Read abua 1 Sạmuel 14 Bible Online

1 Sạmuel 14 - abua bible

1 Sạmuel 14

¹Eniin aḍio kụ ạJonatan ọony phọ ạSol ạḅeni mạtuan phọ rạpam ghan bọ reenema phọ mọ, “Ọghi ẹpe arugbogo ẹgham awe aFilistia phọ.” Kụ ọlo ạJonatan ọ́ḅeni Sọl ọde phọ ọdi,

²dị ạrol ghan sịphe azin ekpetughe phọ ẹpe Migron, ị́kelan ọḍua osi aGibia; ọdi ạmoogh ni we dị rẹkiom ni odiiny okuron awe dị ọrol ghan rꞌọdi.

³(Oyil ạrikia dị ạpham ghan dọni ughol mọ Ahaija, ọony umor Ikabod dị oghol mọ Ahitub. Ọdi ọony ạFinehas ọnyanyani phọ Ilai oyil ạrikia phọ Ọmoogh-we phọ ẹpe Sailo.) Awe phọ úlegheri mọ ạJonatan mạḍua.

⁴Ẹpe eten phọ ẹpe koḅugh bọ kụ omite Mikmas, ẹpe ạJonatan katen bọ kụ ạki rugbogo awe ẹgham mọ aFilistia, ịyal igbogh asighiigh dị eroph ịrol li. Aḍiniin ịrol ḍịghaagh elhiom, ḍiniin ẹrol ḍịghaagh ekeeny eten phọ; ḍiniin ughol mọ aBozez, ḍịeri phọ oghol mọ aSene.

⁵Aḍiniin ịrol ephunom eten phọ ẹtol repogh Mikmas; ạḍieri phọ ịrol esoorom mọ, ẹtol repogh Geba.

⁶ẠJonatan ạḅeni mạtuan phọ mọ, “Ọḅeeny ọghi ẹpe arugbogo ẹgham ạbuo aFilistia awe aruru phọ. Iini Ọmoogh-we phọ kụloghonaan ni iyira ḍịghaagh; eḍighi ịyaar dị ọdi ạlogh ḍịghaagh, pọ ọdi kụngo ni iyira ọkpar opu; ghạlamo ịduon yira oghom bọ ni.”

⁷Kụ ạmatuan phọ ạphagharanaan mọ, “Tọrotoro ịlo nạ rạwa oḍighi, mị odi ni rꞌạna.”

⁸Kụ ẠJonatan ạḅeni mọ, “Ẹnighe ni, yira kọḅeeny ọki awe phọ aFilistia ụmiin iyira.

⁹Eru mạar dị bịdi ụḅeni iyira mọ okori bụno oru ụteeny iyira, pọ yira kọtol li sịen yira odi bọ.

¹⁰Kụ ọlo eru mạar dị bịdi ụḅeni iyira mọ ọghi ọteeny bụno pọ yira kọki ni loor esi dị ẹpe phọ keḍighi eḍeenaan mọ Ọmoogh-we phọ mụngo iyira ọkpar opu.”

¹¹Kụ bịdi oḍighi ịdi awe aFilistia phọ ọmiin bịdi, kụ awe aFilistia phọ ọḅem mọ, “Ịmiin, buniin awe aHibru phọ mọḍuaghu ropogh ịbooghian phọ ạbidi romiteghu!”

¹²Kụ bịdi ọmagh Jọnatan rꞌonyugheel phọ rạdaph ghan bọ nyọdi mọ, “Itu ẹphen! Yoor ọmoogh ni ịyaar ọḅeni anyina.” ẠJonatan ạḅeni ọony phọ ọdi mọ, “Ụdaph ịmi. Ọmoogh-we phọ mạngo Ịzirel ọkpar opu.”

¹³Kụ ạJonatan arelhiom ruukum rꞌạraghaagh ọdi aḅuku aten kụ ạmatuan phọ ọdi ạtuugh ịdipho ạdaph nyọdi. ẠJonatan azuom elephiri weye aFilistia phọ ạgurogh bịdi alhereghi kụ ạmatuan phọ ọdi ạze bịdi.

