Read abua 1 Sạmuel 28 Bible Online

1 Sạmuel 28 - abua bible

1 Sạmuel 28

¹Iru ni ẹteeny mem dị awe aFilistia ookpomoghi weye ẹgham mọ ạbidi ọghi ozuom ẹgham Ịzirel. Kụ Akis ạḅeni Devid mọ, “Tọ nạ alegheri ni mọ nạ rꞌawe phọ ạna kọtol rꞌạmi kụ obe bọ ẹgham mọ.”

²Kụ aDevid ạphagharanaan mọ, “Ii, mị otelhedom mọ ạna. Nạ kạmiin ni rꞌaloor ạna ịdi mị kaḍighi.” Kụ Akis ạḅem mọ, “Mị kạsighe nyịna aḍighi okoriom ạmi oomo amem.”

³ ẠSamuel mamugh, kụ oomo awe phọ Ịzirel mokughuḍi nyọdi, ọsighe oḍi ẹpe Rama ẹmha phọ ọdi. Kụ ạSol maphorogh oomo ạbuo-idike rꞌariil okuru phọ osumughu ọḍua sịphe ade phọ.

⁴Awe ẹgham aFilistia uukpomoghan ni kụ ọghi odoghoḍi rugbogo otumeniom ẹmha phọ aSunem; ạSol aakpomoghi ni weye phọ Ịzirel kụ arughemi ẹpe ẹeḅaraph phọ aGilboa.

⁵Mem dị ạSol ạmiin bọ weye ẹgham mọ aFilistia, aruugu asiph ni nyọdi.

⁶Kụ ọdi apuru Ọmoogh-we phọ ịlo ọdi kaḍighi, kụ ọlo Ọmoogh-we phọ ọ́phagharanaan rꞌamem mꞌesi ạmalha, mꞌesi oḍighinom aYurim rꞌaTumim, mꞌesi ariil phọ Ẹnaan.

⁷Kụ ạSol ạto ạḅeni butelhedom mọ ọdi mọ, “Ịki ịwaanaan ịmi oyil-ạnir lọ rạmiin ghan uḍien. Mị kạki esi ọdi idike.” Kụ bịdi ọḅeni nyọdi mọ, “Oyil-ạnir aḍien odi ni ẹpe En Dor.”

⁸Kụ ạSol anmia loor ọdi; ọdi ạkpologhian kịro ọdo iinmenan kụ, mem dị meghul, ọdi ạpham ịyal awe ọdi kụ ạghimom ọmiin ạnir phọ. Kụ ọdi ạḅeni ạnir phọ mọ, “Upurunaan ruwaloor phọ kụ ụḅeni ịmi ịlo kemite. Mạgh ghan amitiom ọlo mị aghol.”

⁹Kụ ạnir phọ ạḅeni nyọdi mọ, “Tọ nạ alegheri ni ịpe ạSol maḍighi bọ: ịpe ọdi aphorogh bọ riil ịmiin phọ rꞌạbuo-idike phọ mọ ọḍuaghu sịphe ade phọ. Eeghe kụ iḍighi kụ nạ ạtu bọ rạwa ọkpaminaan ạmi ḍiphil okori oghiigh ạmi phọ?”

¹⁰Kụ ạSol aghunya kụ ạḅem mọ, “Esi aḍien Ọmoogh-we phọ ọpo odi ghan bọ bịn phọ, mị aguanaan mọ nạ aḍighi ịphen phọ oye nyịna kạ́liom.”

¹¹Kụ ạnir phọ apuru mọ, “Nạ rạwa mọ mị ụmagh ạnhian?” Kụ ọdi ạphagharanaan mọ, “Sạmuel.”

¹²Mem dị ạnir phọ ạmiin bọ Sạmuel, ạnir phọ ạlho ni kụ ạḅeni Sọl mọ, “Eeghe kụ iḍighi kụ nạ uukeleghi bọ ịmi ịduon? Nạ ạSol ọdaam eelhe phọ.”

¹³Kụ ọdaam mọ ạḅeni ạnir phọ mọ, “Kákiilaan. Nạ ạmiin eeghe?” Kụ ạnir phọ ạphagharanaan mọ, “Mị ạmiin oniin uwaloor dị ạḍua sịen ade phọ ramite.”

