Read abua 1 Sạmuel 20 Bible Online

1 Sạmuel 20 - abua bible

1 Sạmuel 20

¹Kụ aDevid ạḍua Nayot ẹpe Rama kụ asuma ạghi ạteeny Jọnatan, kụ apuru mọ, “Mịna ụpiom eeghia? Mị useere eeghe aḍighiton? Eeghia ọdo ịkaraph kụ ẹdi mị aḍighi bọ ọde phọ ạna kụ ọdi rạwa bọ oghiigh ạmi?”

²Kụ ạJonatan ạphagharanaan nyọdi mọ, “Ẹnaan kímeera mọ nạ amugh. Ọde phọ ạmi rụḅeni ghan ni ịmi tọrotoro ịyaar lọ ọdi raḍighi ghạlamo ịbugh ni mꞌighom ni kụ ọdi ịphen phọ ịmi kạ́aghinaan. Kị́duon.”

³Kụ aDevid ạphagharanaan mọ, “Ọde phọ ạna alegheri ni mọ nạ ụphomoghian ni ịmi iboom kụ ọdi magbiighi mọ ọdi káḍighi ịlo nạ kalegheri ịpe ọdi rạwa bọ oḍighi phọ, loor esi dị kepin ni esi ạna iboom. Ageny ni, mị ọkpe rạ́gba ghan. Mị akunya ni rạḅeni nyịna rꞌaḍien Ọmoogh-we phọ ọpo odi ghan bọ mọ ọku dị odi ogbo ạmi rꞌaḍuugh ọ́bugh.”

⁴Kụ ạJonatan ạḅeni Devid mọ, “Mị kaḍighi ni tọrotoro ịlo nạ ạḅem.”

⁵Kụ aDevid ạḅeni Jọnatan mọ, “Iḍueneen Ẹyaal Omoom Ụnwanyu phọ, kụ mị ạkpe ni olhian eḍien ẹyaal phọ rꞌọdaam mọ. Kụ eḍighi ịyaar dị ẹḅeeraan ni nyịna, pọ mị kạki ạbooghian ẹpe iizo phọ, tụtu kꞌadulhe ọman iḍue.

⁶Eḍighi ịyaar dị ọde phọ ạna aphogh kụ ịmi ụ́miin sịphe role bọ eḍien phọ, pọ ḅẹni nyọdi mọ mị ạboor ịikpo akiil rạki ologhi otu ẹpe Bẹtilihem loor esi dị mẹteeny dị ọto kꞌayoor kọpighiron ẹkia ẹlo ạlha phọ.

⁷Eḍighi ịyaar dị ọdi ạḅem mọ ẹnighe ni, pọ mị kạ́moogh ịiḅaghami. Kụ ọlo eḍighi ịyaar dị ọdi ạghagh ologhi, pọ nạ kalegheri ni mọ ọdi ạnya ni oḍighi ạmi ịkaraph.

⁸Kụ uḍighi ịmi iiḅi phọ ịphen, ạmaar ạpham oguan iigbia phọ nạ uguanaan bọ ịmi. Kụ ọlo eḍighi ịyaar dị mị mạpiom ni, pọ nạ rꞌaloor ughiigh ịmi. Esi ika kụ ẹdi nạ kụsighe bọ ịmi ạkiom ọde phọ ạna mọ aghiigh?”

⁹Kụ ạJonatan ạphagharanaan mọ, “Ịlo ạna ríḍigh. Eḍighi ịyaar dị mị alegheri mọ ọde phọ ạmi ạnya ni oḍighi ạna ịkaraph, mịna nyịna mụ́ḅeni ḍụghum?”

¹⁰Kụ aDevid apuru mọ, “Ạnhian kụ kụḅeni bọ ịmi eru mạar dị ọde phọ ạna ạsighe ọghagh ologhi kụ ạphagharanaan nyịna?”

¹¹Kụ ạJonatan ạphagharanaan mọ, “Ọghi ẹpe iizo phọ.” Kụ bịdi oten ọghi.

¹²Kụ ạJonatan ạḅeni Devid mọ, “Ọmoogh-we Ẹnaan phọ Ịzirel ạmeera enye ayira! Ọdo phọ amem mọ ạmuen iḍueneen mꞌọman-iḍue, mị kapuru ni ọde phọ ạmi. Eḍighi ịyaar dị ọdi adughe ni ọnhu esi ọghaaph phọ ạna, pọ mị katom ni ọḅeni nyịna.