¹⁴Ọḅel ozuom mọ ọphon phọ ạJonatan rꞌọony phọ ọdi ụze ni we dị ọkiom ni ịyaldi awe eghir esi dị ẹman ni ẹkpigh ozo.

¹⁵Oomo phọ awe phọ aFilistia ọrol bọ otuman ẹpe phọ, ạbuo ạrukpara ẹgham mọ rꞌạbuphe ọrol bọ sịphe arugbogo, ụmoogh ni oboom oghiilaan; ade phọ iphiigha ni kụ akuboom aruugu asiph oomo phọ ạbidi.

¹⁶Aweye phọ ạSol odi bọ rokori ghan ẹpe Gibia ẹpe eelhe phọ ạBenjamin ụmiin dị awe ẹgham mọ aFilistia oghilighu rosumughu.

¹⁷Kụ ạSol ạḅeni we phọ ọdi mọ, “Igbi we phọ ayira ọmiin oye lọ sịen úlho.” Bịdi ụtuugh ni ịduon phọ oḍighi kụ ọmiin mọ ạJonatan rꞌonyugheel ọony phọ rạpam ghan bọ reenema ẹgham mọ ọdi úlho.

¹⁸Kụ ạSol ạḅeni Ahaija mọ, “Sịghe aru dọni phọ.” (Ḍio phọ ạḍiphe phọ Ahaija ạpham ạsuoma phọ kụ ạmeeraam esomanan awe phọ Ịzirel.)

¹⁹Ịdipho ạSol odi bọ rạkaaphan rꞌọpinyon rịkia phọ, ịiḅaghami phọ rẹbugh ghan bịn ẹpe arugbogo awe aFilistia phọ, ẹpe kụ esi dị ạSol ạḅeni oyil ạrikia phọ mọ, “Amem ílho opuru Ọmoogh-we phọ ịyaar!”

²⁰Kụ ọdi rꞌawe phọ ọdi ọghi ozuom ẹgham weye aFilistia phọ, bịdi rꞌạbidi robeeghi ghan.

²¹Abuniin awe aHibru dị oḍighan bụo aFilistia phọ kụ ọdaph ọghi aani ẹgham mọ ukitonaan bịn ọghi oḍighan Sọl rꞌạJonatan.

²²Ạbunon ạbudi ạaghian yogh ẹpe aroogbolom mọ Ifraim, mem dị ọnaghan bọ mọ bụo aFilistia phọ rosumughu phọ, bịdi oḍighan ozuom we phọ aFilistia

²³eenan bịdi ophorogh tụtu ọghi otenom Bẹt Aven. Ọmoogh-we phọ ạphel li Ịzirel ḍio phọ ạḍiphe.

²⁴Aweye phọ Ịzirel udughogh ni ḍio phọ ạḍiphe phọ loor esi ọkoony, ịdi eḍighi bọ ạSol maghunya ạto ạḅem mọ, “Itulughian ẹrolonaan oye lọ ale eḍien rodon kụ egbi ọteeny amem dị mị kaḅulemian bụmulogh-ḍien phọ ạmi.” Kụ iḍighi kụ oye ịyaar ólhe oomo ẹmhu aḍio phọ.

²⁵Kụ bịdi ọghi osi eniin eḍum dị ẹnuum aḍiowo emuza.

²⁶Ẹnuum aḍiowo kụ imuza eḍum mọ, kụ ọlo oye óti ọlaay loor oghiilaan itulughian phọ ạSol.

²⁷Kụ ọlo ạJonatan ọ́naghan aani mem mọ ọde phọ ọdi agurughi bọ oye lọ kale ịyaar mem dị kẹ́teeny; kụ ọdi ạsighe oreeny dị ọdi ạpham asumeeny esi dị ẹnuum aḍiowo ẹrol, bịn ọdi ạlaay ẹnuum aḍiowo phọ. Egina amem bịn ọdi aamanam.

²⁸Kụ ọlo oniin oye ạḅeni ni mọ, “Asiloor ayoor medughogh loor esi ọkoony, kụ ọde phọ ạna ụpaar iyoor kụ ạḅem mọ, ‘Itulughian ẹrolonaan oye lọ ale eḍien rodon.’”

