Read abua 1 Sạmuel 24 Bible Online

1 Sạmuel 24 - abua bible

1 Sạmuel 24

¹Mem dị ạSol eenan bọ weye ạbuo aFilistia phọ aḅula, ụḅeni ni nyọdi mọ aDevid odi ẹpe ẹdala phọ etuman bọ En Gedi.

²ẠSol ạsighe ịraar ọonir awe ẹgham dị ọkar oḍighi rephelegbe Ịzirel kụ ạghimom ọwaam aDevid rꞌawe phọ ọdi ẹpe ạga emitenom Asighiigh Ịga Eḍum mọ.

³Ọdi ạghi asi epogh aḍighiigh dị etuman riisi dị iyool-ịga rẹmina ghan ọgbal eten phọ kụ aḍigh ọni ạriir. Ịghi bịn eezuanaan dị epogh phọ ẹphen phọ kụ ẹkaraghi ẹpe aDevid rꞌawe phọ ọdi oḍiku bọ kụ ọghi ẹpe eekuna phọ ọrol.

⁴Kụ bịdi ọḅeni nyọdi mọ, “Ọphon kụ ọgel dị nạ ạmoogh. Ọmoogh-we phọ mạḅeni ni nyịna mọ ọdi kạḅogh ni mụlogh-ḍien phọ ạna ạlogh ḍịghaagh ạna kụ nạ aḍighi nyọdi ịlo ẹḅeeraan nyịna.” Kụ aDevid ạsophoghu ạghi kụ asoph ọpherepe ạsuoma phọ ạSol ạsighe kụ ạSol ólhegheri.

⁵Kụ emiigh ọoḅaghami ologhi aDevid.

⁶Kụ ọdi ạḅeni we phọ ọdi mọ, “Ọmoogh-we phọ kúmeera dị mị kaḍighi ịkaraph ọde-otu phọ ạmi, ọpo ọdi mạsaḅar bọ mọ aḍighi ọdaam mọ. Mị nyọdi ịkaraph káḍighi, loor esi dị ọdi kụ ọdaam mọ Ọmoogh-we phọ ạsaḅar bọ.”

⁷Kụ aDevid ạghaaph aḅonyon iloghi awe phọ ọdi kụ omeeraam mọ oye kúḍighi ịyaar Sọl. ẠSol aḅetenu ni amite sịphe epogh phọ kụ anyeene ọḍua.

⁸Kụ aDevid amite ạdaph nyọdi, kụ ạlho ạmagh nyọdi mọ, “Nạ ogbogh ọdaam mọ.” Kụ ạSol akiton aphogh, kụ aDevid azuman asi ude ọngo ọdi rughuenian,

⁹kụ ạḅem mọ, “Eeghe kụ iḍighi kụ nạ raler ghan bọ rụru kạngo weye dị rọkaaph ghan mọ mịna rạwa ghan reten oḍighi ạna ịkaraph?

¹⁰Nạ katue ni ạmiin rꞌaloor ạna mọ nyịidipho phọ sịen ologhi epogh aḍighiigh mọ Ọmoogh-we phọ ạḅogh ni nyịna ạlogh ḍịghaagh ạmi. Buniin awe phọ ạmi ụḅem ni mọ mị aghiigh nyịna, kụ mị ụnma ni nyịna ighirigiir kụ ạḅem mọ mị nyịna ịkaraph káḍighi rꞌamem, loor esi dị nạ kụ oye phọ Ọmoogh-we phọ ạsaḅar bọ mọ aḍighi ọdaam mọ.

¹¹Mịin, ọde ạmi, pọrono ọpherepe ạsuoma phọ ạna mị ạpham bọ. Mị mutue ni aghiigh nyịna kụ ọlo kpạripe ghụn mị usoph ọpherepe phọ ọphon bịn ạsighe. Ịphen phọ ẹḅeni nyịna mọ mị ụ́moogh ịitughian oruphiom ạna ẹgham mụghumo oḍighi ạna ịkaraph. Nạ rụwa ghan ịmi oghiigh, ghạlamo ịduon mị nyịna ụ́pioman bọ ni.

¹²Ọmoogh-we phọ kụ asoph ọoruen ạngo ọnyo ayira lọ ạpiom! Ọdi ạliom ni nyịna esi ịphen nạ ruḍighi bọ ịmi, loor esi dị mị ịkaraph nyịna káḍighi rꞌamem rꞌamem!

¹³Nạ alegheri ni ịpe ageedi phọ ọḅem bọ mọ, ‘Ịkaraph, ọkaraph oye kụ raḍighi ghan.’ Kụ iḍighi kụ mị ịkaraph nyịna káḍighi.

¹⁴Mịin ịyaar dị ọdaam mọ Ịzirel kụ rạwa ghan oghiigh! Mịin ịyaar dị ọdi phọ kụ raporogh ghan! Oomugha aghoogh ḍụghum? Eghuugh aghoogh ḍụghum?

¹⁵Ọmoogh-we phọ kụ kasoph ọoruen phọ, kụ ọdi kụ kạḅem nyọpo ạpioman bọ sịen ịyal phọ ayira. Ọdi aphogh ni ọghaaph phọ, eenaan ịmi, ạḅile ụphel ịmi ạsighe ḍịghaagh ạna!”

¹⁶Mem dị aDevid mạghaaph bọ ạmadan, kụ ạSol ạḅem mọ, “Ọpo phọ ọkaraghi ạna phọ ni Devid ọony ạmi?” Kụ ọdi amiigh emoghi.

¹⁷Kụ ọdi ạḅeni Devid mọ, “Nạ kụ odi elhiom, mị kụ mạpioman. Nạ muḍighi ni ịmi iiḅi iboom kụ mị phọ raḍighi ghan nyịna ịkaraph!

¹⁸Rodon phọ nạ mạkar aḍeenaan iiḅi phọ nạ ruḍighi ghan bọ ịmi; loor esi dị nạ ịmi úghiigh ghạlamo ịduon Ọmoogh-we phọ ụḅogh bọ ni ịmi ạlogh ḍịghaagh ạna.

¹⁹Ịphen phọ imite ghan ẹghen, dị oye kasiph mụlogh-ḍien ọdi, bịn kụ ạbile mọ agheel oopho? Ọmoogh-we phọ ạseph ni nyịna esi ịphen nạ uḍighi bọ ịmi rodon phọ.

²⁰Nyịidipho phọ mị mạkaraghi alegheri mọ nạ kụ kaḍighi ni ọdaam mọ Ịzirel, kụ eelhe phọ kẹki ni risigh mem lọ nạ ạda.

²¹Kụ ọlo uguanaan ịmi esi aḍien Ọmoogh-we phọ mọ nạ kạbilenaan ni ẹemara ẹemara phọ ạmi, ọbo aḍien phọ ạmi rꞌaḍien eghun phọ ạmi kepe ghan bọ emuneen.”

²²Kụ aDevid aguanaan mọ ọno kạbilenaan ni. Kụ ạSol aten agheel kꞌọdi, kụ aDevid rꞌawe phọ ọdi oḅula dọl ịbooghian phọ ạbidi.