Read abua 1 Sạmuel 12 Bible Online

1 Sạmuel 12 - abua bible

1 Sạmuel 12

¹Kụ ạSamuel ạḅeni we phọ Ịzirel mọ, “Mị maḍighi ịpe nyina ịḅeni bọ ịmi oḍighi phọ. Mị mịngo inyina ọdaam ẹmha dị kịda inyina.

²Nyịidipho ọdi kụ kiḍiemiom ghan inyina. Ẹlo ạmi ạmi, mị mạkpo asi sụol, kụ ạnmuny phọ ạmi odi ni rꞌanyina. Mị maḍighi ni oḍiemiom anyina kꞌẹghoroghor ạmi tụtu kꞌarodon.

³Ịporono ạmi. Eḍighi ịyaar dị mị maḍighi ghan oye ịkaraph, pọ oye phọ aru ạghaaph sịen risigh Ọmoogh-we phọ rꞌarisigh ọdaam mọ ọdi mạsaḅar bọ. Ạnam ạnhian kụ ẹdi mịna mạsighe? Ẹnam adool ạnhian kụ ẹdi mịna mạsighe ghan? Ạnhian kụ ọdi mịna maagbegheḍiom ghan? Ạnhian kụ ọdi mịna mạkpiloghom? Ạnhian kụ ọdi mịna malhe ghan ịgara ḍịghaagh ọdi? Eḍighi ịyaar dị mị maḍighi ghan oye ịphen phọ, pọ mị kạkpe ni ịpe mị ạsighe bọ.”

⁴Kụ awe phọ ọphagharanaan mọ, “Eeye, nạ iyoor kűugbegheḍiom, ḅịle kẹn kọ̋kpiloghom, nạ ịyaar oye kőziton ghan ạar.”

⁵Kụ ạSamuel ạphagharanaan mọ, “Ọmoogh-we phọ rꞌọphon ọdi ạsaḅar bọ ọmeera enye ạmi rodon mọ nyina ẹmiin ni mọ mị ịyaar oye ụ́piom.” Kụ bịdi ọḅem mọ, “Ii, Ọmoogh-we phọ ạmeera ni enye ayoor.”

⁶Kụ ạSamuel ạḅeni we phọ mọ, “Ọmoogh-we phọ kụ ạsaḅar Mozis rꞌEeron kụ ạsighe bụrude ạburude phọ anyina ẹpe eelhe phọ Ijipt amitiom.

⁷Ịmeregha eḅoorian. Mị rꞌanyina kẹgbaaghian ghisigh Ọmoogh-we phọ. Mị ịghiom inyina ologhi igbogh ạraraar phọ Ọmoogh-we phọ aḍighi bọ ọphelom anyina rꞌạburude phọ anyina.

⁸Mem mọ ọpo ạJekob rꞌeghunotu phọ ọdi oten bọ ọghi Ijipt kụ awe phọ Ijipt ọkpilighi bọ bịdi, ạburude phọ anyina umoghi ni ọmagh Ọmoogh-we phọ mọ ạloghonaan bụno ḍịghaagh, kụ ọdi arom Mozis rꞌEeron, kụ bịdi ọsighe weye phọ ẹpe Ijipt omitiom kụ orughemi bịdi sịen ade phọ ạḍien.

⁹Kụ awe phọ uwula Ọmoogh-we Ẹnaan phọ ạbidi. Kụ iḍighi kụ ọdi ameera kụ awe aFilistia rꞌọdaam eelhe phọ ạMoab rꞌaSisera oḍiemiom awe ẹgham mọ aJabin ọdaam mọ aHazor, eenan ghan bụrude ạburude phọ anyina rạagham kụ ọkpar ghan opu bịdi.

¹⁰Bịdi umoghi ni ọmagh Ọmoogh-we phọ mọ ạloghonaan bụno ḍịghaagh kụ ọḅem ghan mọ, ‘Yoor moḍighi ịkaraph, loor esi dị yoor mọḅitonaan nyịna Ọmoogh-we phọ kụ rọoḅereghi ghan ruru phọ aBaal rꞌAstarte. Nyịidipho ụphel iyoor ạsighe ḍịghaagh bụmulogh-ḍien phọ ayoor, bịn yoor kọoḅereghi ni nyịna.’

¹¹Kụ Ọmoogh-we phọ arom Gịdion rꞌạBarak rꞌaJefta rꞌạmi. Tọrotoro ọnyo ayoor ịphel ghan ni inyina ḍịghaagh ạbumulogh-ḍien phọ anyina oomo arikpisi phọ; kụ nyina ẹrol ghan dọl ẹereegh.

