Read abua 1 Sạmuel 18 Bible Online

1 Sạmuel 18 - abua bible

1 Sạmuel 18

¹ẠSol rꞌaDevid ọmadan ọghaaph phọ ạbidi, kụ ọony ạSol dị oghol mọ ạJonatan ạsighe Devid rịghiri kụ ạphomoghian nyọdi ịdipho ạphomoghian bọ loor phọ ọdi.

²ẠSol aseere Devid sịphe kꞌọdi emiigh ḍio phọ ạḍiphe phọ bịn ómeera mun mọ ọdi agheel ẹpe kꞌọde phọ ọdi.

³Kụ ạJonatan aghunyan oḍigh ạrighiri kꞌagee-pọ, loor eboom ẹphomoghian phọ ọdi ạmoogh bọ esi aDevid.

⁴Kụ ạJonatan ạkporonaan ạsuoma ạnmuny ạbudaam mọ ọdi ạngo Devid. Ọdi ạngoom kẹn ni ịinya ẹgham mọ ọdi, elhool rꞌạkumugh rꞌokuughaam mọ ọdi.

⁵Kụ aDevid aḍighi ghan ni ạkuami tọrotoro adom lọ ạSol arom nyọdi kụ iḍighi kụ ạSol ạsighe nyọdi aḍighi oniin oḍiemiom awe ẹgham mọ ọdi. Ịphen phọ ịḅeeraan ni bụeri phọ ạbuo ịtooghi phọ rꞌoomo awe phọ.

⁶Mem mọ aDevid aghiigh bọ Gọlayat kụ ratigheel bọ, kụ ịdipho awe ẹgham mọ rotigheleghu bọ, ạnmariir oomo ạramha phọ Ịzirel umiteghu ni ọghi ọteeny Sọl ọdaam mọ. Bịdi ụmoor ghan sụor iboh kụ ọgher ghan kụ otiom ghan rạkama.

⁷Sịphe phọ rọsar bọ igiri phọ, ạnmariir phọ ụmoor ghan mọ, “ẠSol mạze ni sịmuunir, kụ ọlo aDevid ạze sịmuunir ạsimuunir.”

⁸Ịphen phọ ikia ni Sọl iboom, kụ ephin ologhi ọdi agey; kụ ọdi ạḅem mọ, “Bịdi rọsaram ghan mọ aDevid ạze sịmuunir ạsimuunir, kụ ẹlo ạmina oniin ọonir bịn. Ịyaar dị ketum sịphe bịdi kọsighe nyọdi oḍighi ọdaam eelhe.”

⁹Kụ emiigh ḍio phọ ạḍiphe phọ, ạSol aphoghom ghan Devid ẹkaraph ekpeḍien.

¹⁰Ḍio dị etum sịphe bịn ọkaraph uwaloor kꞌẸnaan asiph Sọl. Kụ ạSol amiigh ọlooghi ghan oyeela sịphe otu phọ ọdi ịdipho uw-ẹlaal. ADevid rati ghan ni ọne phọ ịdipho ọdi ati ghan bọ ḍio etum ḍio phọ, kụ ạSol ạpham ọsoph.

¹¹Kụ ạSol ạatughian sịphe ologhi phọ ọdi kụ ạḅem mọ, “Mị katoph ni nyọdi ọsoph phọ ọphon ạḅaraghiom iikpe phọ.” Kụ ọdi aroph ọsoph phọ Devid ịyal amem, kụ ọlo aDevid akem ghan ni aḅiriman ịyal phọ amem mọ.

¹²ẠSol aghiilaan ghan ni Devid, loor esi dị Ọmoogh-we phọ mạwile nyọdi ạki odianaan rꞌaDevid.

¹³Kụ ạSol ạḅem mọ ọdi ạḍua sịphe ologhi otu phọ, kụ ạsighe nyọdi aḍighi oḍiemiom oniin ọonir awe ẹgham ọdi,

¹⁴kụ oomo ịlo ọdi aḍighi, ịnighe ghan ni loor esi dị Ọmoogh-we phọ ạrol li rꞌọdi.

¹⁵ẠSol ạmiin ni ọghi aghisigh phọ aDevid, bịn kụ ẹkuami ghụn eḍigh eegu esi ọdi.

¹⁶Kụ ọlo tọrotoro oye sịphe Ịzirel rꞌaJuda ạphomoghian ni Devid, loor esi dị ọdi aḍighi ni ogeny oḍiemiom.