²⁹ẠJonatan ạphagharanaan mọ, “Ọpo eeghia ọdo ịkaraph dị ọde phọ ạmi aḍighi we phọ ayira. Mịin ịdi aloor ạmi mẹpho sịen mị ạlaay bọ ẹnuum aḍiowo phọ.

³⁰Ạraraar mịnighe ni epu sịen rodon phọ mụghumo awe phọ ayira ule ni riiḍien phọ bịdi mụḅile ọsighiogh bọ mem mọ bịdi ọkpar bọ opu ạbumulogh-ḍien phọ ayira. Tụutughian bịn kụ aphogh ọnhu aweye aFilistia dị bịdi ọze.”

³¹Ḍio phọ ạḍiphe aweye phọ Ịzirel ụkpar ri opu weye phọ aFilistia eeghian bịdi emiigh ẹpe Mikmas kụ esi Aizalon. Mem mọ ạmuen phọ asiloor awe phọ Ịzirel medughogh ẹkporokporo loor esi ọkoony,

³²kụ iḍighi kụ bịdi oogborion ọsighe rạraar phọ bịdi ạanyi bọ ẹpomoghian phọ; bịdi ọsighe iyool-ịga rꞌạsinam, ọze bịn ạanyi ịnam mọ mem dị ịḅaal phọ ke̋mite ẹman.

³³Kụ ọghaaph ọḅeni Sọl mọ, “Mịin, awe phọ roḍighi ịkaraph risigh Ọmoogh-we phọ. Bịdi ọḅar ịnam rꞌịḅaal.” Kụ ạSol ạlho mọ, “Nyina mẹpioman. Iikilemi ḍiboom aḍighiigh iruom ịmi rodon.”

³⁴Kụ ọdi ạḅile ạto kụ ạḅem mọ, “Ịki ẹteeny we phọ ẹḅeni bịdi mọ bịdi ọsighe sịnam rꞌiyool-ịga phọ ạbidi ọsighe oru sịen. Bịdi ọrol sịen ọze ọḅile ạa ịnam mọ; bịdi kụ́ba ịnam rꞌịḅaal ọbo koḍighi ghan bọ ịkaraph risigh Ọmoogh-we phọ.” Kụ iḍighi kụ ḍughul phọ ạḍiphe phọ oomo phọ ạbidi ọsighe oru sịnam, kụ ọrol sịphe kụ ọze.

³⁵ẠSol ạkananaan enmeny ạrikia Ọmoogh-we phọ, ẹphen kụ ẹḅel enmeny dị ọdi ạkan.

³⁶Kụ ạSol ạḅeni we phọ ọdi mọ, “Ịgua ọghi ozuom bụo aFilistia phọ mem aḍughul eeghian bịdi ọze tụtu ẹḅaal ḍịroor.” Bịdi ọphagharanaan mọ, “Ḍighi ịlo nạ agbiighi mọ ẹnighe.” Kụ oyil ạrikia phọ ạḅem mọ, “Ọphur opuru Ẹnaan kụ.”

³⁷Kụ ạSol apuru Ẹnaan mọ, “Mị uzuom ni ẹgham we aFilistia phọ ḍụghum? Nạ kụngo ni iyoor ọkpar opu?” Kụ ọlo Ẹnaan ọ́phagharanaan ọngo ḍio phọ ạḍiphe.

³⁸Kụ ạSol ạḅeni buḍiemiom awe phọ mọ, “Itu ẹwa emitiom ọdo ịkaraph lọ oḍighi bọ rodon.

³⁹Mị aguanaan rꞌaḍien Ọmoogh-we phọ odi ghan bọ, ọpo ạngo bọ Ịzirel ọkpar opu phọ, mọ oye phọ ọpo ạpioman bọ kokiigh ni, ghạlamo iḍighi ni ọony phọ ạmi Jọnatan.” Kụ oye ịyaar ọ́ḅem.

⁴⁰Kụ ạSol ạḅeni bịdi mọ, “Oomo phọ anyina, ịmeera ẹpe, ạJonatan rꞌạmi kọmeera ẹphen.” Kụ bịdi ọphagharanaan mọ, “Ḍighi ịlo nạ agbiighi mọ ẹnighe.”