¹³Eḍighi ịyaar dị ọde phọ ạmi agbiighi oḍighi ạna ịkaraph, pọ Ọmoogh-we phọ ụgur ịmi aghiigh eḍighi ịyaar dị mị úḍighi ịdi nạ kalegheri, ụ́ḅile uḍighi ịdi nạ kasuma. Ọmoogh-we phọ ạrolan rꞌạna ịdipho ọdi ạrolan bọ rꞌọde phọ ạmi!

¹⁴Kụ eḍighi ịyaar lọ mị úmugh, pọ mạar ạpham oguan iigbia phọ nạ uguan bọ ịmi, ạḅile ụnaghanan ịmi. Kụ ọlo eḍighi ịyaar lọ mị amugh,

¹⁵pọ ḍeenaan ni ẹphomoghian phọ ẹphen phọ eghunotu phọ ạmi kꞌagee-pọ. Kụ mem dị Ọmoogh-we phọ maphiemi oomo ạbumulogh-ḍien phọ ạna ạmadan,

¹⁶ịphen nạ rꞌạmi moguan bọ ẹmeera ni. Eḍighi ịyaar dị onme, Ọmoogh-we phọ ạliom ni nyịna.”

¹⁷ẠJonatan ạḅile aḍighi ịdi aDevid aghunya oḍigh ạrighiri kꞌagee-pọ phọ, ịdi eḍighi bọ ạJonatan ạphomoghian ni Devid ịdipho ọdi ạphomoghian bọ loor phọ ọdi.

¹⁸Kụ ạJonatan ạḅeni nyọdi mọ, “Loor esi dị iḍueneen eḍighi bọ Ẹyaal Omoom Ụnwanyu phọ, kọnuun ni olegheri eḍighi ịyaar dị nạ úlho sịphe role bọ malhe phọ.

¹⁹Kụ ọman iḍue kẹkaraghi ni kụ eganana mọ nạ sịphe ólho. Kụ iḍighi kụ kịa sịphe nạ ạaghian bọ ẹpheri phọ amem mọ kụ ạaghian ọman ạrana phọ okpol bọ.

²⁰Mị kạtaph ni ịraar ịkpina atuom sịphe mụdi rọtaph ọka.

²¹Kụ mị ạḅeni otelhedom ạmi mọ ạghi ạwa ịkpina phọ. Eru mạar dị mị ạḅeni nyọdi mọ, ‘Mịin. Ịkpina phọ edi ḍịghaagh phọ ạḍien nạ ọdi bọ. Sịghiogh aru,’ pọ eḍeenaan mọ ịyaar nyịna kéḍighi pọ tue amite. Mị akunya rꞌaḍien Ọmoogh-we phọ odi ghan bọ mọ ịkaraph nyịna kẹ́teeny.

²²Kụ ọlo eru mạar dị mị ạḅeni nyọdi mọ, ‘Mịin, ịkpina phọ edi ẹpe ạḍieri phọ ạḍighaagh phọ ạna,’ pọ ḍụa ạkel, ịdi eḍighi bọ Ọmoogh-we phọ ranyu ghan nyịna kạkele.

²³Esi oguan phọ yira moguan bọ, Ọmoogh-we phọ kạmeera enye ogbo ayira kꞌagee-pọ.”

²⁴Kụ aDevid asuma ạghi ạaghian ẹpe iizo phọ. Ẹteeny bọ Ẹyaal Omoom Ụnwanyu phọ, ạSol ọdaam mọ aru ni sịphe kole bọ malhe phọ,

²⁵kụ ọdi ạrol sịphe ọdi rạtol ghan bọ katuman iikpe phọ, Ạbner ạrol atuman nyọdi, kụ ạJonatan ạrol risigh ọdi. Ạgada phọ aDevid oye ọ́rol.

²⁶Kụ ọlo ạSol ịyaar ọ́ḅem ḍio phọ ạḍiphe phọ loor esi dị ọdi ạatughian ghan mọ, “Iini sịen ịyaar memitenaan nyọdi, kụ ọdi ọ́ḅaal.”

²⁷Rẹḅile rẹḅaal, ḍio phọ ạḍiphe etum bọ Ẹyaal Omoom Ụnwanyu phọ, ạgada phọ aDevid aphoghogho kẹn ni; kụ ạSol apuru Jọnatan mọ, “Eeghe kụ iḍighi kụ aDevid óru bọ olhe amalhe phọ iḍueneen phọ rꞌarodon?”

