Read abua 1 Sạmuel 25 Bible Online

1 Sạmuel 25 - abua bible

1 Sạmuel 25

¹ẠSamuel amugh kụ oomo awe phọ Ịzirel ookpomoghan omoghi nyọdi. Kụ bịdi oḍi nyọdi ẹpe ẹmha phọ ọdi ẹpe Rama. Ịphen phọ reten, kụ aDevid aten ạghi ẹpe ẹdala phọ ạParan.

²Oniin oye ạrol li ọlo ẹkpigh ạKeleb dị oghol mọ aNebal, kụ ọdi ọlo ẹmha dị oghol mọ aMaon, kụ ọdi ạmoogh ni de dị etuman ẹmha phọ ạKarmel. Oye phọ ogbogh ọdaam, ạmoogh ịraar ọonir iyool-ịga rꞌoniin ọonir ạrutu-ịga. Ạnir phọ ọdi Abigel aḍighi ni ooḅi ạḅile ạsu ologhi, kụ ọlo olhom mọ aḍighi ni uwelologhi rꞌobeephom ịkaraph. ANebal ạrol ẹpe Kạrmel rakulogh ghan suphuugh ịga ọdi,

⁴kụ aDevid ạrol ẹpe ẹdala phọ ạnaghan.

⁵Kụ odi arom ḍioph ugheel ạnmuny mọ ọghi Kạrmel, ọwa Nebal kụ opurunaan nyọdi.

⁶Ọdi ạḅeni bịdi mọ ọḅeni Nebal mọ, “ADevid mapuru nyịna, ọyaghiri. Ạḍiseph ẹrolonaan nyịna, rꞌọto kꞌạna, rꞌoomo ạraraar phọ ạna.

⁷Ọdi ạnaghan mọ nạ rakulogh ghan suphuugh ịga phọ ạna, kụ ọdi rạwa mọ nạ alegheri mọ abukoriom ịga phọ ạna rọtol ghan rꞌayoor, kụ yoor ịkaraph úḍighi bịdi. Rꞌeniin ịyaar ạbidi ke̋phe ghan oomo ịpe bịdi ọrol bọ ẹphen Kạrmel.

⁸Puru ni bịdi, bịdi kọḅeni ni nyịna. Yoor otu oozuan ḍio ẹyaal, kụ aDevid rạlhom nyịna mọ ụsighe ni iyoor igey. Seseeny ni ụngo iyoor rꞌaDevid ọyaghiri phọ ạna tọrotoro ịyaar lọ ẹḅeeraan nyịna.”

⁹Awe phọ aDevid ụḅeni Nebal dom mọ ạḍien phọ esi aḍien phọ aDevid. Kụ bịdi ọrol okori ọphagharanaan phọ.

¹⁰Ebia ni kụ aNebal ạphagharanaan mọ, “ADevid phọ pọ ạnhian? Ọony ạJesi phọ pọ ạnhian? Mị kọ̋naghan ghan ịlo ọdi! Ạrebene dị mosumughu ḍịghaagh ạburude-otu phọ ạbidi ọbugh ni sịen ẹmha phọ nyịidipho!

¹¹Mị kạ́sighe eḍien phọ rꞌạmuum mọ ạmi, rꞌịnam mọ mị ạze bọ ọngo awe oḍighi phọ ạmi kụ ạngo weye dị ekpisi lọ ọḍua kụ oru mị úlegheri.”

¹²Kụ awe phọ aDevid oten ogheel kụ ọḅeni Devid ịpe aNebal ạghaaph bọ.

¹³Kụ aDevid ạto ạḅeni we phọ ọdi mọ, “Ịsighiogh rolhool ẹgham mọ anyina.” Kụ bịdi ọsighiogh. ADevid kẹn ạsighe elhool ẹgham mọ ọdi. Kụ ọdi rꞌawe ọdi dị rọkiom ni inya okuron awe kụ oten onyeene. Kụ ịyal okuron awe ọrol ọman ophogh ghan ạraraar phọ ạbidi.

¹⁴Oniin otelhedom aNebal ạḅeni ni Abigel ạnir phọ aNebal mọ, “Nạ mạnaghan ni ḍụghum? ADevid arom buniin abutelhedom kụ ọḍua ẹpe ẹdala phọ oru ọmagh aani ọde-otu phọ ayira, kụ ọlo ọdi aafolomi ni bịdi.

¹⁵Kụ ạri bịdi ụlhoghonaan ghan ni iyoor ḍịghaagh iboom, bịdi iyoor ụ́uḅaghami ghan, kụ oomo phọ ịpe yoor ọrolan bọ bịdi ẹpe eḍum mọ rꞌẹnum ịyaar ayoor úmi.

