Read abua 1 Sạmuel 13 Bible Online

1 Sạmuel 13 - abua bible

1 Sạmuel 13

¹ẠSol mạman ịraardi ạsia kụ agbi bọ oḍighi ọdaam ẹmha phọ, kụ ọdi ạda bọ Ịzirel ịman ni inyadi rꞌịyal ạsia.

²ẠSol ạson ịraar ọonir awe, ọdi aseere ịyal ọonir awe ọrol rꞌọdi ẹpe Mikmas rꞌẹpe aroogbolom mọ ạBetel, kụ ọdi arom oniin ọonir rꞌọony phọ ọdi Jọnatan mọ ọghi Gibia, ẹpe eelhe eghun phọ ạBenjamin. ẠSol ạḅeni bụeri phọ awe phọ mọ ogheleghu ẹpe kꞌạbidi.

³ẠJonatan aghiigh ni oḍiemiom awe ẹgham mọ aFilistia ẹpe Geba, kụ oomo awe aFilistia ụnaghan ni. Kụ ạSol arom butelhedom mọ ọghi ophula ọkuodu phọ okitonom oomo ade phọ ọmagham oomo awe aHibru phọ ọghi ẹgham.

⁴Ụghaaph ni ọḅeni oomo awe Ịzirel mọ ạSol maghiigh oḍiemiom awe ẹgham mọ aFilistia, ḅịle kẹn mọ awe phọ aFilistia mọ mọlhogh bụno ḍien. Kụ iḍighi kụ oomo awe phọ ụnaghanan ni ḍịmagh phọ ọghi oḍighan rꞌạSol ookpomoghan ẹpe Gịlgal.

⁵Aweye phọ aFilistia uukpomoghan ni ọghi eeghian ẹgham rꞌaweye phọ Ịzirel; bịdi ụmoogh ni ịraardi ọonir arughuugh-ude, odiiny ọonir awe dị rokiilom ghan ạsu, kụ awe ẹgham dị kọtomaam ịisaar dị edi sịphe ọgbal ọphiiny phọ; kụ bịdi ọghi osi Mikmas, ẹmha dị nạ ạghi asi Bẹt Aven edi ḍịghaagh phọ ạḍiphe erumuḍio phọ remite ghan bọ kụ bịdi odoghoḍi rugbogo ẹgham ạbidi.

⁶Kụ bịdi ozuom ẹgham we phọ Ịzirel kụ ẹgham mọ eeph ni ḍịghaagh awe phọ Ịzirel. Abuniin awe phọ Ịzirel ạaghian yogh iloghi aropogh aruugum rꞌigbo asighiigh rꞌariini rꞌasighuḍia;

⁷buniin ạbidi ọḅeeny ọphiiny phọ ạJodan ophun osuma ọghi ẹpe areelhe phọ ạGad rꞌạGiliad. ẠSol ạrol li ẹpe Gịlgal, kụ aruugu rasiph weye phọ ạbuphe ọrol bọ rꞌọdi.

⁸Ọdi ạrol oḍual aḍughul-otu akori ghan Sạmuel, ịdipho ạSamuel mạḅeni bọ nyọdi mọ ọdi aḍighi, kụ ạSamuel kőru osi Gịlgal. Awe phọ omiigh ọwile ọdi ọḍuaghu,

⁹ẹpe kụ esi dị ạSol ạḅeni bịdi mọ, “Ịsighe iruom ịmi rịkia oguom ạnian phọ rꞌạrikia ẹboroph phọ.” Kụ ọdi ạphighiron ẹkia oguom ạnian phọ,

¹⁰kụ ọdi rạmadan bọ bịn, ạSamuel aru asi; kụ ạSol ạghi ọteeny ọdi ọḅeni mọ nạ masi,

¹¹kụ ạSamuel ạḅeni nyọdi mọ, “Nạ maḍighi ika?” Kụ ạSol ạphagharanaan mọ, “Awe phọ mụwile ịmi rọḍuaghu, kụ nạ kőru ịdipho nạ ạḅem bọ, ḅịle kẹn bụo aFilistia phọ mookpomoghan ẹpe Mikmas,

¹²kụ mị agbiighi mọ, ‘Tạa. Bụo aFilistia phọ rọwa oru ẹphen Gịlgal ozuom ạmi ẹgham, kụ mị kọ̋ghi esi Ọmoogh-we phọ ọlhom ooḅi ọghor phọ ọdi.’ Kụ mị aphogh bọ ẹkpe ni ọphighiron ẹkia.”

