Read abua 1 Sạmuel 21 Bible Online

1 Sạmuel 21 - abua bible

1 Sạmuel 21

¹ADevid ạghi ẹpe ẹmha ạNob ọmiin oyil ạrikia dị oghol mọ Ạhimelek. Ạhimelek aru amite rapiigha kụ apuru mọ, “Eeghia kụ ogina ạna asi ẹphen ịduon?”

²Kụ aDevid ạphagharanaan mọ, “Mị atu dom ọdaam mọ. Ọdi ụḅeni ịmi mọ mị kúmeera oye alegheri ịpe ọno urom bọ ịmi oḍighi phọ. Kụ ọlo awe phọ ạmi, mị mạḅeni ni bịdi esi dị bịdi kụteeny ịmi.

³Kụ nyịidipho phọ nạ ạmoogh eeghia ịyaar ole? Ụngo ịmi oogh iiḅoghoḍi ạbred, mụghumo tọrotoro ẹnon ịyaar lọ nạ ạmoogh.”

⁴Kụ oyil ạrikia phọ ạḅem mọ, “Mị ụ́moogh ọnon oopho ạbred emuton ạbred iigbia phọ. Nạ katue ni ạsighe eḍighi ịraar lọ ugheel ạnmuny phọ ạna ụ́tolan esi rꞌạnmariir ruma phọ ọphon.”

⁵Kụ aDevid ạphagharanaan mọ, “Awe phọ ạmi ụ́tolan esi rꞌạnmariir. Bịdi rooko ghan ni loor ạbidi koseere dọl iigbia mem lọ yoor rọki oopho adom; kụ ạghiom ologhi sịen yoor rọki bọ dom ọdaam mọ.”

⁶Kụ oyil ạrikia phọ ạngo Devid ạbred iigbia phọ, loor esi dị ạbred phọ ọpo ọngo bọ Ọmoogh-we phọ bịn kụ ạbred dị ọdi ạmoogh; ụsighe nyọpo ạrol bọ ẹpe ạdol iigbia phọ kụ oseere omoom.

⁷(Uw-ẹmhu abukoriom ịnam mọ ạSol, oye ọlo Idom dị oghol mọ aDoeg, amaazuan ni bịn, ạrol aani sịphe phọ ḍio phọ ạḍiphe phọ loor esi dị ọdi ạmoogh ni oḍighi aruwaloor dị ọdi ạghi oḍighi.)

⁸Kụ aDevid apuru Ạhimelek mọ, “Nạ ạmoogh ni ọsoph mꞌelhool ẹgham ọngo ạmi ḍụghum? Adom ọdaam mọ iḍighi ni ịyaar dị mị ạḍua rꞌephirighan bịn amem ị́tol ọsighe elhool ẹgham mọ ạmi mụghumo ẹnon ẹdo ẹenema.”

⁹Kụ Ạhimelek ạphagharanaan mọ, “Mị ạpam ni elhool ẹgham mọ ạGolayat ọlo aFilistia phọ ọpo nạ aghiigh bọ ẹpe oodiph phọ Ela. Edi ọman oopa phọ kụ opurughiom ukpe. Eḍighi ịyaar lọ nạ rạwa pọ sịghe ni. Ẹpe bịn kụ ẹenema dị edi sịen.” Kụ aDevid ạḅem mọ, “Sịghe ụngo ịmi, elhool ẹgham dị ẹnighe epu nyẹpe phọ ílho.”

¹⁰ADevid akiilaan Sọl rasuma, kụ ạghi ạteeny Akis ọdaam mọ ạGat.

¹¹Kụ ạbuo ịtooghi kꞌọdaam mọ opuru Akis mọ, “Ọphon káDevid ọdaam eelhe phọ ạbidi? Ọphon kụ oye phọ ạnmariir phọ ọmoorom ghan bọ, ọgher ghan bọ mọ, ‘ẠSol ạze ni sịmuunir, kụ ọlo aDevid mạze sịmuunir ạsimuunir.’”

¹²Ikpo ọnhu phọ ạbidi iroor ri Devid iboom kụ ọdi aghiilaan iboom Akis ọdaam mọ.

¹³Kụ iḍighi kụ tọrotoro amem lọ bịdi odiighi sịphe phọ, aDevid aḅo ghan ịdipho uw-ẹlaal kụ aḍighi yogh ghan ịlo aruwo ẹlaal mem lọ bịdi ọphamaghan nyọdi; ọdi ạgeeghi ghan rạraar rụnhu-aḍibuo ẹmha phọ kụ ạḅile ạgboya ịghor kụ eyula ghan esoor ẹphen ọleem mọ ọdi.

¹⁴Kụ Akis ạḅeni bụo ịtooghi phọ ọdi mọ, “Ịmiin. Oye phọ raḍigh ẹlaal. Eeghe kụ nyina ẹsighe bọ nyọdi iruom ịmi?

¹⁵Mịna kọ̋moogh rụwalaal dị mọkasian ḍụghum? Eeghe kụ nyina ẹsighe bọ ọnon etu ọoḅaghamiom ạmi ọkaraghi ịsien otu phọ ạmi?”