Read abua Rut 2 Bible Online

Rut 2 - abua bible

Rut 2

¹ANaomi ạmoogh ni siya dị oghol mọ ạBoaz. Ọdi aḍighi ọdaam ọlo eghun Ẹlimelek olhom mọ ọdi.

²Eniin aḍio aRut ạḅeni Naomi mọ, “Mị kạki ạson aani ịbiakpa lọ ạbuo ibugha phọ oteneghom. Iini sịen mị kạmiin ni oye dị kameera lọ mị kaḍighi rꞌọdi.” Kụ aNaomi ạphagharanaan mọ, “Kịa ạa, nyạni ạmi.”

³Ẹpe kụ esi dị aRut aten ạghi ẹpe iizo phọ kụ arelhe ghan ạdaph bụphe rọku bọ ịbiakpa abali phọ, ạson aani ghan ịlo bịdi oteneghom. Ẹghi bịn eḍighi ịdi ọdi ạghi aḍigh ozo ạBoaz kụ ạson ghan bọ.

⁴Íbia iboom kụ ạBoaz rꞌaloor ạḍua ẹpe Bẹtilihem aru asi kụ ạseph we phọ roḍighi bọ oḍighi phọ mọ, “Ọmoogh-we phọ ạrolan rꞌanyina!” Kụ bịdi omeera mọ, “Ọmoogh-we phọ ạseph ni nyịna!”

⁵Kụ ạBoaz apuru uwo ẹmhu oḍighi phọ mọ, “Ọnyani phọ ọpo phọ ọlo kꞌạnhian?”

⁶Kụ oye phọ ạphagharanaan nyọdi mọ, “Ọphon ooruen ọnyani dị ạḍua ẹpe eelhe ạMoab ạdaph aNaomi arigheel.

⁷Kụ ọdi ụlhom ịmi mọ omeera mọ ọno ạdaph ghan weye oḍighi phọ aakpomoghi aani ghan ịbiakpa abali phọ. Kụ ọdi raḍighi ni kꞌesoph ạḍiroor phọ kụ pụruku ạrol li ude rapooghian ghan sịphe uba phọ.”

⁸Kụ ạBoaz ạḅeni Rut mọ, “Nyạni ạmi, nạghan ịphen mị kạḅeni bọ nyịna. Kạ́ki ghan ọnon ozo ọson ịbiakpa abali phọ omuton sịen ozo phọ ọphon bịn; ḍighi ghan rꞌạnmariir bụen ịsien.

⁹Gon ghan ạmiin esi lọ bịdi rọku bịn ạrolan rꞌạbidi. Mị mạḅeni ni ugheel ạnmuny phọ mọ bịdi nyịna kụ́uḅaghami. Kụ tọro amem lọ ạmuum rạphu nyịna, kịa ghan ạphughol aani sịphe aroko ạmuum mọ bịdi ọpham bọ.”

¹⁰Kụ aRut azumeri ghisigh ọdi akaram ude, kụ ạḅeni nyọdi mọ, “Eeghe kụ nạ ruphogh bọ ịmi kꞌịphen kꞌịphen phọ? Eeghia kụ nạ rạloghonaan bọ ḍịghaagh dị eleeny ịduon ooruen?”

¹¹ẠBoaz ạphagharanaan kụ ạḅeni Rut mọ, “Mị mạnaghan ni oomo ịpe nạ aḍighinaan bọ onhiin olhom ạna kꞌaḍio phọ olhom mọ ạna amugh bọ. Mị alegheri ni ịpe nạ ạwile bọ ọde rꞌonhiin rꞌẹmha phọ ạna kụ aru orughan rꞌawe dị nạ úlegheri ghan.

¹²Ọmoogh-we phọ aanmo ni nyịna ruunmo esi ịphen nạ maḍighi bọ. Mọogh ni ruunmo amuzeḍi ḍịghaagh Ọmoogh-we Ẹnaan phọ Ịzirel, ọpo nạ maḍigh bọ ḍibuo ọdi.”

¹³Kụ aRut ạḅem mọ, “Oye phọ, maḍighi iiḅi phọ ịphen nạ uḍighi bọ ịmi. Nạ mạsighe ịma ikpo ọnhu ụudereghiom ịmi ghạlamo ịduon mị ụ́man bọ ni oniin otelhedom ạna.”

¹⁴Rẹteeny mem olhe eḍien kụ ạBoaz ạḅeni Rut mọ, “Tue ạsighe ọpherepe ạbred atiom aani sịen amooboph phọ.” Kụ ọnyani phọ rꞌawe oḍighi phọ ọḅophoghan olhe, kụ ạBoaz ạsighe ọbiakpa dị ọphoghi ạngaani ọnyani phọ, kụ ọdi alhe ẹpher kụ ẹḅile esugha.

¹⁵Mem dị aRut ạḅile bọ aḅetenu ọson ịbiakpa abali phọ, ạBoaz ạto ni ạḅeni weye oḍighi phọ ọdi mọ, “Imeera ọnyani phọ ạsonom aani igey arughuuny ịbiakpa phọ. Kémirighan nyọdi. Ḅịle kẹn ịkaraghi ni ẹsighe igey arughuugh etebenaan ghan mọ ọdi ạson.”

¹⁷Kụ aRut ạsonogh ghan ịbiakpa abali sịphe ozo phọ tụtu kꞌadulhe, kụ ọdi rọponyon kụ ạmiin mọ rẹkiom ḍioph igbogh ịtoom ẹemor.

¹⁸ARut ạsighe ịbiakpa abali phọ agheelom kụ aḍeenaan onhiin olhom mọ ọdi. Ọdi ạngo aani kẹn ạnir phọ eḍien phọ ẹpe bịdi olhe bọ ẹpe ozo phọ dị esugha.

¹⁹Kụ aNaomi apuru nyọdi mọ, “Ẹghen kụ ẹdi nạ ạson bọ oomo phọ ịphen phọ? Ozo ạnhian kụ ẹdi nạ akumuan ghan bọ? Ẹnaan ẹseph ni oye phọ ạloghonaan bọ nyịna ḍịghaagh phọ!” Kụ aRut ạḅeni Naomi mọ ọno akumuan ghan ozo oye dị oghol mọ ạBoaz.

²⁰ANaomi ạlho kụ ạḅem mọ, “Ọmoogh-we phọ ạseph Bọaz! Agey ni, Ọmoogh-we phọ rạpamanam ghan ni ịlo ọdi aguanaan oye, ghạlamo oye phọ amugh ni. Oye phọ ọpo phọ asiya ayira ni, oye dị ạkpe ni ophogh ayira.”

²¹ARut ạḅem mọ, “Oye phọ ụḅeni kẹn ni ịmi mọ mị ụki ghan ụsonogha sịphe ozo phọ ọno tụtu awe phọ ọno ọmadan ibugha phọ.”

²²Kụ aNaomi ạḅeni Rut ạna-oyil phọ ọdi mọ, “Ii, nyạni ạmi. Ẹnighe ni dị nạ kaḍighi ghan oḍighi rꞌạnmariir phọ ẹpe ozo phọ ạBoaz. Nạ ạghi ọnon ozo, bịdi kọgilaam ni nyịna.”

²³Kụ iḍighi kụ aRut aḍighi ghan rꞌạbidi tụtu ibugha ịbiakpa phọ rꞌịbiakpa abali phọ emuneen. Kụ ọdi ạrolan ghan ni rꞌonhiin olhom mọ ọdi.