Read abua 1 Sạmuel 26 Bible Online

1 Sạmuel 26 - abua bible

1 Sạmuel 26

¹Buniin awe ụḍua ni ẹpe Zịf ọteeny Sọl ẹpe Gibia, kụ ọḅeni nyọdi mọ aDevid ạbooghian ẹpe eegum mọ aHakila ẹpe ọgbal ẹdala phọ aJuda.

²Kụ ạSol akem aḅetenu ạpham ịraar ọonir ikpolom awe ẹgham mọ Ịzirel ạghi asiom ẹpe ẹdala phọ ạZif ọwaam aDevid,

³kụ ọdi adoghoḍi rugbogo ẹgham ọdi kụ arugh sịphe ọgbal eten eegbolom mọ aHakila. ADevid ạrol li ẹpe ẹdala phọ, kụ mem dị ọdi ạnaghan bọ mọ ạSol maru ọwa ọno,

⁴ọdi arom ni we iḅiligha ọdi kụ ọghi ọwaaghi ọmiin mọ ạSol ạkaraghi ni odi ẹpe phọ.

⁵Ọdi ạghi ni egina amem ạwa ạmiin ọkaraghi esi phọ ạSol rꞌẠbner ọony phọ ạNer, uwo ẹmhu awe ẹgham mọ ạSol, ọmina bọ. ẠSol ạmina ẹpe ologhi ogbogo phọ, kụ awe ẹgham mọ ọdi ọrol okitonom nyọdi.

⁶Kụ aDevid apuru Ạhimelek oye ọlo ạHitait phọ, rꞌAbisai umor phọ aJoab, (onhiin phọ ạbidi ughol mọ aZeruya), mọ, “Sịphe ịyal phọ anyina, ạnhian kụ kụdaph aani ịmi ạki ẹpe arugbogo phọ ạSol?” Kụ Abisai ạḅem mọ, “Mị kạki ni.”

⁷Kụ ḍughul phọ ạḍiphe aDevid rꞌAbisai oten ọghi oḍigh marugh phọ ạSol, kụ ọmiin Sọl dị rạnaani sịphe ogbo amarugh ẹgham mọ ạbidi, kụ ạsighe ọsoph phọ ọdi agim bọ atumeniom ẹmhu phọ ọdi. Ạbner rꞌawe ẹgham mọ ọdi ọtol okitonom nyọdi rọnaani yogh.

⁸Kụ Abisai ạḅeni Devid mọ, “Ẹnaan mẹḅogh ẹpomoghian phọ ạna ẹlogh ḍịghaagh ạna sịen aḍughul phọ ạḍien. Kụ nyịidipho mị kạsighe ọsoph phọ ọdi kụ agimom nyọdi mem bịn ạkpaariom ude. Mị kágim amuneni ịyal amem.”

⁹Kụ aDevid ạḅem mọ, “Káḍighi nyọdi ịyaar. Ọmoogh-we phọ kạliom ni tọrotoro oye lọ ạsighe ḍịghaagh ọdi ạḅoghom ọdaam mọ ọdi kụ ạsaḅar bọ.”

¹⁰Kụ ọdi ạloghom mọ, “Esi aḍien Ọmoogh-we phọ ọpo odi ghan bọ kꞌagee-pọ phọ, mị alegheri ni mọ Ọmoogh-we phọ rꞌaloor kụ kakiigh ni Sọl; iini keḍighi ni mem dị ọdi kạtol ạkpo bịn kụ amugh, iini ọdi kamugh erugh ẹgham.

¹¹Ọmoogh-we phọ kúmeera dị mị kaḍighi ịkaraph oye dị Ọmoogh-we phọ rꞌaloor kụ azu eghoony aḍighi ọdaam! Yira kọsighe ọsoph phọ rꞌizoki ạmuum mọ ọdi bịn ọḍuanam.”

¹²Kụ iḍighi kụ aDevid ạsighe ọsoph phọ rꞌizoki ạmuum mọ sịphe ọgbal ẹmhu phọ ạSol; kụ ọdi rꞌAbisai oten ọḍua. Rꞌoniin oye ọ́miin bịdi, ḅịle kẹn oye ólhegheri ịpe eḍighi bọ. Oye ósuma, oomo phọ ạbidi ụnaani ghan bịn, loor esi dị Ọmoogh-we phọ mạngo bịdi kugbogh ạralha.

¹³Kụ aDevid ạḅeeny ḍịeri phọ ạḍighaagh eḍiiny phọ kụ ạsiiny ạnyu ẹeḅaraph phọ, esi dị mẹkelan agey.

