Read abua 1 Sạmuel 19 Bible Online

1 Sạmuel 19 - abua bible

1 Sạmuel 19

¹ẠSol ạḅeni Jọnatan ọony phọ ọdi rꞌạbuo ịtooghi phọ ọdi mọ ọno rạwa ghan reten oghiigh Devid. Kụ ạri ạJonatan ọ́miin Devid eḍien ólhe.

²Kụ ọdi ạḅeni Jọnatan mọ, “ẠSol, ọde phọ ạmi, rạwa ghan reten oghiigh ạna. Mạar agona loor ạna ḍịroor iḍueneen. Kịa esi lọ ẹnighe ạaghian.

³Mị kạki ạmeera atuman ọde phọ ạmi ẹpe ozo phọ nạ ạaghian bọ, kụ mị ạkaaph ịlo ạna ạḅeni nyọdi. Tọrotoro ịlo mị ạwaaghi ạmiin, mị kaḍighi ni ịdi nạ kalegheri.”

⁴Kụ ạJonatan aaseeny ghan aDevid risigh ạSol mọ, “Oye phọ, káḍighi ịkaraph Devid otelhedom mọ ạna. Ọdi nyịna kőḍighi ghan ịkaraph; kpạripe ghụn, tọrotoro ịyaar lọ ọdi aḍighi rẹngo ghan nyịna ogbogh ọloghonaan ạḍighaagh.

⁵Ọdi ọ́lhogh ạaku ghuḍum ọdi mem mọ ọdi aghiigh bọ Gọlayat, kụ Ọmoogh-we phọ ạngo ni Ịzirel ogbogh ọkpar opu. Mem dị nạ ạmiin bọ, ologhi ạna ạḅaal li. Eeghe kụ iḍighi bọ nyịidipho kụ nạ rạwa bọ oḍighi ịkaraph oye dị ịyaar ụ́piom, nạ rạwa ni bịn oghiigh aDevid?”

⁶Ịphen ạJonatan ạghaaph bọ itir ri Sọl kụ ọdi aghol ḍien Ọmoogh-we phọ kụ aghunya mọ ọno kákiigh Devid.

⁷Kụ ạJonatan ạmagh Devid kụ ạḅeni nyọdi oomo phọ ịphen phọ. Kụ ọdi ạsighe Devid ạghiomonaan Sọl kụ aDevid akumu ọdaam mọ ịdipho ọdi aḍighi ghan bọ.

⁸Ẹgham ịḅile ni emite igbo ạbidi rꞌawe aFilistia phọ. ADevid ạghi azuom bịdi ạkpar apu tụtu bịdi osumughu.

⁹Eniin aḍio ọkaraph uwaloor kꞌỌmoogh-we phọ ạsiiny Sọl. Ọdi ạrol ude sịphe otu phọ ọdi, ạpham ọsoph, kụ aDevid ạrol li sịphe phọ ati ghan ọne phọ ọdi.

¹⁰ẠSol ạghi ni ogim aDevid ọkpaariom iikpe phọ kụ aDevid akem aḅiriman kụ ọsoph phọ agim iikpe phọ bịn; kụ aDevid aghiil asuma.

¹¹Ḍughul aḍio phọ ạḍiphe phọ ạSol arom buniin awe mọ okori ghan otu phọ aDevid ogon oghiigh nyọdi ọḅaal ạḍiroor ạḍieri phọ aḍio phọ. AMikal ạnir phọ aDevid ạphur ri nyọdi rụru mọ, “Eḍighi ịyaar dị nạ úsuma ḍughul phọ arodon, koghiigh ni nyịna kụ egbi ọḅaal ạḍiroor.”

¹²Kụ aMikal aḅughe nyọdi eghuugh-ookuugh kụ amitiom kụ ạkpaaghi asoore, kụ ọdi aghiil asuma.

¹³Pọ kụ esi dị aMikal ạsighe ẹkaaneen eru ạbidi ạmuneen sịphe ẹmina phọ, kụ ạsighe ịyaar dị oḅetenom ẹmhu olhoom suphuugh ịga aḅetenom ẹmhu phọ, kụ ạsighe ukpe ạmaar azu.

¹⁴Mem dị awe phọ ạSol oru bọ osi ọsighe aDevid, aMikal ạḅeni bịdi mọ oye phọ ómoon.

¹⁵Kụ ạSol aḅulemi bịdi mọ ọghi ọkar ọmiin. Kụ ọdi ạto ạḅeni bịdi mọ, “Ipoophe nyọdi sịphe ẹmina phọ, ẹsighe eru. Mị kakiigh nyọdi.”

¹⁶Bịdi oḍigh ologhi otu phọ kụ ọmiin ẹkaaneen ẹmugh phọ sịphe ẹmina phọ rꞌoḅetenom ẹmhu phọ olhoom bọ suphuugh ọga phọ ẹpe ẹmhu phọ.

¹⁷Kụ ạSol apuru Mikal mọ, “Eeghe kụ iḍighi kụ nạ uukeleghi bọ ịmi ịduon phọ kụ nạ maḍighi ịdi ẹpomoghian phọ ạmi masuma.” Kụ ọnyani phọ ạphagharanaan mọ, “Ọdi ạḅem mọ ọno kughiigh ni ịmi eḍighi ịyaar dị mị ụ́loghonaan nyọdi ḍịghaagh ọdi asuma.”

¹⁸ADevid asuma kụ ạghi ạteeny Sạmuel ẹpe Rama, kụ ạghaaph ạḅeni nyọdi oomo phọ ịpe ạSol maḍighi bọ nyọdi; kụ ọdi rꞌạSamuel oten ọghi ẹpe Nayot kụ ọrol ghan.

¹⁹Ụghaaph ni ọḅeni Sọl mọ aDevid odi Nayot ẹpe Rama.

²⁰Kụ ọdi arom buniin awe mọ ọghi osiph ẠJonatan. Bịdi ọghi osi kụ ọmiin ḍita ariil Ẹnaan phọ dị rọker ghan ịḅa kọlooghi, kụ ạSamuel aḍiemiom bịdi. Kụ Uwaloor phọ Ẹnaan ạsiiny weye phọ ạSol; kụ bịdi phọ kẹn omiigh ọgher rꞌọlooghi aani.

²¹Mem dị ạSol ạnaghan bọ ịphen phọ, ọdi arom ni bụnon abutelhedom; kụ bịdi phọ omiigh aani ọgher rꞌọlooghi. Kụ ọdi arom butelhedom mọ omuneniom ịraar amem, kụ iniin phọ kẹn kụ imitenaan bịdi.

²²Kụ ọdi rꞌaloor aḅetenu ọghi aRama phọ. Mem dị ọdi ạghi bọ asi sịphe ogbogh aghuḍia phọ ẹpe Seku, ọdi apuru ni olegheri ekpisi phọ ạSamuel rꞌaDevid odi bọ kụ ọḅeni nyọdi mọ bịdi odi ẹpe Nayot.

²³Ịdipho ọdi aten bọ rạki, bịn uwaloor phọ Ẹnaan ạsiiny aani nyọdi, bịn ọdi ạgher ạḅile ạlooghi ghan tụtu ạghi asi Nayot.

²⁴Ọdi ạkporonaan iinmenan ọdi, kụ ạgher ạḅile ạlooghi sịphe risigh ạSamuel; kụ ọdi ạrol ẹdaḅa oomo aḍio phọ ạḍiphe tụtu ẹḅile ẹḅaal. (Ịphen kụ ịdi ọḅem mọ ạtu bọ amite mọ, “ẠSol phọ kẹn maḍighi aani oyil Ẹnaan?”)