¹⁶Bịdi phọ ukori ghan iyoor ḍughul rꞌootaany oomo phọ ịpe yoor ọrol bọ rꞌạbidi ophogh ghan ịga phọ ayoor.

¹⁷Seseeny mạar ạatughian ịphen phọ kụ aphogh ịlo ẹkpe oḍighi. Ịphen ọde-otu phọ ayira aḍighi bọ ketue ni ẹsighe ịiḅaghami etuom nyọdi rꞌoomo eghunotu phọ ọdi. Kụ ọdi phọ oye ogbogh oḅom ẹmhu dị rạ́naghan ghan ịlo ọnon oye ạghaaph.”

¹⁸Abigel aagborion ni ạsighe rꞌịyal okuron iiḅoghoḍi ạbred rꞌịyal arukuru ozu ịnam dị omuzeḍi miim, oogh iyool-ịga dị ọphoghi, ḍioph rꞌoḍual igbogh ịtoom ẹemor ịbiakpa dị ọphophoghi, oniin okuron ịgharaghar ibusi, rꞌịyal okuron ạkikia dị oḍighinom ịgharaghar ikpo ạfig, kụ ọsighe rạraar phọ ịphen ọsaanyogh ịnam adool.

¹⁹Kụ Abigel ạḅeni nmụny-otu phọ mọ, “Iḍia ghan mị kịdaph ni inyina.” Kụ ọlo ọdi ọ́ḅeni ịyaar olhom mọ ọdi.

²⁰Ạnir phọ aḍigh ẹnam adool phọ ọdi ratenom ẹekuleeny dị edi ọgbal ẹeḅaraph bịn ekperenom ọdi aazuanan Devid rꞌawe phọ ọdi dị rotu ọteeny ọdi.

²¹ADevid ạatughian ghan ni mọ, “Eeghe kụ isu bọ ịmi kụ mị ạmaar bọ aphoghonaan ghan rạraar oye phọ ọphon ẹpe ẹdala phọ. Rꞌeniin ịyaar ọdi úmi, kụ ịphen kụ ịdi ọdi rụkpe ghan ịmi esi oomo iiḅi phọ ịpe mị aḍighi bọ nyọdi.

²²Ẹnaan ịgur ịmi eghiigh eḍighi ịyaar dị mị ụ́ze oomo phọ awe phọ ạbuphe phọ kụ ạḍiroor egbi ọḅaal!”

²³Mem dị Abigel ạmiin bọ Devid kụ ọdi akem ạḍua ạnyu ẹnam adool phọ asoor akpuḍughian ude,

²⁴sịphe aruwol phọ aDevid kụ ạḅem mọ, “Seseeny, oye phọ, ụnaghanan ịmi! Ịikpia phọ ẹrol ẹmhu ạmi.

²⁵Seseeny, kápogh Nebal. Ọ́moogh ịyaar oḍighinom! Ọdi ạkaraghi ạkigh ḍien phọ ọdi — uwo elologhi! Oye phọ, mị ụ́tol sịphe mem mọ awe phọ ạna oru bọ.

²⁶Ọmoogh-we phọ kụ akikima bọ ni nyịna mọ káḅulemian ḅịle kạ́ze ẹpomoghian phọ ạna. Kụ nyịidipho phọ, mị akunya rꞌaḍien Ọmoogh-we phọ odi ghan bọ mọ kọliom ni ịdipho aNebal oomo ẹpomoghian phọ ạna rꞌoomo awe dị rọwa ghan oḍighi ạna ịkaraph.

²⁷Kụ seseeny, oye phọ, sịghe ni rạraar phọ ịphen mị aruomonaan bọ nyịna, ạngo weye phọ ạna.

²⁸Seseeny, sạr ụwilenaan ịmi, oye phọ, tọrobo ịlo mị ạpioman. Ọmoogh-we phọ kaḍighi ni nyịna ọdaam, ḅịle rꞌạnmuny phọ ạna, loor esi dị nạ rabe ghan rạagham ọdi, kụ nạ káḍighi ịyaar dị eḍighi ịkaraph oomo aghuḍum mọ ạna.

²⁹Eru mạar dị oye azuom nyịna ẹgham kụ ạnya oghiigh ạna, Ọmoogh-we Ẹnaan phọ ạna kẹmaar ri eeko nyịna, ịdipho oye rạmaar ghan bọ kaphogh aako ẹelha ọdi. Kụ ọlo oomo ẹpomoghian phọ ạna, ọdi katoph ni bịdi ạkele, ịdipho ekpo lọ oye ạraph kạtapot.