¹⁴Kụ ọdi ạlho ạmagh weye ẹgham mọ ạSol rꞌẠbner mọ, “Ạbner, nạ rụnaghanan ni ịmi ḍụghum?” Kụ Ạbner apuru mọ, “Ọphon rạlooghi bọ ọsumeeny ọdaam mọ ạnhian?”

¹⁵Kụ aDevid ạphagharanaan mọ, “Ạbner, nạ ḍịen kókpolom oye sịen Ịzirel? Kụ eeghe kụ iḍighi kụ nạ rápogh bọ kakori ọde-otu phọ ạna agey?

¹⁶Nạ mạwile oḍighi phọ ạna, Ạbner. Mị akunya rꞌaḍien Ọmoogh-we phọ ọpo odi ghan bịn phọ mọ oomo anyina ọkpe ọze, ịdi eḍighi bọ nyina ị́maar ikori ọde-otu phọ ạna ọpo Ọmoogh-we phọ kụ azu bọ eghoony aḍighi ọdaam mọ. Ịmiin. Ọsoph ọdaam mọ odi ẹghen? Izoki ạmuum mọ oseere bọ otumeniom ẹmhu phọ ọdi edi ẹghen?”

¹⁷ẠSol ạlogh ni elegh ẹḍogh phọ aDevid, kụ apuru mọ, “Devid, ọpo ạna phọ ni, mọony ạmi.” Kụ aDevid ạḅem mọ, “Ii, oboom ọdaam.”

¹⁸Kụ ọdi ạloghom mọ, “Oye phọ, eeghe kụ iḍighi kụ nạ ruphorogh bọ nịiniin ịmi otelhedom mọ ạna? Mịna uḍighi eeghe? Mịna ụpiom eeghe?

¹⁹Oboom ọdaam, nạghan ịphen mị kạḅem bọ. Eru mạar dị Ọmoogh-we phọ kụ ạsighe nyịna ruboroghom ịmi, pọ ọphighiron ẹkia ọngo ọdi kanme ni ologhi phọ ọdi; kụ ọlo eru mạar dị awe kụ oḍighi ịduon phọ, pọ itulughian Ọmoogh-we phọ ẹrolonaan bịdi loor esi dị bịdi muphorogh ịmi omitiom sịphe ade Ọmoogh-we phọ ọsighe ọkiom ekpisi dị mị kạaḅereghi ghan iiruen pọ ạrumugh bịn.

²⁰Kámeera ughiigh ịmi eeruen ekpisi lọ ẹkelan Ọmoogh-we phọ. Eeghe kụ iḍighi kụ ọdaam mọ Ịzirel atu bọ oghiigh ẹsu-aghoogh dị ẹrol ịduon ạmi? Eeghe kụ iḍighi kụ ọdi rụwa bọ ịmi ọsighe ịdipho ẹnun dị edi elegheḍum?”

²¹Kụ ạSol ạphagharanaan mọ, “Mị maḍighi ịkaraph. Tigheel, Devid ọony phọ ạmi. Mị nyịna ịkaraph káḍighi mun, loor esi dị nạ mạnma ighirigiir ghuḍum ạmi ḍughul phọ ạḍien. Mị uḍighi ghan uwo elologhi. Mị maḍighi ugbini ugbini.”

²²Kụ aDevid ạphagharanaan mọ, “Pọrono ọsoph phọ ạna, oboom ọdaam. Tom oniin oye ạna ạḅeeny aru ạsighe.

²³Ọmoogh-we phọ raanmo ghan ni ruunmo weye lọ ọmoogh omeeraam kụ ọḅile ọrol dọl aruukuan. Rodon phọ ọdi ạsighe nyịna ạlogh ḍịghaagh ạmi, kụ ọlo mị ịkaraph nyịna úḍighi; nạ phọ Ọmoogh-we phọ azu bọ eghoony aḍighi ọdaam mọ.

²⁴Ịduon phọ mị mạnma bọ ighirigiir ghuḍum mọ ạna rodon. Ọmoogh-we phọ ạtuugh kẹn ni ịduon phọ uḍighi aani ịmi ạḅile ụphel ịmi ạsighe esi oomo ịiḅaghami.”

²⁵Kụ ạSol ạḅeni Devid mọ, “Ẹnaan ẹseph ni nyịna, mọony ạmi. Igey kẹrolonaan ni nyịna tọrotoro ịyaar lọ nạ aḍighi.” Kụ iḍighi kụ aDevid aten ạghi ẹlo ọdi; kụ ạSol aten agheel ologhi otu.