¹⁷Kụ ạSol ạḅeni Devid mọ, “Pọrono ọkpanyan phọ ạmi ạMerab. Mị kạngo ni nyịna ọnyani phọ ọphon aḍighi ạnir ạna eḍighi ịyaar dị nạ ạrol ukumu ịmi, kụ nạ kabe ghan ni rạagham Ọmoogh-we phọ dị nạ kạ́loghom eepuph.” (ẠSol ạatughian ghan mọ kẹḍua sịen kụ ạbuo aFilistia phọ okiigh Devid, bịn ọdi kụ kạ́karaghi akiigh mọony phọ.)

¹⁸Kụ aDevid ạphagharanaan mọ, “Mịna eeghia ọdo oye kụ ọto kꞌayoor eeghia ọdo awe dị mịna kaḍighi ọyogo ọdaam mọ?”

¹⁹Kụ ọlo mem dị ẹteeny bọ ọsighe ạMerab ọngo aDevid, ụḅile ghụn bịn ọsighe ọnyani phọ ọngo oye ọlo aMehola dị oghol mọ Ạdriel.

²⁰Kụ ọlo ọnon ọnyani ạSol dị oghol mọ aMikal ạphomoghian ni Devid, kụ mem dị ạSol ạnaghan bọ, ịḅeeraan ni nyọdi.

²¹Kụ ọdi agbiighi sịphe ologhi phọ ọdi mọ, “Mị kạsighe ni Mikal ạngo Devid. Mị kạsighe ọnyani phọ kụ ạkpamiom ḍiphil dị ạbuo aFilistia phọ kọdaph kụ okiigh nyọdi.” Kụ iḍighi kụ ạSol ạḅeni kẹn Devid mọ, “Nyịidipho nạ kaḍighi ọya-ọgo ạmi.”

²²ẠSol ạto ạngo bụo ịtooghi phọ ọdi mọ ọmagh Devid ọgbal kụ ọḅeni mọ, “Ọdaam eelhe phọ ạmoogh ni ọḅaal ologhi esi ạna kụ oomo ạbuo ịtooghi phọ ọdi ọphomoghian ni nyịna. Phọn kụ ogey amem dị ẹkpe dị nạ kapin ọnyani phọ ọdi.”

²³Kụ bịdi ọghaaph ịphen phọ ọḅeni Devid. Kụ aDevid ạḅeni bịdi mọ, “Eḍighi ni eboom eghuan oḍighi ọyogo ọdaam mọ kụ eghuan phọ epel uwekulom dị aghom ịduon ạmi.”

²⁴Kụ ạbuo ịtooghi phọ ọghaaph ọḅeni ọdaam mọ ịphen aDevid ạghaaph bọ.

²⁵Kụ ạSol ạto ạngo bịdi mọ ọḅeni Devid mọ, “Oomo ịdi ọdaam mọ rạwa mọ sịghe aphinom ọnyani phọ eḍighi oniin okuron ạruudu awe aFilistia lọ momugh, esi oḅulemian ịpe ạbumulogh-ḍien phọ ọdi moḍighi ghan bọ.” (Ịphen phọ kụ ịdi ạSol agbiighi oḍighi pịdi awe aFilistia phọ okiigh Devid.)

²⁶Ạbuo ịtooghi phọ ạSol ọghaaph ọḅeni Devid ịphen ạSol ạghaaph bọ, kụ ịḅaal li ologhi aDevid ọotughian mọ ọno kaḍighi ọyogo ọdaam mọ. Tụtu rẹteeny bọ ḍio ọghi kꞌạrogo phọ,

²⁷aDevid rꞌawe phọ ọdi ọghi ọze ịyal okuron awe aFilistia. Kụ ọdi ạsighiogh ruudu awe phọ ạsighe ạghiom ọdaam mọ kụ ạrol sịphe agbi oniin atum oniin aḍeenaan ọdaam mọ pịdi ọdi aḍighi ọyogo ọdaam mọ. Kụ iḍighi kụ ạSol ạngo bọ Mikal ọnyani phọ ọdi mọ aDevid aphin.

²⁸ẠSol ạkaraghi ni ạmiin mọ Ọmoogh-we phọ odi ni rꞌaDevid, ḅịle kẹn mọ aMikal ọnyani phọ ọno ạpomoghian ni nyọdi.

²⁹Ịphen phọ ịḅile bịn ẹbughe ruugu esi ạSol kụ ọdi ạlogh ḍien Devid oomo asuḍughul-otu aghuḍum mọ ọdi.

³⁰Awe aFilistia phọ uru ghan ni ẹgham, kụ tọrobo amem lọ aDevid ạghi ẹgham mọ, ọdi ạmoogh ghan ni ọkpar opu dị apel bụeri phọ ạbuo ịtooghi phọ ạSol. Loor ịduon phọ aḍien aDevid iileghaan ni iboom.