phọ ạbidi ịghigh ịlo ạnmariir. Ạralaal phọ ạbidi ịghigh ịlo ạnam-dịka.

⁹Uzua rokpologhi phọ ạbidi rạraar dị ẹwa ọghigh ạmama ọsuaram. Ạḍiaḅa araphaaph phọ ạbidi ịghigh ḍịo oghuugh ẹgham dị ạrusu ẹghogh eseere rẹkimom ẹgham.

¹⁰Bịdi ẹmoogh ni ripi rꞌịsoph dị ẹghigh ịlo asikororoph ạnyu ade, kụ ịsoph phọ ạbidi kụ ẹdi bịdi ọmooghom bọ ịikpo oḍighi ghan awe ịlo ẹekaany phọ esi oogh ụnwanyu.

¹¹Ọokpaany phọ oseere bọ ophogh ghan ooni phọ kụ ọolha phọ ạda bọ bịdi. Ḍien ọdi ọnhu aHibru ughol mọ Ạbadon, ọnhu aGris mọ Apolion. Ẹmhu phọ pọ “Opiemiom”.

¹²Ịḅel imananaany phọ meten ni kụ mị ụḅile ni ạmiin ịyal ịnon dị retu.

¹³Kụ ọokpaany phọ Ẹnaan amuneniom bọ odiiny phọ aphula ọkuodu phọ ọdi. Mị ụnaghan ni ẹḍogh dị ẹḅa ghan sịphe inya ạrughulukul enmeny ạrikia phọ ọkanam bọ gol ọmeremi ghisigh Ẹnaan.

¹⁴Kụ ẹḍogh phọ ẹḅeni ọokpaany phọ amuneniom bọ odiiny phọ ạmoogh bọ ọkuodu phọ mọ, “Kpọokpo inya phọ ạruukpaany phọ ọphaḍi bọ ẹpe oboom Ọphiiny aYufratis.”

¹⁵Ụukpo ni inya phọ ạruukpaany phọ. Uukolobian ni bịdi oseenaan mem mọ ạmuen rꞌaḍio phọ ạḍien rꞌụnwanyu phọ ọphon rꞌạlha phọ ạḍien, mọ bịdi ọze muniin esi ịraar abin oomo awe aḅirini phọ.

¹⁶Ụḅeni ni ịmi mọ aḍita ạbuo ẹgham mọ ọdagh bọ ẹsiiny phọ ẹman ịyal okuron egu.

¹⁷Sịphe uḍien phọ, mị ụmiin ni ạrusu phọ rꞌawe phọ oḍiku bọ rokiilom. Ạmama ọsuaram ikpo phọ ạbidi ạghigh nịan rꞌạraraar dị oghol mọ ạsafair rꞌạsolfa. Ạrumhu ạrusu phọ ịghigh ịlo ạnam-dịka, kụ ạnian rꞌạmughi rꞌạsolfa ẹḍua rụnhu phọ ạbidi emiteghu.

¹⁸Ịraar imananaany phọ ẹze bọ muniin esi ịraar abin oomo awe aḅirini phọ ịphen: ạnian phọ rꞌạmughi phọ rꞌạsolfa phọ ẹḍua ghan bọ rụnhu ịnam mọ emiteghu.

¹⁹Ịikpo ạrusu phọ edi ghan sịphe ạrunhu phọ rꞌịsoph phọ ạbidi. Ịsoph phọ ạbidi ẹmoogh rụmhu ịdipho ạrakaraph-ạraraar kụ rẹsighe ghan keḍighinom weye ịlo ẹekaany.

²⁰Bụphe osugha bọ kụ imananaany phọ ịphen phọ ị́teeny bọ sịen aḅirini phọ ụ́bile ịpe bịdi ọkaaghi bọ. Bịdi ụphamanam ni ooseeny ghan aruru rꞌạnmuny aghuḍuul dị ọkaaghiom gol rꞌasilva rꞌenaba rꞌẹna rꞌoreeny, rạraar dị eten rẹ́miin, ḍụghum rẹ́naghan, erelhe rételhe.

²¹Bịdi ụ́bileghi ọko enu rꞌạghama rꞌipesi rꞌimi phọ ạbidi.