³⁰Kụ mem dị Ọmoogh-we phọ maḍighinaan nyịna oomo igey ạraraar phọ ọdi maguanaan bọ nyịna, kụ maḍighi nyịna ọdaam mọ Ịzirel,

³¹pọ kụ amem dị, oye phọ, nạ kạ́kunuma ạḅile akiriri mọ nạ akiigh oye dị ụ́kpe oghiigh, ạḅile aḅulemian rꞌaloor ạna. Kụ, oye phọ, mem dị Ọmoogh-we phọ mạseph nyịna, seseeny, ịmi kúwula.”

³²Kụ aDevid ạḅeni ạnir phọ mọ, “Boom Ọmoogh-we Ẹnaan phọ Ịzirel ọpo arom bọ nyịna mọ tue ụteeny ịmi rodon.

³³Sẹph Ẹnaan esi igey ịitughian phọ ạna ḅịle kẹn rꞌịphen nạ maḍighi bọ rodon kụ ụphelom bọ ịmi esi ọko enu rꞌoḅulemian ịyaar oye rꞌaloor ạmi.

³⁴Ọmoogh-we phọ masophoghom, ómeera mọ mị aḍighi nyịna ịkaraph kụ ọlo mị akunya rꞌaḍien Ẹnaan phọ Ịzirel ẹpe edi ghan bọ bịn phọ, mọ nạ múugborion bọ utu ụteeny ịmi, ọbo oomo awe phọ aNebal mumuughu ni kụ ạḍiroor egbi ọḅaal.”

³⁵Kụ aDevid ạar rạraar phọ ạnir phọ aruom bọ nyọdi; kụ ọdi ạḅeni ạnir phọ mọ, “Keel ologhi otu. Kạ́aḅaghamian loor ạna, mị kaḍighi ni ịlo nạ ạwa.”

³⁶Kụ Abigel agheel ologhi otu ạteeny Nebal dị odi rale ghan ẹyaal ịdipho ọdaam. Ọdi mạphughol miim bịn kụ ologhi ạḅaal, kụ ạnir phọ ịyaar ọ́ḅeni nyọdi tụtu ẹḅaal ḍịeri phọ aḍio phọ.

³⁷Kụ mem dị amiim mọ mạḍuaghu, ạnir phọ ạḅeni nyọdi oomo phọ ịpe emite bọ, bịn ẹzegh eḍighi rꞌaloor phọ emuughu ẹmadan.

³⁸Ẹkiom ḍioph aḍughul-otu bịn kụ iten kụ Ọmoogh-we phọ ạgur Nebal bịn amugh.

³⁹Mem dị aDevid ạnaghan bọ mọ aNebal mamugh, ọdi ạḅem mọ, “Iboom Ọmoogh-we phọ. Ọdi maḅulemian Nebal ịpe ọdi uufolomi bọ ịmi, kụ ómeera mọ mị otelhedom mọ ọdi uḍighi ịkaraph. Ọmoogh-we phọ mạlhiom Nebal loor esi ịkaraph phọ ọdi.” Kụ aDevid arom ạghiom Abigel ọḅeni mọ ọno kapin nyọdi.

⁴⁰Kụ ạruukpaany phọ ọdi ọghi ọteeny ạnir phọ ẹpe Kạrmel, kụ ọḅeni nyọdi mọ, “ADevid urom iyoor mọ oru ọsighe nyịna ọghiom nyọdi pịdi nạ aḍighi ạnir ọdi.”

⁴¹Kụ Abigel azuman asi ude kụ ạḅem mọ, “Mị ọnyani-otu phọ ọdi kụ mị aakolobian ni ootologh ghan aruwol abutelhedom ọde-otu phọ ạmi.”

⁴²Kụ ọdi akem aḅetenu aḍigh ẹnam adool phọ ọdi. Oogh ạnmanyaan-otu phọ ọdi ụdaph ni nyọdi kụ ọdi ạdaph rụukpaany phọ aDevid agheel bịn aḍighi ạnir aDevid.

⁴³ADevid maphin ghan ni Ahinoam ọlo Jẹzreel, kụ nyịidipho Abigel mạḅile bọ aḍighi ạnir ọdi.

⁴⁴Mem mọ ạmuen phọ ạSol mạsighe ọnyani phọ ọdi Mikal, ọpo phọ aDevid aphin ghan bọ, bịn ạnughenyan Palti ọony aLais ọlo ẹmha dị oghol mọ aGalim.