¹⁴Kụ oye phọ apuru mọ, “Ạkigh eeghe ọdo oye?” Kụ ạnir phọ ạphagharanaan mọ, “Okumoor oye ni kụ ạḍua bọ ramite. Kụ oye phọ anyora ni onyoraam.” ẠSol alegheri mọ ọpo phọ ạSamuel; kụ ọdi azuman asi ude ạngo rughuenian.

¹⁵Kụ ạSamuel ạḅeni Sọl mọ, “Eeghe kụ nạ ạtu bọ ụmagh ịmi amitiom?” ẠSol ạphagharanaan mọ, “Mị odi esi igbogh ịiḅaghami. Ạbuo aFilistia phọ moru ozuom ạmi ẹgham kụ Ẹnaan mịḅitonaan ịmi. Ọdi ịmi ụ́phagharanaan mun mꞌesi ariil phọ Ẹnaan mꞌesi ạmalha. Kụ iḍighi kụ mị ạmagh bọ nyịna pịdi nạ ụḅeni ịmi ịlo mị kaḍighi.”

¹⁶Kụ ạSamuel ạḅem mọ, “Eeghe kụ iḍighi kụ nạ ụmagh bọ ịmi, mem dị Ọmoogh-we phọ kụ mạḅitonaan nyịna aḍighi ẹpomoghian ạna?

¹⁷Ọmoogh-we phọ maḍighi nyịna ịpe ọdi ụḅeni bọ ịmi kụ mị ạḅeni bọ nyịna. Ẹnaan mạsighe ọmar phọ ḍịghaagh ạna kụ ạngo ghụn Devid.

¹⁸Nạ ọ́naghanan ịto Ọmoogh-we phọ, kụ nạ óogulemi weye Ạmalek rꞌoomo ạraraar phọ ạbidi. Ẹpe kụ ịyaar phọ Ọmoogh-we phọ raḍighi bọ nyịna ịduon phọ nyịidipho.

¹⁹Ọdi kạḅogh ni nyịna rꞌawe phọ Ịzirel ạngo weye aFilistia phọ. Iḍue, nạ rꞌạnmuny phọ ạna kotu ni ẹphen mị odi bọ, kụ Ọmoogh-we phọ kạḅogh kẹn ni weye ẹgham mọ Ịzirel ạngo bụo aFilistia phọ.”

²⁰Egina amem bịn ạSol ameel ude bịn aselogh loor oghiilaan ịpe ạSamuel ạḅeni bọ. Aloor ọdi idugh ni loor esi dị ọdi eḍien ólhe oomo ootaany rꞌaḍughul phọ.

²¹Ạnir phọ ạghi ni ạteeny nyọdi kụ ạmiin mọ aruugu rasiph ni nyọdi iboom, kụ ạnir phọ ạḅeni nyọdi mọ, “Seseeny, oye phọ, mị ụsighe ghuḍum ạmi ạpham ḍịghaagh kụ aḍighi bọ ịpe nạ ạḅem bọ.

²²Kụ nyịidipho, seseeny, ḍighi ni ịlo mị ạḅeni aani nyịna. Mị kạsaanaan nyịna eḍien. Nạ ạmoogh olhe eḍien phọ pịdi nạ ạmoogh ịnyaam orelhiom ogheel.”

²³ẠSol ómeera, kụ ạḅem mọ ọno rále ịyaar. Kụ ọlo ạbuo ịtooghi phọ ọdi ụkpaariom ni nyọdi mọ alhe ịyaar. Ruukuna phọ ọdi aḅetenu ni sịphe ade phọ kụ ạrol sịphe ẹmina.

²⁴Ạnir phọ aagborion aghiigh oophoony ọony ạnam ọdi. Kụ ọdi ạsighe ịgbieneen ịbiakpa kụ akem aḍighinom eḍien.

²⁵Kụ ọdi ạsighe eḍien phọ ạḅamaghinaan Sọl rꞌạbuo ịtooghi phọ ọdi, kụ bịdi ole. Kụ bịdi ogheel ḍughul phọ ạḍiphe phọ.