⁴¹Kụ ạSol apuru Ọmoogh-we Ẹnaan phọ Ịzirel mọ, “Ọmoogh-we, eeghia kụ iḍighi kụ nạ ịmi ụ́phagharanaan bọ rodon phọ? Ụphagharanaan ịmi esi asighiigh iigbia phọ. Eḍighi ịyaar dị ọpioman phọ odi esi ạJonatan mụghumo ạmi pọ eḍeenaan sịphe ẹlhel aTumin phọ; kụ ọlo eḍighi ịyaar dị ọpioman phọ odi esi awe phọ ạna Ịzirel, pọ eḍeenaan sịphe aTumim mọ.”

⁴²Kụ ạSol ạḅem mọ, “Pogh ạḅem sịphe ạJonatan rꞌạmi.” Kụ ẹlhel phọ esiph Jọnatan.

⁴³Kụ ạSol apuru Jọnatan mọ, “Nạ uḍighi ika?” Kụ ạJonatan ạphagharanaan nyọdi mọ, “Mị ụsighe oreeny phọ ọphon mị ạpham bọ kụ atiom ọony ẹnum ẹnuum aḍiowo kụ ạlaay. Kụ mị odi ni sịen. Mị aakolobian ni omugh.”

⁴⁴ẠSol ạḅeni nyọdi mọ, “Ẹnaan ịgur ịmi eghiigh eḍighi ịyaar dị nyịna úkiigh!”

⁴⁵Kụ ọlo awe phọ ọḅeni Sọl mọ, “Yira kokiigh Jọnatan ọphon aḍighi bọ ịyaar dị Ịzirel ọmoogh ọkpar opu phọ ḍụghum? Eeye. Yoor oguanaan rꞌỌmoogh-we phọ ọpo odi ghan bọ kꞌagee-pọ mọ rꞌaḍiniin ạḍilaal ẹmhu ọdi kẹ́ḍua. Ịphen ọdi aḍighi bọ rodon phọ ẹḍua esi ọloghonaan ạḍighaagh phọ Ẹnaan.” Ịduon phọ kụ ịdi awe phọ ọphel bọ Jọnatan esi aḍuugh.

⁴⁶Ịphen phọ reten, kụ ạSol ạwile ophorogh awe aFilistia phọ, kụ bịdi oḅula ogheel ẹpe eelhe phọ ạbidi.

⁴⁷Mem mọ ạSol maḍighi bọ ọdaam Ịzirel ọdi eenan ni rꞌoomo ẹpomoghian phọ ọdi tọrotoro ekpisi: awe ạMoab rꞌAmon, rꞌIdom, ạbudaam mọ aZoba rꞌawe aFilistia phọ. Tọrobo ẹgham lọ ọdi ạghi, ọdi ạmoogh ghan ni ọkpar opu.

⁴⁸Ọdi ee ni ịlo arephelegbe, kụ ạkpar apu ghạlamo rꞌawe phọ Ạmalek. Ọdi ạphel li weye phọ Ịzirel esi ạtorotoro ẹgham lọ awe ozuom bịdi.

⁴⁹Ạnmuny phọ ạSol uḍighi Jọnatan, Isvi rꞌaMalkisua. Ọkpanyan phọ ọdi ughol mọ ạMerab, kụ esoony phọ ughol mọ aMikal.

⁵⁰Ạnir phọ ọdi ughol mọ Ahinoam ọnyani Ahimaaz; oḍiemiom awe ẹgham mọ ọdi ughol mọ Ạbner ọony umor ọde ọdi dị oghol mọ ạNer.

⁵¹Ọde phọ ạSol Kis rꞌọde phọ Ạbner Nẹr, uḍighi nmụny oye dị oghol mọ Ạbiel.

⁵²Oomo aghuḍum mọ ạSol, ọdi eenom ghan weye aFilistia phọ igbogh ạraagham. Kụ iḍighi kụ tọrotoro amem lọ ọdi ạmiin oye lọ ạmoogh ịikpo mꞌoye lọ rákiil ghan eepuph, ọdi ạsighe ghan ni oye phọ ọpo ạloghom ẹpe awe ẹgham mọ ọdi.