²⁸Kụ ạJonatan ạphagharanaan mọ, “Ọdi ụlhom ịmi mọ ọno akiil rạki Bẹtilihem.

²⁹Ọdi ạḅem mọ ‘Seseeny, meera mị ụki loor esi dị ọto kꞌayoor role ẹyaal ạrikia ẹpe ẹmha phọ kụ umor ạmi arom mọ mị ụki. Kụ iḍighi kụ eḍighi ịyaar dị nạ aḍighi ni ọyaghiri ạmi, pọ meera mị ụki ụmiin bumor phọ ạmi. Ẹpe kụ ịyaar phọ ọdi úlho bọ sịen role bọ malhe phọ.’”

³⁰Kụ ạSol ạmoogh ọghagh ologhi esi ạJonatan kụ ạḅem mọ, “Nạ ọony oopheeny ạnir. Nyịidipho mị alegheri ni mọ nạ maḍighan mọony phọ ạJesi ramutonaan eephoogh loor phọ ạna rꞌonhiin phọ ạna ọpo phọ.

³¹Nạ ólhegheri mọ eḍighi ịyaar lọ aDevid umugh, nạ kátue ni bịn aḍighi ọdaam eelhe phọ ẹphen? Nyịidipho nụun ạghi ạsighe nyọdi aru sịen ọdi ạmoogh ni omugh!”

³²Kụ ạJonatan ạphagharanaan mọ, “Eeghe kụ iḍighi kụ ọdi kamugh bọ? Ọdi aḍighi eeghia?”

³³Ọdi rọḅem ịduon phọ kụ ạSol aroph Jọnatan ọsoph phọ ịlo oghiigh ọdi. Pọ kụ esi dị ạJonatan alegheri mọ ọde phọ ọno ạnya ni agey oghiigh aDevid.

³⁴Kụ ạJonatan aḅetenu rꞌọghagh ologhi ạḍua sịphe ịdaabili phọ bịn ọdi aghin eḍien oomo aḍio phọ ạḍiphe emuneniom bọ ịyal phọ omiigh bọ olhe Ẹyaal Omoom Ụnwanyu phọ. Ọghaaph phọ aDevid ạkaraghi ni ạaḅaghami nyọdi iboom loor esi dị ạSol mamuton nyọdi eephoogh.

³⁵Rẹḅile rẹḅaal kụ ạJonatan ạghi ẹpe iizo phọ ọteeny aDevid ịdipho bịdi mọghaaph bọ. Ọdi ạphamam ni ọbam ọony,

³⁶kụ ọdi ạḅeni ọony phọ mọ, “Kiil ạghi ạwa ghan ịkpina phọ mị kạtaḅal bọ.” Kụ ọony phọ akiil rạki, kụ ạJonatan ạraph ẹkpina apeleghi nyọdi.

³⁷Mem dị ọony phọ asi bọ esi phọ ẹkpina phọ emeel bọ, ạJonatan ạlho ạḅeni mọ, “Ẹkpina phọ edi ni kꞌẹpe.

³⁸Kạ́meera sịphe. Nụun aagborion uruom ịmi.” Kụ ọony phọ ạsighe ẹkpina phọ, kụ aḅula ạteeny ọde-otu phọ ọdi.

³⁹Ọdi ólhegheri aani ịpe rẹki bọ; ạJonatan rꞌaDevid bịn kụ ulegheri.

⁴⁰ẠJonatan ạsighe reenema ẹgham mọ ọdi ạngo ọony phọ, kụ ạḅeni mọ ọdi ạsighe ạpham agheelom ẹpe ẹmha phọ.

⁴¹Ọony phọ roten rakeel, kụ aDevid aḅetenu sịphe ọman egu ạrana phọ ọdi ạaghian bọ akpuḍian kụ ạsighe ghisigh ọdi akaragham ude ịraar amem. Ọdi rꞌạJonatan umoghi ni iboom mem dị oniin ạkpun bọ nyoniin. Ịkaraghi ni ẹeḅaghami ologhi aDevid epu Jọnatan.

⁴²Kụ ạJonatan ạḅeni Devid mọ, “Ẹnaan ẹrolan rꞌạna. Ọmoogh-we phọ kaḍighi ni ịdi nạ rꞌạmi, rꞌạnmuny ạna rꞌạnmuny ạmi kọpam ni kꞌagee-pọ oguan iigbia phọ yira moguan bọ.” Kụ aDevid anyeene ọḍua, kụ ạJonatan agheel ẹpe ẹmha phọ.