Read abua Rut 3 Bible Online

Rut 3 - abua bible

Rut 3

¹Mem dị ọony ẹnum amem reten, aNaomi ạḅeni Rut mọ, “Mị kạwaanaan nyịna olhom pịdi nạ ạmoogh eghunotu ẹlo ạna.

²Legheri mọ ạBoaz phọ, ọphon ạnmanyaan-otu phọ ọdi rꞌạna eḍighi ghan bọ, ọnyo asiya ayira ni. Nạghan. Dulhe phọ arodon ọdi kạponyon ịbiakpa abali phọ ọdi.

³Kịa awura mụum, agbula elho, ạkpologhian ogey ạsuoma kụ ạghi ẹpe ọdi rạponyon ghan bọ ịbiakpa abali phọ, kụ ọlo kámeera ọdi ạmiin nyịna tụtu ọdi malhe eḍien ạḅile ạpughol miim.

⁴Mạar aphogh sịphe ọdi kạmina bọ, kụ mem dị ọdi rạnaani, kịa aphoophe ukpe phọ ọpo ọdi azua bọ, kụ ạmina ẹpe aruwol phọ ọdi.”

⁵Kụ aRut ạphagharanaan kụ ạḅeni Naomi mọ, “Mị kaḍighi ni oomo ịlo nạ ạḅem.”

⁶Kụ aRut aten ạghi ẹpe rọponyon ghan bọ ịbiakpa phọ kụ ạtuugh oomo ịpe onhiin olhom mọ ọdi ạḅeni bọ nyọdi aḍighi.

⁷Kụ mem dị ạBoaz malhe eḍien ạphughol miim, ologhi ọdi ạḅaal, kụ ọdi ạghi sịphe eekuna egu ịbiakpa abali phọ kụ ạmina rạnaani, kụ aRut aḍighi lẹeph ạghi aphoophe ukpe phọ oye phọ azua bọ kụ ạmina sịphe ruwol phọ ọdi.

⁸Ẹteeny ogbo aḍughul kụ oye phọ akperenom ạsuma, akiton ọgho, kụ iḍighi ni iikia esi ọdi ọmiin mọ ạnir-ephoph ạmina ni sịphe ruwol phọ ọdi.

⁹Kụ ọdi apuru mọ, “Nạ ạnhian?” Kụ ọnyani phọ ạphagharanaan mọ, “Oye phọ, mị aRut ọnyani-otu phọ ạna. Nạ aḍighi bọ ni ọnyo asiya ayoor, ẹkpe ni dị nạ kạmaar uphogh ịmi. Ịduon kụ iḍighi kụ uphin ịmi.”

¹⁰Kụ ạBoaz ạḅem mọ, “Ọmoogh-we phọ ạseph ni nyịna, nyạni ạmi. Ịma phọ ịphen nạ alher bọ loor phọ ạna ạngo eghunotu phọ ayoor epu ni oomo ịma phọ ịpe nạ maḍighinaan bọ onhiin olhom mọ ạna. Nạ mutue ni ạghi ạdaph tọrobo onyugheel ọony lọ nạ ạwa mụghumo ọolha mꞌuwekulom, kụ nạ ịdipho óḍighi.

¹¹Ịduon kụ iḍighi kụ kạ́moogh ọto. Mị kaḍighi ni oomo ịlo nạ apuru. Oomo iigbo ạmi alephiri ạnmuny ịsien ẹmha phọ olegheri ni mọ nạ ạnir eeḅi ẹzo.

¹²Agey phọ ni, mị oyogo ạna ni dị ạkpe ni ooko ạna, kụ ọlo ọnon oye odi ni dị rꞌanyina esian ipu ịmi.

¹³Mịna sịen ẹḅaal ḍịroor kụ ọghi ọwaaghi ophogh mụghumo ọdi kaḍighi ni nyịna ịlo arogo. Ọdi ameera, pọ ẹnighe ni; mụghumo ọdi ómeera, pọ mị akunya rꞌaḍien Ẹnaan phọ edi ghan bọ, mị kaḍighi ni nyịna ịlo arogo. Mịna sịen tụtu ẹḅaal ḍịroor.”

¹⁴Kụ aRut ạmina sịphe aruwol phọ ạBoaz ẹḅaal, kụ ọlo ọdi aḅon aḅetenu mem dị kọ̋miina siloor loor esi dị ạBoaz ọ́wa mọ oye alegheri mọ ọnyani phọ ạmina sịphe.

¹⁵Kụ ọdi ạḅeni Rut mọ, “Sịghe ukpe phọ ạna ạde sịen.” Kụ aRut ạtuugh ịdipho aḍighi, kụ oye phọ ạsighe iboom ịbiakpa abali dị rẹkiom ni ịyaldi igbogh ịtoom ẹemor ạlogh aphurughiom kụ ạsighe ạleti ọnyani phọ, kụ ọnyani phọ ạpham agheelom ẹpe ẹmha phọ.

¹⁶Mem dị ọnyani phọ asi bọ ologhi otu kꞌonhiin olhom mọ ọdi, kụ aNaomi apuru nyọdi mọ, “Nyạni ạmi, ẹghi phọ ịrol ika?” Kụ aRut ạghaaph oomo ịpe ạBoaz aḍighinaan bọ nyọdi ạḅeni aNaomi.

¹⁷Kụ ạloghom mọ, “Oye phọ ụḅeni ịmi mọ mị kútigheel rꞌoopho ạraghaagh. Kụ iḍighi kụ ọdi ụngo bọ ịmi oomo ịbiakpa abali phọ ịphen.”

¹⁸ANaomi ạḅeni nyọdi mọ, “Nyạni ạmi, koriom tụtu nạ ạmiin ịpe kemite bọ. Oye phọ kápooghian rodon tụtu ọghaaph phọ ọphon asi eekuna.”