¹²Kụ mem dị nyina ẹmiin bọ mọ aNahas ọdaam mọ Amon rạwa ozuom anyina ẹgham, nyina eghel Ọmoogh-we phọ mọ kúḍighi mun ọdaam mọ anyina kụ ịḅeni ịmi mọ, ‘Yoor rọwa ọdaam ẹmha lọ kụda iyoor!’

¹³“Nyịidipho ịporono ọdaam ẹmha phọ nyina ẹsaḅar bọ, ọpo nyina ịlhom bọ ịmi. Ọmoogh-we phọ mịngo inyina nyọdi.

¹⁴Oomo ạraraar kịnighenaan ni inyina eru mạar dị nyina ẹlogh ni eegu Ọmoogh-we phọ, ekumu nyọdi, ẹnaghanan nyọdi, ẹḅile eḍighi ghan ịto phọ ọdi; ḅịle kẹn, eru mạar dị nyina rꞌọdaam ẹmha phọ anyina ẹdaph ni nyọdi.

¹⁵Kụ eru mạar dị nyina ị́naghanan Ọmoogh-we phọ ímeera ịdaph ịto phọ ọdi, pọ ọdi kiphoghom ni inyina rꞌọdaam mọ anyina ẹkaraph ekpeḍien.

¹⁶Kụ iḍighi kụ ịmeregha zim, bịn nyina kẹmiin ni igbogh ạraraar phọ Ọmoogh-we phọ kaḍighi bọ.

¹⁷Ọphon amem aghozogh, kị́dipho? Kụ mị kạaḅereghi kụ Ọmoogh-we phọ aseere ọlophia, aḍio phọ ẹḅile ẹtaphan. Mem dị ịphen phọ emite, kụ nyina egbi ologhoma mọ nyina ịpioman ni iboom esi Ọmoogh-we phọ mem mọ nyina ẹḅeni bọ nyọdi mọ ọdi ịngo inyina ọdaam ẹmha phọ.”

¹⁸Kụ ạSamuel ạaḅereghi Ọmoogh-we phọ, kụ ḍio phọ ạḍiphe phọ ni bịn Ọmoogh-we phọ aseere ọomaany rꞌọlophia, kụ oomo awe phọ oghiilaan Ọmoogh-we phọ rꞌạSamuel.

¹⁹Kụ bịdi ọḅeni Sạmuel mọ, “Seseeny, oye phọ, kol ẹmhu ayoor ạaḅereghi Ọmoogh-we Ẹnaan phọ ạna ọbo yoor komuughu ghan bọ. Yoor molhoghoma nyịidipho mọ yoor moḍighi kẹn ịnon ịkaraph ọḅaram oomo ịpheri phọ ọḅeni ạna mọ ụngo iyoor ọdaam ẹmha.”

²⁰ẠSamuel ạphagharanaan bịdi mọ, “Kékiilaan. Ghạlamo sịpioghom mọ ịphen nyina mẹpioghom bọ ni, kẹ́ḅitonaan Ọmoogh-we phọ. Ikumu ni nyọdi rꞌoomo iloghi phọ anyina.

²¹Kẹ́daph ruru: bịdi inyina kétue ẹloghonaan ḍịghaagh, kétue kẹn ẹpel loor esi dị bịdi ị́moogh ịyaar oḍighinom.

²²Ọmoogh-we phọ maguanaan kụ ọdi inyina kị́wile, loor esi dị ọdi magbiighi amuneni ọsighe anyina oḍighi awe ọdi.

²³Ẹlo ạmi ạmi, Ọmoogh-we phọ kúmeera dị mị kạbile ọoḅereghinaan anyina bịn mị aḍighi ịkaraph esi ọdi. Kpạripe ghụn, mị kịtughemi ni inyina rạraar phọ ịpe ẹnighe bọ ẹḅile eḍighi elhiom, pịdi nyina eḍighi ghan.

²⁴Ịnaghanan ghan Ọmoogh-we phọ ekumu nyọdi agey rꞌoomo ologhi anyina. Ịitughian ghan igbogh ạraraar phọ ọdi miḍighinaan bọ inyina.

²⁵Kụ ọlo eru mạar dị nyina eḍighi ịkaraph ẹghiom ghisigh, pọ nyina rꞌọdaam ẹmha phọ anyina koogulaan ni.”