¹³Kụ ạSamuel ạphagharanaan mọ, “Nạ mạpioman ịdipho oye dị ịyaar úlegheri, nạ ọ́daphan ịto Ọmoogh-we Ẹnaan phọ ạna. Mụghumo nạ ụnaghanan ni ọbo ọdi muḍighi ni ịdi nạ rꞌoghiil phọ kꞌạna bịn kụ mụda ghan Ịzirel kꞌagee-pọ.

¹⁴Kụ nyịidipho phọ nạ kạ́da mun ạkiom risigh. Loor esi dị nạ ụ́naghanan mun bọ nyọdi, Ọmoogh-we phọ kạwa ni oye lọ ạḅeeraan nyọdi azu eghoony mọ ạda weye phọ ọdi.”

¹⁵ẠSamuel ạḍua ni Gịlgal anyeene ogheel. Ạbueri phọ awe phọ ọdaph Sọl ọghi ọteeny ḍita awe ẹgham mọ ọdi. Bịdi ụḍua Gịlgal kụ ọghi osi Gibia ẹpe eelhe phọ ạBenjamin. ẠSol ạaḅeghion ni ḍita awe ẹgham mọ ọdi kụ ạmiin mọ rọkiom ni odiiny okuron awe.

¹⁶ẠSol rꞌạJonatan ọony phọ ọdi rꞌawe phọ ạbidi udoghoḍi rugbogo ẹgham ạbidi ẹpe Geba ẹpe eelhe phọ ạBenjamin; arugbogo awe aFilistia phọ ẹrol ẹpe Mikmas.

¹⁷Aweye ẹgham aFilistia udi ni loor ạbidi ịraar asita kụ ọḍua ghan sịphe arugbogo ẹgham mọ ạbidi bịn ọghi ghan ophogh ẹmha ozuom ẹgham: aḍiniin aḍita unyeene ẹpe Ofra ẹpe eelhe phọ aSual,

¹⁸ạḍinon aḍita phọ onyeene ẹpe Bẹt Horon, kụ ạḍieri phọ onyeene ẹpe ọtol ropogh ọku oodiph phọ aZeboim rꞌẹdala phọ.

¹⁹Awe dị ọmaar ọsugh ika kụ ọlemom ọlem ụ́tol ghan Ịzirel loor esi dị bụo aFilistia phọ ukikima ni bụo aHibru phọ mọ kụ́maar ọlem arolhool rꞌịsoph.

²⁰(Aweye phọ Ịzirel ụghi ghan ni Filistia kụ ạbuo aFilistia phọ ọgholanaan bịdi rolhool rꞌạrusua, rꞌasikubu rꞌarepeke.

²¹Ụkpe ghan ọony ẹnum ikpo ikpoki kụ ọgholanaan bịdi sikubu ọḅile oseleminaan rụsua ịnam-oḍighi, kụ ọkpe ghan ịyal ikpoki kụ ọgholanaan rạraar oḍighinom oḍighi ozo rꞌạrusua.)

²²Ịduon phọ kụ iḍighi kụ ḍio ẹgham mọ rꞌoniin oye ẹgham mọ Ịzirel ọ́pham rolhool rꞌịsoph. ẠSol rꞌạJonatan ọony phọ ọdi bịn kụ ụpham elhool rꞌọsoph.

²³Aweye aFilistia urom ni ḍita awe ẹgham mọ ọghi okori eten phọ ẹpe koḅugh bọ kụ omite Mikmas.